MIKUCUWULOY 5 - Bible en langue guiziga

Ji lesl avu ngwas sulome, sinmijileŋ i nah

¹ Mangal ɗu, ji lesl avu sin ɗu mijileŋ, yo jika slimiɗe jak asi mi ngi kuti ɗuwoyo.

² Dar kisa cir tisi mi ngi kuti ɗu na, yo mingiɓi ka masa ɓa gar na, ki si na le.

³ Haˀaw, mi ngi ngwas burvula na, naŋ deɗek ka mam, naŋ nuffo fineˀ mala.

⁴ Amma ar kiɗa mi naŋ na, naŋ kaɓa kalaf miɗalak, a ngum vu kaɓa maslalam misi mi ti ka ti ka.

⁵ Gwat ngi gi ngi ngwas nah, a ɗiɗa mburo ng'ar mucu, sipa sar naŋ, aru ti mburo ng'ar li ngi mizli mumucahay.

⁶ N'anta sipi jiviɗ ng'ar siifa ta, jiviɗ naŋ a zizi vu na, ko naŋ anta si na ta.

⁷ Mangal ɗu, wurenna, cine mingiɓi ɗu, mi ngi kuti ɗuwoyo, ki zliɗa taŋ avra ta.

⁸ Ngwas misi kanah na, kirih kileŋ ava, ko ki ɗuv sar taˀ le nga miviŋ naŋ ta.

⁹ Vur naŋ mavusuw ɗongor ɗike, yo a vuluw asi haŋ ngi mbur zil mazuɓ himaˀ fõh fõh.

¹⁰ Da kanah ta na, naɓa mulakay a sa mbam ndus ti gidaŋ ɗike, yo liiriɓ ɗike, masa zumaka i mizli mekelemey, mbak ka vuna le.

¹¹ Ar kiɗa mi naŋ na, gidaŋ ɗik a sa tiki, joˀ kisa niˀic kaɓa gwat misãmi.

¹² Dar kisa ɓi: «ˀEy ehe, taŋ miɓikiy ɗaˀ ɗaˀ le zleˀe na, i pura hiris le vur mike? Yo taŋ mimbiɗikiy hirnga zleˀe na, i tiɓa ɓi nah ta vur mike?

¹³ I cine mi da metir ɗuwoyo ta vur mike? Yo mizli mudubunikiy gwat na, i jik slimiɗ aseˀe ta vur mike?

¹⁴ Naŋ kine, a ndir mata ɓa i ci ar mendere mifineˀgidaŋ, a wuzla kus ati jum ngi mizli ɗuwoyo.»

Wuɗa ngwas muzuɓa paɗ ti gawla ɗiki

¹⁵ Ngwas ɗike, naŋ kaɓa miviɗiviɗi ngi yam miɗelele, ka si di i yam nah.

¹⁶ Ki pula miviɗiviɗi ngi yam ɗike mbak a ɓul ng'avra ta, yo ɓa a zliɗ hirnga lambaˀ ng'ar jiviɗ madiɗahay ta.

¹⁷ Anja yam nah a ndir da ka pal ɗike. Ki jumom anga ati mulakay ta.

¹⁸ Ga sise da vigiɗ ngi yam ɗike, yo mumul ti ngwas ka muzuɓa paɗ ti gawla ɗike.

¹⁹ Ngwas ɗike, a wuɗ vu haɗa kaɓa muuni, yo a gi mezle haɗa kaɓa mangazaw. Anja ka matutuma ɗuwa naŋ na, a guw kuyyo, ko ti vunaka gar. Anja wuɗa vu naŋ na, a wu duwlak ndrehhe.

²⁰ Mangal ɗu, ki pula vu ɗike mbak da ngwas misi may zil vur mike? Yo ki ji kuɓuy ngi tutuma ɗuwa, i burvula vur mike?

²¹ Haˀaw, gi gwat ngi mbur gar na, anta ɗum a mihiri Bumbulvuŋ ta, yo ara singila gwat ngi gi ngi mbur gar.

²² A sa jaka mbur ar kwara, ti mungra naŋ madiɗahay, naŋ maga taŋ tehhe a muŋ, a sa ndir ti mungra naŋ kulnjoˀo, kaɓa ngamngam miji gwat le.

²³ Mbur majigina vu naŋ ta na, a so di i muc nga hirnga naŋ. Gi gwat naŋ mifineˀ gidaŋ le ka mibirnga na, masa zizaŋ hirnga i nah.