NAHUM 3 - Bible en langue guiziga

Walahay mikiɗa hirnga, mupula le mbak ɓa a ngizl kuɗup

¹ Walahay mindeŋ ndeŋ ti mikiɗa hirnga, mindeŋ ndeŋ ti migi gilaw da mizli, misi moˀore, yo ko naŋ anta pula tiɓi gwat ti gidaŋ mbak le ta. Kay, naŋ ar bonoy!

² Hurum ngi laway macin a diga, hurum ngi sar ngi motahay ati ngi pilisey, waɗ ngi mota ngi vurumoy makukuroko taŋ ti gidaŋ ara cino paɗ a diga.

³ Misi pilisey ara bam le ng'ar vurum, maslalam walak walak, ziwit mawucuɗu. Mumucahay a slufam ta, vagay ngi mizli ara mbi zikitiŋ, ko anta tiki ta. Vagay ngi mizli ara ba sar da mizli toŋ toŋ.

Niniv mipi mesem

⁴ Hirwuy Niniv, ki sulome, ki migi madama haɗa, ki tikina mizli ti kuy ɗik mazli ta wãˀ na, sukwi ngi mizli, ki gi taŋ beke le ti sulome ɗik na, yo mizli, ki gi taŋ beke le ti cucuk ɗike.

⁵ Vurˀe, ya Bumbulvuŋ misi gidaŋ wãˀa, i ɓuw na: y'ani i ra lumuw akẽh. I sa kursuw zip ɗike kuras kuras, sesẽŋ a midibiɗ, ɓa i buguw gulndiŋ kine a mbuŋ sukwi mekelemey, yo ɓa i biga pi mesem ɗik na a mbuŋ zumabuy ngir duniya gar.

⁶ I sa tukuw li a hirnga, ɓa ngi puw mesem, gwat ɓa mizli a puraka na, i sa biga avu ka.

⁷ Dar mbur gar mupuruw le na, a sa kil bal ti widi, a ɓi: «Ninive, i mingizla le pay, masa puraŋ ircece neˀ le i wa aruŋ ma ska? Ɓa ki taˀa tuwuyo na, i sa lumuw mbur, ɓa a tukunuw na ama ma ska?»

Ninive, a sa gakaŋ gwat misi purla kaɓa ngi Tebes na ya

⁸ Hirwuy Tebes a pi a mi mihaŋ ngi Nil, yam gun hirnga naŋ zlar, ar deɗe ngi moholo i mubuliy, mubuliy madiɗa, na ka Ninive, ki wakaɓa ka zuwen fineˀ Tebes vuna sukwani?

⁹ Hirwuy Etiyopi ati Ezipte, i gidaŋ naŋ wãˀ zleˀe, ko maakway naŋ anta. Hirwuy Put ati Libi, taŋ tisi ka.

¹⁰ Amma naŋ vuna kwana, a jaka mizli naŋhaya le nga ruwuy mulak. A ngizlaka ziri gaza naŋhaya le a mazlaka jiviɗey gar. A gam ceregezleŋ ar mizli naŋ ngi mbuŋhoyo, a juwaka mizli madiɗa naŋhaya le kaˀ kaˀ ti celelu.

¹¹ Niniv, ka kwana, bonoy a sa wuw, a sa nduw yik. Sey ki sipi li ɗum vur mesene ɗikey aya.

Ninive, a cici zlak gu ta

¹² Li ɗikey ngi ndil ng'ar taŋ tuwaˀ tuwaˀhaya, taŋ kaɓa widis ngi urufoy, misi ti mepiɗece locok locok. Da taŋ muwusaka urufo le was si na, a diɗoko kurtoto, nga balam mbur mawuɗ zum taŋ.

¹³ Pura mizli ɗikeye ɗi: sey i ngwasay a hay ɗike tewle. Mizlingre ngi hirwuy ɗike i muwuna le baŋ da mesene ɗikeye: vu a zlizlira faɓuru naŋhaya le.

¹⁴ Niniv, nuw yam, asi mesene ɗikey a gunukuw hirnga le, mahiri ngi ɗiya gala ɗik ava, huluɓ hohoy, kulpaŋ, ɗiyi gwat ngi kiɗa brik.

¹⁵ Vu masa zlumuw na a diga, a sa kiɗukuw ti maslalam. A sa zumukuw a diga kaɓa yuk mazum giziŋ.

Mizli ngir walahay taˀ gar a ngizlam kap

¹⁶ Migi terere kumoy a gam le haɗa, fineˀ wurzlaŋhay a muŋ, taŋ kaɓa yuk haɗa maslikiɗ hiihe.

¹⁷ Mijigin kumoy a gam le haɗa kaɓa jaray, migi slra ɗik ngi dalahaya taŋ zirininini kaɓa jijiwiɗ ngi mam, macifi ar hadaw ti hin ngi himiɗi, da pas a bo le na, a slikiɗam cek, a ram kini ng'amaka na, ko asinta. Na taŋ a ma ska?

Hirwuy Asiri a sa ngizl ngi wãˀ

¹⁸ Buy Asiri, mijigin kumoy a roko ɗokɗok ngi wãˀ! Madiɗa ngi soje ɗikey anta wusam mata! Soje ɗikey a zliɗam hirnga le a muwãhay, ko mbur anta ngi cikila hirnga taŋ ta.

¹⁹ Mendere mulumuw na, anta ɗiyi mata, waˀa ɗike, anta kuf mata. Mbur gar micina ɓi ngi gwat mulumuw na le na, a kiɗ haŋ aseˀe vur ka, asi moˀore ɗik na, ɓa ki ga da mburo, makaw mbeˀ mbeˀ ta na, ada kwa?