MIGI KIITAHAY 13 - Bible en langue guiziga

Yi ngi Samsoŋ

¹ Israyeley a gam malambaˀ le a mbuŋ Bumbulvuŋ siima, dar Bumbulvuŋ a vula taŋ asi haŋ ngi Filistihey hã vi kukur mufaɗ.

² Mbur ngi ruwuy Sora ada, a zilaka Manoa, ngir sukwi ngi Daŋ. Ngwas naŋ a yi ɗaˀ ta, i dirlay.

³ Modro ngi Bumbulvuŋ a biga vu da ngwas tuwa, a ɓaŋ: «Yi si na le ki dirlay, ki yi ɗaˀ ta, amma kisa gi hur, ki yi mangal mizile.

⁴ Zle dana, ki si mbaazla ta, gwat mawi vu gar na, ki si ta, gwat mitika le ngi zum gar na, ki zum ta wãˀ,

⁵ asi hur ɗik na, kisa yi di mangal mizile. Anta sa ɗuvakaŋ sliwiɗ avu hirnga ta, asi mangala, a sa vulaka da Buymisemuŋ zle a kwacay mumuŋ. Masa zla laha Israyeley tisi haŋ Filistihey i naŋ».

⁶ A dirba nah, ngwas a mi ngi hay, a ra ɓa zil naŋ na: «Mbur ngi Buymisemuŋ a so le avu ya, deŋ naŋ a wuɗ a bam vu ati modro ngi Buymisemuŋ, a gi zluwun da mbur. Ki so ti damaka na, yi cufuɗaŋ ta, yo a bigiy slimiɗ naŋ ta.»

⁷ A ɓiy na: «Ani kisa gi hur, kisa yi mangal mizile. Zle dana, ki si mbaazla ta, gwat mawi vu gar na, kisa ta. Gwat mitika le ngi zum gar na, ki zum ta wãˀ, asi a sa vulaka mangala da Buymisemuŋ zle a kwacay mumuŋ, hã sesẽŋ avu muc naŋ.»

⁸ Akẽh na, Manoa a tumbulo Bumbulvuŋ, a ɓaŋ: «Ambuh Bumbulvuŋ ɗu, anja mbur ngi Buymisemuŋ ka mislino di na, a mo ng'avi ndra ava ma, ɓa a dubuna ndra gwat ndra masa gaka da mangala, ti ndra miyaka le.»

⁹ Buymisemuŋ a cine mingiɓi ngi Manoa tuwa le, joˀ modro ngi Buymisemuŋ a mo ng'avi ngwas tuwa ma, naɓa ngwasa a ro ar guva, yo zil naŋ Manoa naŋ anta acikeˀe ta.

¹⁰ Ngwas a kil kutum, ara ɓa da zil naŋ, a ɓaŋ: «Pura mbur muso ti di numuŋ ng'avi ya tuwa, a bigiy vu le ma.»

¹¹ Manoa a slikiɗ kutum, a sipa ngwasa, aru ng'avi mbur tuwa, a ɓaŋ: «Ki mbur miɓa ɓi da ngwas hana na kwa?» Naŋ kwana a mbiɗaŋ di: «I ya gisiŋ.»

¹² Manoa a ɓaŋ: «Ani mingiɓi ɗik a sa gi gisiŋ, na gwat ndra masa gam vur mangal i mike? Jiviɗ ngi sipi vur mangala i wanaka.»

¹³ Modro ngi Bumbulvuŋ a ɓa Manoa na: «Gwat ya muslufa taŋ da ngwas hana, anja a duko taŋ ta.

¹⁴ Gwat magaka ti yi ngi gudubun gar na, anja a zuma ta, ko anja a si mbaazla ta, gwat mawi vu gar na, anja a sa ta. Gwat mitika le ngi zum gar na, a zum ta wãˀ. Ɓi ya miɓaŋ taŋ ɗaˀle gar na, anja a sipa taŋ kuy kuy.»

¹⁵ Manoa a ɓa Modro ngi Bumbulvuŋ tuwa: «Inga pula ndra jiviɗ ɓa i tikukuw, i ra dukuw useˀ ngi zuŋ ˀaw minjaslsla so»,

¹⁶ Modro ngi Bumbulvuŋ tuwa, a mbiɗaŋ di: «Ko da ki tikiy le kwana, y'anta sa zum ɗaf ɗike ta. Amma da ki wuɗ gi mikuli mizlam zlam le da Bumbulvuŋ na, ga ɓula».

¹⁷ Manoa a ɓa modro ngi Bumbulvuŋ: «Slimiɗ ɗike mbrike, asi da mingiɓi ɗik misa gi le muduba na, i sa ɗuvukuw hirnga?»

¹⁸ Modro ngi Bumbulvuŋ a mbiɗaŋ di: «Ki cufuɗa slimiɗ ɗu ngi mike? Slimiɗ ɗu anta sli wala ta.»

¹⁹ Manoa a ji zuŋ ˀaw minjaslsla waɗ gwat ngi vul, a gi taŋ mikuli taˀ a muwã, da Bumbulvuŋ maga slra misi mbur a sla wala naŋ gu ta tuwa, Manoa ati ngwas naŋ, a roko hiri taˀ avu mikuli.

²⁰ Irne ngi vu a jiɗ bilim bilim tir li gi mikuli nga muŋ. Modro ngi Bumbulvuŋ tuwa, a jiɗ asi irne ngi vu mibilim bilim nga muŋ, ar li gi mikuli tuwa ya. Manoa ati ngwas naŋ mupuraka keɗ na, a hurukom huruk huruk a ruwuy.

²¹ I modro ngi Bumbulvuŋ na, Manoa a sla wala naŋ le muduba, ko modro ngi Bumbulvuŋ a biga vu da manowa ati ngwas naŋ mata.

²² Manoa a ɓa ngwas naŋ: «Ko mbri na, i sa micam, asi i puraka Buymisemuŋ le.»

²³ Amma ngwas naŋ ɓaŋ: «Da Bumbulvuŋ a wuɗ di i muc ndra na, anja a tiɓa mikuli ndra mizlam zlam ati gwat ngi vul ndra na ta, anja zleˀe a biga ndra gwat tayna gar ta, yo a ɓa ndra ɓihey na ta.»

²⁴ Ngwas ngi Manoa a yi mangal mizile, a zila Samsoŋ. Mangal ara gil, yo Bumbulvuŋ a ɗuwulaŋ mi.

²⁵ Ti di numuŋ ada na, Samsoŋ naŋ ar walahay guɗuk ngi Daŋ, ar wala ngi Sora ati Esetaˀol, ˀUf ngi Bumbulvuŋ mihizigiɗaŋ, ɓa a gi gwat sar mudumbuŋ na a diga.