MIGI KIITAHAY 16 - Bible en langue guiziga

Samsoŋ mingila mizlingreŋ ngi walahay Gaza

¹ Ti di numuŋ ada na, Samsoŋ aru nga Gaza. A zlir ti ngwas sulome, ara hin di.

² Mizli Gazahay a cinam na, Samsoŋ naŋ da a diga. Dar a zlaka a mbiɗam vu, a jiginaka mizlingre kap ngi duvuɗo. Ngi duvuɗo taŋ teˀ teˀ, a ɓam ti kwacay taŋ na: «I kutukoko naŋ masa bawa ti miprik na, ɓa i sa kiɗakaŋ.»

³ Amma Samsoŋ a wursla duvuɗo wurasl, ngi wuzla duvuɗ na, a slikiɗi, a ja palalam ngi gica mizlingreŋ, a muɗa nduroɓ jom ti dum naŋhay misi tika tika avu dalama, waɗ magandaŋ naŋ. A hila taŋ ar pepesl, a jijira taŋ hã sesẽŋ a hirnga muwã mupuɗak ar walahay Hebroŋ.

Dalila muvula Samsoŋ ngi ji

⁴ A dirba nah na, Samsoŋ a hiyĩ ngwasa ada, a zilaka Dalila, hay taŋ naŋ ar sozo ngi Sorek.

⁵ Buy Filistihey a sa lumakaŋ, a ɓaka Dalila na: «Inga ka mi ngi Samsoŋ ti sek vu, ɓa ki sinaŋ naŋ migidaŋ haɗa na vur mike, ɓa i funakaŋ ti gidaŋ, yo ɓa i tikakaŋ ˀay. Mbur gar a sa vuluw gabal ti suloy skat.»

⁶ Akẽh Dalila a ɓa Samsoŋ: «Ka migidaŋ haɗa na, vur mike? Inga ɓiy di, sey a juwukuw mbri mbri ɓa a tikukuw ˀayaka?»

⁷ Samsoŋ a mbiɗaŋ di: «Da a juwikiy le ti cuwer tarnaˀ misira wureˀ, manja muˀul aruŋ na, naɓa i sa hĩhĩy, yo gidaŋ ɗu a sa tiri kaɓa ngi mbur ho gar.»

⁸ Buy Filistihey a soko ti cuwer misira wureˀ manja muˀul tuwa tarnaˀ da Dalila, Dalila, a juwa Samsoŋ ti cuwerey tuwa.

⁹ Filistihey a roko ɗum ɗum a viŋ naŋ. A zla tila mi gurjik: «Samsoŋ, Filistihey ara soko nga kiɗ ɗike!» Samsoŋ a buko cuwerey tuwa, dugwaɗ dugwaɗ, kaɓa zeweɗ migbisl mamburuc ti vu mijaŋ le. Amma naŋ migidaŋ haɗa na vur mike na, ko mbur misina anta.

¹⁰ Dalila a ɓa Samsoŋ ma: «Ki singir ar ya ti singir, ki giy di i slir. Na wurenna a juwukuw mbri ska, inga ɓiy di.»

¹¹ Samsoŋ a mbiɗaŋ di: «Da a juwikiy le kaŋ kaŋ ti zeweɗ nawayaŋ migam di gwat ɗaˀ t'aruŋ na, naɓa i sa hĩhĩy, i sa tiri kaɓa mbur ho gar.»

¹² Akẽh Dalila a hil zeweɗ nawaya, a juwa Samsoŋ tuwa ti naŋ, a til mi: «Samsoŋ, Filistihey ara soko nga kiɗ ɗike.» Naɓa mizli a roko ɗum ɗum a viŋ naŋ. Amma Samsoŋ a buko wezeɗey tuwa raw kaɓa gugumay misira.

¹³ Dalila a ɓa Samsoŋ: «Hã wurenna ki ra singir angi ya, yo ki ra giy slir ma. A juwukuw mbri mbrike, inga ɓiy di so.» Samsoŋ a mbiɗaŋ di: «Da ki slipiy hirnga le guloɗ guloɗ tarnaˀ ti zeweɗ ngi caka, yo ki juwa taŋ le ngiriɗ ki tilaŋ ngi miji caka na, naɓa gidaŋ ɗu a sa tiri kaɓa ngi mbur ho gar.»

¹⁴ Dalila a ga hinje da Samsoŋ tuwa. A slupaŋ hirnga guloɗ guloɗ tarnaˀ ti zeweɗ ngi caka, a juwa taŋ ngiriɗ ti tilaŋ, a zla a til mi: «Samsoŋ, Filistihey ara soko nga kiɗ ɗike.» Samsoŋ a puɗuk tir li hinje, gwat ngi caka, zeweɗ ngi caka, waɗ tilaŋ tuwa, a muɗa taŋ nduroɓ nduroɓ.

¹⁵ Dalila a ɓaŋ: «Hana so na, ki ɓi ki ra wuɗiy, dambalaka mevel ɗik a hin angi ya ta ngbaŋ. Ani ki singir angi ya is makir si, amma ka migidaŋ haɗa na vur mike na, ki bigiy di ta.»

¹⁶ Dalila ara hila mi da Samsoŋ, ara mbiɗaŋ hirnga ti mingiɓi misi purla hana, a funa gidaŋ le da Samsoŋ ka ngi mucu,

¹⁷ Samsoŋ a ɓaŋ ɓi miyaŋ ngir mevele tuwa: «A ɗuvikiy sliwiɗ ɗaˀ avu hirnga ta, asi yi muvula le da Buymisemuŋ diga ya misi a kwacay maha. Da a hicikiy hirnga le na, naɓa gidaŋ ɗu a bi le tivi ya, i hĩhĩy, i tiri kaɓa mbur ho gar.»

¹⁸ Dalila a pura keɗ keɗ na, Samsoŋ a njikaŋ ɓi miyaŋ ngir mevele le wãˀ muduba. Dar a slin ng'avu buy Filistihey tuwa, a ɓa taŋ: «Soko muduba so, asi Samsoŋ a njikiy ɓi miyaŋ ngir mevele le wãˀa.» Buy Filistihey tuwa, a soko ngi hay Dalila ti dala tuwa, a haŋ.

¹⁹ Dalila a ga hinje da Samsoŋ hirnga ɓa ar sar naŋ. A zilo mbur, a slaŋ himac hirnga muslupa guloɗ guloɗ tarnaˀ tuwa kuleɗ. Samsoŋ a zla hĩhĩy akẽh, gidaŋ naŋ ara bi avra.

²⁰ Dalila a zla a ɓa Samsoŋ: «Samsoŋ, Filistihey ara soko nga kiɗ ɗike.» Samsoŋ a slikiɗ tir li hinje, a ɓi ti kwacay naŋ: «I sa lih kaɓa hõyyõ, i sa cuhu.» Amma Bumbulvuŋ a cuh le kileŋ ava na, naŋ a si na ta.

²¹ Dar Filistihey a jaka, a nduzokoŋ hiriheye, a ram di nga Gaza, yo a juwaka ti celelu ngi ɓiri gaza, vah vah makaw cuw. A tikakaŋ ˀay ngi yaˀa daw ar dangaya.

²² Hirnga mihicakaŋ di tuwa, ara pus a muŋ.

Samsoŋ mupula cuwal naŋ waɗ naŋ mumuc u

²³ Ti di numuŋ ada na, buy Filistihey a cikilam, ɓa a gam mikuli da kuli taŋ Dagoŋ waɗ a gam muguzlum asi taŋ mulumam bugawla na. A zlaka dimise na: «Kuli ndra a vula ndra Samsoŋ mesene ndra le asi haŋ ndra»

²⁴ Ti mizli mapuraka Samsoŋ na, a hunumaka kuli taŋ «Kuli ndra a vula ndra Samsoŋ mesene ndra le asi haŋ ndra, mbur mingizla hirwuy ndra, yo mikiɗa mizli ndrahay sunok sunok na.»

²⁵ Taŋ muroko ar mumul tuwa na, a ɓam: «Ziloko ndra Samsoŋ ɓa a ga ndra singir neˀe.» A slinam nga zilo Samsoŋ ar dangaya, a ga taŋ gwat ngi singir daˀ a mbuŋ taŋ. A dirba nah, a ram di ng'ar wala ngi ɓamtal ngi hay ngi Dagoŋ.

²⁶ Samsoŋ a ɓa gawla maɗiɗaŋ tuwa: «Aru ti ya, ɓa i ja haŋ avu ɓamtal majaha hay ngi kuli Dagoŋ, ɓa i ginisl di ginasl.»

²⁷ Haya, a ro ɗǝŋ ɗǝŋ ti mizli ziley ati ngwasay. Buy Filistihey a roko cek cek akẽh, ziley ati ngwasay misi a hirngi haya, a gam gwat ngi mizli skat skat makir, ara singiram ar li pura Samsoŋ.

²⁸ Samsoŋ a zila Bumbulvuŋ, a ɓaŋ: «Ambuh takwa Bumbulvuŋ Buymisemuŋ ɗu, inga wuluk keŋ ar ya, yo vuliy gidaŋ wurenna tewle si. Aw Buymisemuŋ ɗu, anja i pula bol ngi hiri ɗu avu Filistiheye sar purla.»

²⁹ Samsoŋ a tutuma ɓamtal ngi wuzlahay mucuw, majahaka haya. A buca haŋ hazumo bac avu numuŋ waɗ gula bac da mekeleme ma.

³⁰ Samsoŋ a ɓi: «Anja i micam jom ati Filistiheye.» A pa haŋ da ɓamtalay tuwa mbar vu naŋ wãˀ, joˀ hay a mbizlo ng'ar buy Filistihey ati mizli misi akẽh gar. Mizli naŋ mingizla taŋ jom ati naŋ na, a funa naŋ mingizla taŋ ti naŋ misi ti siifa le.

³¹ Sukum ngi Samsoŋhoy ati mizli ngi hay cinehey gar a soko, a zuɓaka vagay naŋ. A ram di, ara dikakaŋ ar zivi ngi cine naŋ Manoa, ar wala ngi Sora ati Esetaol. Samsom a zum buy ar Israyeleye vi kukur cuw.