MIKUCUWULOY 7 - Bible en langue guiziga

Ngwas migi madama matikina mbur gawla

¹ Mangal ɗu, ja mingiɓi ɗu a hirnga, ɓi ya maɓuw di ɗaˀ le na, anja a ndir i zlili ɗiki.

² Da ki wuɗ le ɓa ki ndir ti siifa na, ja ɓi ya maɓuw di ɗaˀ le na a hirnga, yo ɓi ya mudubunuw di na, jigina ka zinga ngi hiri ɗiki.

³ Juwa taŋ kaˀ avu haŋ ɗike, toho taŋ toh toh avu beleler ngir mevel ɗike.

⁴ Ɓa sinmijileŋ na: «Ki sukum ɗu!» Yo cufuɗa lesle hirdam hirdam ar deɗe ngi ngama ɗiki.

⁵ A sa jiginuw avu ngwas misi may zil, waɗ avu ngwas mulak misi mingiɓi naŋ deɗeke.

⁶ Ngi pas mekelem ada na, ya deŋ a mi fenetir ngi hay ɗu, i ra pur hiri ng'avra.

⁷ I pur gawla manja lesley, keɗ a wuzla gawlahay na, mangal menjeɓele manja lesle.

⁸ Naŋ macuh tir jiviɗ madiɗa ngir walahaya, gweˀ avu li mukulkuc, hay ngi ngwas tuwa misi ara na, a zla a zuɓ jiviɗ ngi hay ngwas tuwa.

⁹ Li zuyyo, li miji le kutupuˀo, wuzla duvuɗ, luvuŋ titira,

¹⁰ keɗ na, ngwas tuwa, ara ru nga ji di hirnga, zana kaˀ kaɓa ngwas sulome, wer pal naŋ.

¹¹ Ngwas nah a wus haɓar haɓar, naŋ anta cifi teˀteˀe ta, naŋ anta cifi virzi a hay naŋ ta ma.

¹² Neˀ na, n'ani ar li ngi luuma a diga, neˀ na, n'ani a jiviɗ madiɗa a diga, a pi hiri ar mazlaka jiviɗey gar.

¹³ Pura ɗi, a ja mangal tuwa le kuɓuy, a luwaŋ hiri law, a ɓaŋ:

¹⁴ «Ya ti may ngi gi mikuli ngi gi sise zleˀe, gwat ya miɓa i sa ga na, dana a gi le muduba.

¹⁵ Vurˀe, ya mubo na nga sipi ɗike, ɓa i ji ti ka hirnga, ani i lumuw le jaka.

¹⁶ I ɗiya arngawo ɗu le, gwatay sirit sirit, ti boɗoko mungboɗoɗohoy, ti gabaga mislirkeɗ slirkeɗ ngi ruwuy Ezipte.

¹⁷ I kuca urdi mezlehey le da li hin ɗu, urdi mir, alowe waɗ urdi kanel.

¹⁸ Sawa ɓa i wam ti wuɗa vu, hã avu mipriki. Cunukum ndum arleˀe ti wuɗa vu ndra.

¹⁹ Asi zil ɗu naŋ anta a haya ta. A zuɓ mulak le kileŋ ng'ar li.

²⁰ A hil dala le a haŋ ar gabala. A sa mo sey ti kiya babaraŋ.»

²¹ A ja mangala le ti mingiɓi naŋ ngi tikina vu tuwa, a kaŋ le kuɓulaŋ aseˀe ti mi naŋ mideɗek haɗa tuwa.

²² Mangal ara sipaŋ a haŋhaŋ si, kaɓa sla maram di nga sliˀay, kaɓa gilaw mujuwa le, maram di nga kuti ti bonoy,

²³ hã sliɗ naŋ na, a bo ɓultoŋ ɓultoŋ avu vu. A wus vu kaɓa ɗiyuw mawus vu ng'ar mazaɓa, ara zizi di i siifa naŋ na, a si na ta,

²⁴ Ziri ɗuwoy, wurenna, cinaka mingiɓi ɗu, jikaka slimiɗe kuy kuy asi mingiɓi ngi balam ɗu.

²⁵ Vur ngwas misi kanah na, anja ki wuluk wuluk le ngi ci ng'ava ta. Ki zizi ng'ar jiviɗ naŋ maru di na ta.

²⁶ Asi mike na, a hizigiɗ mizli le haɗa teˀe, mizli naŋ mikiɗa taŋ gar na, i gambarahay.

²⁷ Hay naŋ i jiviɗ ngi ru ng'ar li ngi mizli mumucahay, aru ti mburo ng'ar hay misi luvuŋ ngi mucu.