MIGI KIITAHAY 18 - Bible en langue guiziga

Mizli Daŋhay mislikiɗam

¹ Ti nah na, buy anta asi ruwuy Israyele zleˀe ta. Hirak ti nah vuna, mizli ngi sukwi Daŋhay ara sipam li, ɓa a pam ara. Asi a wuzla sukwi Israyeley gar na, sukwi ngi Daŋ a lum li pi t'aruŋ.

² Daŋhay a slinam mizli migi vurumoy zlum asi taŋ, zle a Kore ati Esetaol, ɓa ara puroko hirwuyo kuy kuy, ɓa a sinakaŋ. A ɓaka mizli muzlumoy tuwa: «A ra puroko ruwuyo kuy kuy!» Mizli muzlumoy tuwa, a ndilam ar muwã Efrayime, ara ndilam a hay Mika, a hinam a diga.

³ Ti taŋ migweˀ avu hay ngi Mika na, a cinaka ˀay ngi gawla Levi na, a gumbaˀam ng'avaŋ, a ɓakaŋ: «Muso ti ka ng'aka i waka? Ki gi mi aka ka? Ki kutuk mi aka ka?»

⁴ A mbiɗa taŋ di: «Mika a giy gwat ani, ani: a zuɓiy a cifi ti ya masay ngi gi mikuli naŋ.»

⁵ Mizli tuwa, a mbiɗakaŋ di: «Inga cufuɗa Buymisemuŋ so, ɓa i sinaka, da mulak ndra mazuɓaka hana, i mezle kwana.»

⁶ Migi mikuli tuwa, a ɓa taŋ: «A ram kuy kuy! Bumbulvuŋ a ro hiri taˀ avu mulak kum mazuɓaka hana!»

⁷ Mizli muzlumoy tuwa, a zuɓam jiviɗ, ara ndilam a Layis. A puraka keɗ keɗ na, mizli ngi digahay, ara pulam vu, taŋ ti mevel mezleŋ kaɓa mizli Sidoŋhoy. Gwat ngi mbiɗa hirnga da buy mazuma hirwuy nah, anta neˀ ta. A pam kileŋ avu mizli Sidoŋhoyo, yo anta vulam haŋ nga ruwuy mekelem ta.

⁸ Mizli muzlumoy tuwa, a moko ng'avu sukum taŋhay a Sora ati Esetaol. Dar sukum taŋhay a ɓaka taŋ: «Ki wulkam mbri vur hirwuyo ska?»

⁹ Taŋ a mbiɗaka taŋ di: «Slikiɗukum! Akum i ra zlaka mizli Layisey ngi kiɗi, asi i puraka hirwuyo keɗ keɗ na, i hirwuy mezleŋ. Amma ki ndiram jojoˀ si ta! Ngi ru, ngi ci ng'asi ruwuyo, ɓa ngi tiɓa na, anja hĩhĩy kum na, a tukukum ta.

¹⁰ Da kum misa cam le na, kisa lumam mizli misi mevel mezlehey. Hirwuy taŋ naŋ kirngiŋ. Buymisemuŋ a vulukum di le da kum. Gwat ngisi ruwuy mikic a diga loŋ anta.»

¹¹ Akẽh na, mizli Daŋhay skat skat merkeɗ, a slikiɗaŋ a Sora ati Esetaolo ti gwat ngi vurum taŋhay.

¹² A ra paka walahay guɗuk taŋ tisi pas madiɗ ngi Kiriyat-Yeharim, hirwuy Zuda. Vurˀe, a zilaka li nah, Mahana-Daŋ mbiɗeˀvra ‹Walahay guɗuk ngi Daŋ› hã dana aruŋ.

¹³ A slikiɗam baɗ akẽh, a bam ar muwã Efrayim, ara ndilam a hay Mika.

¹⁴ Mizli muzlumoy miram nga pura ruwuy Layis zleˀe tuwa, a zlaka, a ɓaka sukum taŋhaya: «Ar hay hanahay na, kuli miciɗa waɗ memeɗe naŋhay ati kuli miciɗa misirit sirit ti ɓiri muluwusla ada na, ki sinaka le kwa? Wurena, anja ki sinaka gwat kum masa gama so.»

¹⁵ A dirba nah, mizli muzlumoy tuwa, a ram ngi hay Mika, a cam ng'avi gawla Levi tuwa, a cufuɗakaŋ da naŋ da jam jam kwana.

¹⁶ Dambalaka mizli Daŋhay miskat skat merkeɗ, misi ti gwat ngi vurumoyo, a ndahaka mizlingre le.

¹⁷ Mizli muzlumoy, miram zleˀe nga pura hirwuy tuwa, a jiɗam ng'ar hay mijirngasl ar cala, a cam, a zuɓaka kuli miciɗa waɗ memeɗe naŋhay, ati kuli miciɗa misirit sirit ti ɓiri muluwusla. Naɓa masay a ro deŋ a mizlingre ati mizli miskat skat merkeɗ misi gwat ngi vurumoy tuwa.

¹⁸ Masay a pura na, mizli micam ngi hay Mika, a zuɓaka kuli miciɗa ati memeɗe naŋhay, jampa waɗ kuli miciɗa misirit sirit ti ɓiri muluwusla le, joˀ a ɓa taŋ: «Ki gam hana i mike?»

¹⁹ Mizli tuwa, a ɓakaŋ: «Taˀa mi! Ko ki mbiɗi mi neˀ ta, sawa asi ndra! Cifi masay ngi sukwi ndra. Cifi masay ngi hay ngi mbur purla ati ngi sukwi ndra Israyel taˀ wãˀa ya na, ki hiyĩ wanaka?»

²⁰ Masay tuwa, mevele zuyyo, a zuɓa jampa, kuli miciɗa memeɗehey tuwa waɗ kuli misirit sirit ti ɓiri muluwusla tuwa, a ki kiɓilaŋ asi taŋ.

²¹ Mizli Daŋhay tuwa, a zuɓam jiviɗ taŋ. Ziri taŋhay, ginew taŋhay waɗ gazlanga taŋhay sek a mbuŋ.

²² A ram le kileŋ avu hay ngi Mika si. Mika ati midigwi naŋhay a cikilam, dar a sipaka Daŋhay tuwa.

²³ A wudam asi Daŋhay, taŋ a mbiɗoko hiri, a ɓaka Mika na: «I mi maguw ka? Ki cikila mizli ngi mike?»

²⁴ Mika a mbiɗa taŋ di: «Ki hilaka kuli ɗuwoy ya miciɗa taŋ le, yo ki zuɓaka masay ngi gi mikuli ɗu le ma, ki ra cohom taŋ, mindiriy i mi aruŋ maka? Na kumo ma na, ki ɓikiy: ‹I mi maguw ka› mbri mbrike?»

²⁵ Mizli Daŋhay a mbiɗakaŋ di: «Ki gira ndra ti mingiɓi ta! Da ki mur tak ta na, mizli misi mingiɓi ɗik a mba taŋ kwacay le, a sa ndilam vu ar ka, a sa zizikuw ka ati hay ɗike kuɗup.»

²⁶ Ziri ngi Daŋhay a zuɓam jiviɗ taŋ gwaɗ taŋ. Mika a pura taŋ keɗ keɗ na, a funakaŋ le ti gidaŋ, duba naŋ pulaˀ, a mi ngi hay.

Walahay Daŋ ati hay ngi Bumbulvuŋ misi a diga

²⁷ Mizli ngi Daŋhay micohom ti gwat Mika miɗiya taŋ waɗ masay na, ntuwa na, a ndilam a Layis. Mizli ngi digahay ara pulam vu, taŋ ti mevel mezlehey, amma Daŋhay a kircaka taŋ ti maslalam a wuraka walahay taŋ.

²⁸ Ko mbur mukulo widi taŋ anta, asi Layise naŋ kileŋ avu Sidoŋ, yo a vul haŋ da ruwuy ko pal ta. Naŋ kine, Layise naŋ ar li micayya hã sesẽŋ a Ret-Rehop. Mizli Daŋhay tuwa, a ndiraka walahaya hirik, a pam ara.

²⁹ Walahay mazilaka zleˀe Layise, a mbiɗakaŋ slimiɗe, a zilaka Daŋ ti slimiɗ ngi dideˀ taŋ miyakaŋ a ruwuy Israyel.

³⁰ Ziri ngi Daŋhay tuwa, a ɗuvaka kuli miciɗa ngi Mika tuwa taˀ, ɓa a huruk hurukam a mbuŋ naŋ. Yonataŋ mangal ngi Gersoŋ, dideˀ meciɗek ngi Moyise, a tiri masay migi mikuli ngi sukwi Daŋ. Dideˀ ngi Yonataŋhay a cifam masayay hã sesẽŋ ar hin misa jaka taŋ nga ruwuy mulak.

³¹ A ɗuvaka kuli Mika miɗiya tuwa taˀ, kuli a zik rak rak ati hay ngi Buymisemuŋ misi a Silo na ya.