MIGI KIITAHAY 12 - Bible en langue guiziga

Kiɗavu ngi Zefte ati Efrayimey

¹ Mizli Efrayimey a kusom, a tuwuɗaka mizaw Zurdeŋ, a ram nga Safoŋ. A ɓaka Zefte na: «Ki tuwuɗa maakway ngi Amoŋhoyo, ɓa ki ra gam vurum ati taŋ na, ki zila ndra ɓa i ram bumaˀ ta vur mike? I sa wuraka hay ɗike jom ti ka araŋ.»

² Zefte mbiɗa taŋ di: «Mi memeɗe a ci le haɗa ar wala ndra ati ziri Amoŋhoyo. I zulukum na, ki kiloko widi ɗu ta.

³ I pura keɗ keɗ na, kum anta ki soko nga lih ɗu ta, dar i ɗuva dibiɗe taˀ da mucu, i tuwuɗa maakway ngi Amoŋhoyo, akẽh Bumbulvuŋ a vuliy taŋ asi haŋ ɗu. Na wurenna ki soko ngi gi vurum ati ya na, vur mike?»

⁴ Dar Zefte a cikila mizli Galaˀataya cek, a gam vurum ati Efrayimey. Galaˀatay a kiɗaka Efrayimey le gu. Naŋ kine, mizli Efrayimeye a ɓam zleˀe na: «Kum mizli Galaˀataya, kum i is ngi mizli mikilam ti Efrayimey ti kil, ki kilam baɗ ar sukwi ngi Efrayime ng'ar sukwi ngi Manase.»

⁵ A dirba nah, li tuwuɗ ngi mizaw Zurdeŋhey ngir ti Efrayim gar na, mizli Galaˀatay a tikaka taŋ mbes mbes. Da mbur mikila ngi Efrayime, a ndilo le a mi mizawa, a ɓi le: «Pulikiy i tuwuɗ» na, mizli Galaˀatay a ɓakaŋ: «Ki mbur Efrayim kwa?» Da a ɓi le «aˀa» na,

⁶ Galaˀatay a ɓakaŋ: «naŋ kuy! Na zila Sibolet.» Mbur Efrayime a zila kanah gu ta, a zila nga naŋ: «Cibolet.» Akẽh so na, a jaka, a slakaˀay naŋ gweˀ avu li tuwuɗoy a mizaw Zurdeŋ. Ti nah na, a kiɗam mizli Efrayimey durmuk kukur mufaɗ nga cuw.

⁷ Zefte mbur Galaˀata, a ga kiita da Israyeleye hã vi merkeɗ, a dirba nah, a mucu, a dikaka daˀ ar walahay naŋ Mispa ngi Galaˀat vuna.

Migi kiita mekelemey: Ibisaŋ, Eloŋ waɗ Abudoŋ

⁸ A dirba Zefte, mici ar li naŋ ngi ga kiita da Israyeleye i Ibisaŋ mbur Betelyem.

⁹ Ibisaŋ naŋ ti ziri mizilehey kukur makir waɗ mongosohoy kukur makir ma. A vula ziri mongoso naŋhay da mizli ngi sukwi mekelem ɓa a ɗuv taŋ, yo a ɗuva da ziri naŋ mizileheye kwana, i ziri ngi vrahay aya ya. A ga kiita da Israyele hã vi tarnaˀ.

¹⁰ Ibisaŋ a muc, a dikakaŋ a Betelyem.

¹¹ A dirba Eloŋ mbur Zabuloŋ, mici ar li naŋ ngi ga kiita da Israyeleye, a ga kiita da Israyeleye hã vi kuruˀu.

¹² Eloŋ mbur Zabuloŋ tuwa, a mucu, a dikaka daˀ a Eloŋ hirwuy Zabuloŋ vuna si.

¹³ A dirba Eloŋ, i Abudoŋ mangal ngi Hilel, mbur Piratoŋ miga kiita da Israyeleye.

¹⁴ Mijiɗa zunguhoy a hay Abudoŋ kukur tarnaˀ, asi ziri naŋ mizileheye kukur mufaɗ, yo asi dideˀ naŋhay kukur makir. Abudoŋ a ga kiita da Israyele hã vi dangafaɗ.

¹⁵ A dirba nah, Abudoŋ mangal ngi Hilele, mbur Piratoŋ, a mucu, a dikaka a Piratoŋ, hirwuy Efrayim, ar muwã Amalek