PIYER MUCUW NAŊ 1 - Bible en langue guiziga

Ji haŋ

¹ I ya Simoŋ Piyer, gawla ngi Yesu Kristu, yo mislin naŋ, matuhukum ɗerewol hana da kum mulumam tiɓi mupuɗaw ka ngi ndra, tisi jeŋŋe ngi Buymisemuŋ ndra ati ngi Milih ndra Yesu Kristu na.

² Anja ki lumam gimezle haɗa haɗa tisi kum masinaka Buymisemuŋ ati Buy ndra Yesu Kristu na.

Buymisemuŋ mazila mbur ati naŋ mawina mburo

³ Naŋ kine, gwat ndra muroko ti may naŋ ar joˀ ndra, waɗ ar sipi jiviɗ ndra na, gidaŋ ngi Bumbulvuŋ a vula ndra di le. A vula ndra di ti naŋ mibiga ndra mbur mizila ndra ti dudok nga naŋ, waɗ ti gidaŋ nga naŋ magi slra na.

⁴ Naŋ kine, gwat madiɗahay muwãˀ, naŋ miɓa ndra di ɗaˀ le na, a vula ndra taŋ le, ɓa kisa laham tivu duniya mizãˀã le ti hĩyã gwat, ɓa kisa jumom ar kpak ngi Buymisemuŋ.

⁵ Vurˀe, tusom mevel tos ti gidaŋ kum wãˀ so: coko gi gwat ti lesl bac nga mi tiɓi kumo, yo coko si na gwat ng'ar gi gwat ti lesle.

⁶ Ngar si na gwata, coko jigina vu kum, ng'ar jigina vu kumo, coko ɓusaɓi, ng'ar ɓusaɓi, coko si na Buymisemuŋ.

⁷ Ngar sipi si na Buymisemuŋ, coko ji ngama ngi sukumuŋhoy, waɗ ng'ar ji ngama ngi sukumuŋhoyo kwana, coko wuɗavu.

⁸ Asi da gwat tayna t'ada avu kumo haɗa na, a sa tiri ti kum wirwir, yo gidaŋ gidaŋ ngi si na Buy ndra Yesu Kristu.

⁹ Amma mbur manja gwat tayna na, i dangar, a tutuma li ti tutum. Mungra, naŋ miga taŋ zleˀe, Buymisemuŋ mubunaŋ taŋ le avra na, naŋ a puyko hirnga naŋ le.

¹⁰ Sukum ɗuwoy, Buymisemuŋ a zulukum le, yo a wunukum le. Vurˀe, tusom mevel tos, ɓa ki jaka ɓi nah gidaŋ gidaŋ fineˀ misi zleˀe. Da ki ra gam kanah na, naɓa kum anta ndilam ar mungra ta ndiɗaˀ wãˀ.

¹¹ Naŋ kine, jiviɗ ngi ci ng'ar li zumabuy ngi set ngi Bumbulvuŋ ati ngi Milih ndra Yesu Kristu na, a sa pulukum di firndiw.

¹² Ko ti kum misinaka le, yo kum mizlak gidaŋ gidaŋ ar ɓi mikaslsla muwurenna na kwana, yi wuɗ i mukum hiri naŋ ndrehhe ava na si.

¹³ Amma ti ya misi ada a ruwuy aka aruŋ na, yi wa na, naŋ kuy ɓa yi puɗkukum ti mahiri ngi ɓi nah.

¹⁴ Yi si na le, hin ngi wuɗuk ati dumvu ɗu mamuco, a ndilo le gweˀe, kaɓa Buy ndra Yesu Kristu minjikiy di na.

¹⁵ Amma i ra kiɗ vu kuy kuy, ɓa ko mbri a dirba, ya mumuc le na, kisa lumam jiviɗ ar gwat gar, a sukum keŋ a hirnga, ɓa ki jaka ɓi ngi gwat ya mudubunukum taŋ tayna.

Mizli mupuraka dudok ngi Kristu

¹⁶ Naŋ kine, ndra mubugukum gidaŋ ati so ngi Buy ndra Yesu Kristu na, i slufukum di i mambaˀ mukuyoy kilaw kilaw ta. Amma i puraka dudok naŋ le ti hiri ndra.

¹⁷ Asi ti ˀay ngi Buymisemuŋ mifineˀ gwat gar micino, naŋ miɓaŋ: «Mbur hana, i mangal ɗu, ya mawuɗaŋ, i mbur ya hĩhĩyaŋ ɓa yi winaŋ» na, a lum ɗuva hirnga, waɗ dudok tivu Buymisemuŋ Cine ndra.

¹⁸ Ti ndra mubumoˀ ati naŋ a muwã Mipal na, ndra vuna, i cinaka ˀay naŋ nah le paɗ a muŋ.

¹⁹ Anga ma na, mingiɓi ngi mijiviɗey a jaha ndra le jah gidaŋ gidaŋ ma. Kum misi hiri ngrimme, kaɓa mapuram lampe mapusluɗ caray caray angi luvuŋ na, naŋ kaslsla, ngrimme hã li a wun, yo hã bangay ngi wuna li a pusluɗ a mevel kumo.

²⁰ Dumbuŋ na, sinaka kuy kuy, ɓimutoho Buymisemuŋ minjika da mijiviɗey mutohoko na, ko mbur mabiga pulaˀvra naŋ ti gidaŋ naŋ pal naŋ gu anta.

²¹ Asi mike na, ɓimutoho Buymisemuŋ minjika da mijiviɗey miɓaka gar na, ko ɓi pal magi asi wuɗ ngi mbur na anta ndiɗaˀ wãˀ. Amma mizli miɓam ar deɗe ngi Buymisemuŋ na, i ˀUf Mipal muvula taŋ di.