NEHEMI 2 - Bible en langue guiziga

Buy Perse mupula jiviɗ da Nehemi ɓa a mi nga Zeruzalem

¹ Ɓi misenna a gi angi kiya Nisaŋ, angi vi mizli ngir cuw naŋ ngi zumabuy ngi Artakzerses, naɓa mbaazla a ro taˀ a mbuŋ buyo ngbaŋ. Akẽh na, yi zuɓa mbaazla tuwa, yi paŋ di. Yi ra liki, amma yi lik ɗaˀ zleˀe a mbuŋ buyo ta.

² Dar buy a cufuɗiy: «Ki hiɗ hiri mi danaka? Gwat ara juw kwa? Malla ki lum ɓi mekelem le pal a mevel ɗike kwa?» Ar nah na, zluwun ara giy haɗi teˀe.

³ Yi mbiɗa da buyo na: «Kumani, anja ki ndir ti siifa caˀa! Walahay midikaka dideˀ ɗuwoy a diga na, mizli a zumaka le, yo miviŋ ngi mizlingre ngi walahayay vuna ma na, i muwurahay le ma gar, na, i lik ta mbrike?»

⁴ Buy tuwa, a cufuɗiy: «Ki wuɗ na mbri ska?» Akẽh na, yi dir dibiɗ da Buymisemuŋ ngir birngiŋ,

⁵ joˀ yi ɓa buyo: «Da ki hĩyã le, yo da ki pura gawla ɗike le kuy avu hiri na buy, sliniy nga ruwuy Zuda, ng'ar walahay misi zivi ngi dideˀ ɗuwoy a diga na, ɓa i ra mahiri ngi ndir naŋ a muŋ.»

⁶ Buyo naɓa maˀãy naŋ a ro a cikeˀe, dar buy tuwa, a ɓiy: «Ki sa zuɓa mulak ɗik vuna ngi hin kiteka? Ki sa mo ti vunaka?» Buy a hĩyã le ɓa i ru, joˀ yi slaŋ hin ngi mo ɗu.

⁷ A dirba nah na, yi ɓa buy tuwa ma: «Da ki hĩyã le na buy, anja ki vuliy letir, ɓa i ru di da buy miwi lihey ngi si pas ngi pastaˀ ngi mizaw Efrata. Kanah na, naɓa a sa pulikiy i cuh, hã i ra ndil a ruwuy Zuda.

⁸ Waɗ ma na, ki vuliy letir ɓa i ru di da Asaf, mbur mijigina ɓuh ngi buyo. Ɓa anja a vuliy dum ngi ɗiya miviŋ ngi hay muguno ti mohol, migweˀ avu hay ngi Buymisemuŋ na, yo dum ngi ɗiya mohol ngi walahay ati ngi ɗiya hay ya masa cifi anga na ma.» Dar buy tuwa, a vuliy letireye so, asi mike na, Buymisemuŋ a ro ti haŋ naŋ bac ar ya.

⁹ Akẽh na, yi ru ng'avu buy miwi lihey ngi si pas ngi pastaˀ ngi mizaw Efrata, joˀ yi vula taŋ letirey buy muvuliy taŋ tuwa. Ya muru na, buy a slin madiɗa ngi sojehey ati misi pilisey le ngi kis ɗu.

¹⁰ Akẽh na, Sanebalat, mbur Horoni ati Tobiya, gawla naŋ, mbur Amoŋ micinaka ɓi ngi so ɗu cin na, a hĩyãka ta wãˀ. Asi a puraka na, mbur a so le, ɓa a ki slimiɗ ar Israyeleye.

Nehemi misingila mohol ngi walahay Zeruzalem

¹¹ Ya mindilo a Zeruzalem na, yi cifi i gi hin makir a diga.

¹² Ti duvuɗo, i slikiɗ waɗ mizli mekelemey asi ya. Gwat misãmi mekelemey anta asi ya ta, sey zungu ya migilaˀ anga na tewle. Gwat Buymisemuŋ ɗu mibigiy di a mevel ɓa i ga vur Zeruzalem na, ko i njika ɓi nah da mbur ta wãˀ.

¹³ Ti duvuɗo, i bi tir mizlingre macuh tir Sozo na, i ru kini ngir tivi miviɗiviɗi ngi yam ngi Ngongoŋ, yo ngir tivi mizlingre ngi Zay ngi gwatay. I singila mohol ngi walahay Zeruzazleme singil singil na, i li njoŋ njoŋ njurŋwayya pal naŋ, yo miviŋ ngi mizlingreheye, vu a zuma taŋ le kapa.

¹⁴ Ya mira cuh kini ngir tivi mizlingre ngi Miviɗiviɗi ngi yam, yo kini ngir ti vu futuŋ ngi buy na, zungu ɗu ya mujoˀ, a lum li cuh mata.

¹⁵ Ngi duvuɗo, dar yi tuwuɗa heleleŋ Kedroŋ, bal ti singila moholo singil singil na si. Akẽh na, yi mo murdirba tir mizlingre ngir Sozo tuwa a muŋ ma, yi mo ng'ar li ɗu a muŋ.

¹⁶ Ya muru na ng'aka kini, yo gwat ya miga gar na, ko mizli micawwa ngir walahayay a si na ka ta Hã ti di nah gar na, ko da Yudehey, masayay, mizli madiɗa ngi buyoy, mizli micawwahay malla ko da mizli mekelemey muroko welele ti slrahay kwana, yi njika taŋ ɓi neˀ ta.

¹⁷ Akẽh na, yi zla i ɓa taŋ so: «Puraka bonoy ndra maduhurom di na, asi mesene ndrahay muwahaka mohol ngi Zeruzalemey na, yo asi miviŋ ngi mizlingre naŋhaya, vu a zuma taŋ le ma! Slikiɗukum, mukum hiri ngi ndira walahay Zeruzalem a muŋ, ɓa i ndiram ti mesem mata.»

¹⁸ Joˀ yi njika taŋ gi mezle, Buymisemuŋ migiy di ti haŋ naŋ bac ar ya, waɗ mingiɓi, buy miɓiy di tuwa so. Dar a ɓam: «Slikiɗukum, ndirukum walahaya!» Joˀ a jinikiy hirdam hirdam kuy kuy ngi ga slra misenna.

¹⁹ Sanebalat, mbur Horoni ati Tobiya, gawla naŋ, mbur Amoŋ, waɗ Gesem, mbur Arapa, taŋ micinaka ɓi nah cin na, a singiram angi ndra, a puram ndra hiris le. A zlaka a ɓam na: «Ki gam di i mi nah vunaka? Ki slikiɗam di i ɓi ti slikiɗ avu buyo takwa?»

²⁰ Ya kwana, yi mbiɗa taŋ di: «Masa ga ɓa gwat misenna a gi na, i Buymisemuŋ ngir birngiŋ ti haŋ naŋ. Ndra gawla naŋhaya, ndr'i slikiɗam, i ndiraka walahaya. Amma kumo, ko lum kum anta a Zeruzaleme ta, na zle jiviɗ nah anta, yo gwat ɓa a wuluku kum keŋ ava anta si.»