MIGI KIITAHAY 11 - Bible en langue guiziga

Zefte micifi buy Israyel.

¹ Zefte mbur Galaˀat, mbur miwirwir ar vurumo, i mangal ngi ngwas sulome, a ya ka ti mbur mazilaka Galaˀat.

² Meketeŋ ngi Galaˀat vuna, a yaŋ ziri mizilehey le ya, yo ziri ngi meketeŋhey migilam muduba na, a ɓulaka Zefte avra, a ɓakaŋ: «Ki zuŋ ngi mumuŋ ndra ta, k'anta kusa lum gwat ngi zumahay ngi cine ndra ko neˀ ta.»

³ Zefte a kil kileŋ avu sukum naŋhaya, ara cifi kini tir vay Top. Mizli kesefey a jumom ng'avi Zefte, a jiginam mi avu mizli bumaˀ.

⁴ A zikam neˀ na, mizli Amoŋhoy a gam vurum ati Israyeley.

⁵ Ti Amoŋhoy mizlaka taŋ ngi kiɗa vu so na, mizli micawwa ngi Galaˀatay, ara supoko Zefte a hirwuy Topo.

⁶ A ɓakaŋ na: «Sawa, cifi madiɗa ngi soje ndrahay, ɓa i kiɗaka Amoŋhoy na.»

⁷ Zefte a ɓa mizli micawwa ngi Galaˀataya na: «Mihirsikiy, muɓuloko ya ti hay baha na, i kumo ta kwa? Na bonoy a lumukum le so na, ki soko ng'avi ya mbri mbri maka?»

⁸ Mizli micawwa ngi Galaˀatay, a ɓaka Zefte: «Ndra mumoko wurenna ng'avi ka na, ɓa ki ru, i ra kiɗaka Amoŋhoyo, ɓa ki cifi buy ndra, waɗ buy ngi Galaˀatay keɗeɗe.»

⁹ Zefte a ɓa micawwa ngi Galaˀataya: «Da ki zilikiy nga kiɗa Amoŋhoy, da Bumbulvuŋ a vuliy taŋ le asi haŋ ɗu na, yi sa cifi buy kumo.»

¹⁰ Micawwa ngi Galaˀatay a mbiɗakaŋ di: «Da i gaka kaɓa ndra miɓaka na ta na, Bumbulvuŋ i sedewo ndra.»

¹¹ Akẽh na, Zefte aru asi mizli micawwa ngi Galaˀatay tuwa so. A vulakaŋ buy, yo madiɗa ngi sojehey ma. Zefte a mahiri ngi ɓi hana cek a mbuŋ Bumbulvuŋ a Mispa.

Mingiɓi ngi Zefte da Amoŋhoy

¹² Zefte a slin mizli ng'avu buy ngi Amoŋhoy, ɓa a ɓakaŋ na: «Mizlira ndra ati ka i mi, ɓa ki so gi vurum ati ruwuy ɗu naka?»

¹³ Buy ngi Amoŋhoy a ɓa mijiviɗ ngi Zeftehey tuwa: «Ti Israyeley maboko ti si ruwuy Ezipte na, a tiɓaka hirwuy ɗu, zle ar sozo ngi Arnoŋ hã sesẽŋ a ˀay didik ngi Yabok waɗ sozo ngi Zurdeŋ. Mo ndra di wurenna ti leleŋ so.»

¹⁴ Zefte tuwa, a slin mizli ng'avu buy Amoŋhoy tuwa siy ma ni,

¹⁵ ɓa ara ɓakaŋ: «Zefte a ɓi na: ko Israyeley a tiɓam hirwuy Moˀapa ta, hirwuy ngi Amoŋhoyo ta ma.

¹⁶ Naŋ kine ti taŋ maboko ti ruwuy Ezipte na, a zuɓam jiviɗ ngi wuzlaɓuh mikirɗak kirɗak, hã sesẽŋ a mi mubuliy lavaɗa, a ndilam a Kades.

¹⁷ Israyeley a slinam mizli baɗ a diga ng'avu buy Edom, ɓa a ɓakaŋ na: ‹Pula ndra jiviɗ i bam ng'ar hirwuy ɗike.› Amma buy Edom a ngum ta. A slinam ng'avu buy Moˀapa ma, a ngum ta ma, a ndiram a Kades.

¹⁸ A dirba nah, a zuɓam jiviɗ ngi wuzlaɓuh mikirɗak kirɗak tuwa amuŋ. A taka ruwuy Edom ati Moˀapa teˀe, a ndilam tisi pas ngi miprik ngi ruwuy Moˀap. A ɗiyaka guɗuk taŋhay ti duba Arnoŋ, ko a cam nga ruwuy Moˀapa ta, asi Arnoŋ i maakway ngi Moˀap vuna.

¹⁹ Israyeley a slinam mizli baɗ a diga ng'avi Sihoŋ, buy ngi Amoŋhoy miwa Heseboŋ, a ɓakaŋ na: ‹Pula ndra jiviɗ, ɓa i ngiraka hirwuy ɗike hã ar li pisar ndra.›

²⁰ Amma, Sihoŋ a ngum ta. A cikila mizli naŋhay gar, ara ndaham a Yahas, a kiɗam vu ati Israyeleye.

²¹ Bumbulvuŋ Buymisemuŋ ngi Israyele, a vula taŋ Sihoŋ ati mizli naŋhay cek asi haŋ taŋ, a kiɗa taŋ. Akẽh na, Israyel a tiɓa hirwuy ngi Amoŋhoy misi anga cek.

²² A tiɓaka hirwuy ngi Amoŋhoy cek, zle ar sozo ngi Arnoŋ hã sesẽŋ a ˀay didik ngi Yabok, zle a wuzlaɓuh mikirɗak kirɗak hã sesẽŋ a mizaw Zurdeŋ.

²³ Na a dirba Bumbulvuŋ Buymisemuŋ ngi Israyel muɓula Amoŋhoy a mbuŋ sukwi naŋ Israyel tuwa, wurenna ka ki wuɗ ɓa ki ɓula taŋ ya mbri maka?

²⁴ Hirwuy kuli ɗik Kemos muvuluw di na, naŋ da takwa? Na gwat Bumbulvuŋ Buymisemuŋ ndra muvula ndra di le da ndra gar na, a ndir da ndra ta vur mike?

²⁵ Na wurenna, ki wa vu ɗike fineˀ Balak mangal ngi Sipor, buy ngi Moˀap na sukwani? Na Balak vuna a jigin mi le avu Israyele, ɓa hã a gam vurum kwa?

²⁶ Ti Israyeley micifam zleˀe a Heseboŋ ati Aroˀer waɗ prok taŋhay, ar walahay ngi ciki Arnoŋhoy gar na, vi t'ani skata. Na ki tiɓa hirwuyo ti nah na zleˀe ta vur mike?

²⁷ Yi pura avu ya na, i guw malambaˀ da ka ta, amma i ka magiy malambaˀa, asi ki ra wuɗ gi vurum ati ya. Anja Bumbulvuŋ migi kiita da mizli, a ga kiita dana da Israyeley ati Amoŋhoy.»

²⁸ Amma ko buy ngi Amoŋhoy, a cine mingiɓi ngi Zefte miɓaŋ di na ta.

Zefte muvula zuŋ naŋ ngi gi mikuli

²⁹ ˀUf ngi Bumbulvuŋ a ci avu Zefte. A bula ruwuy vay Galaˀat ati Manase, aru nga Mispa ngi Galaˀat, ɓa ara tuwuɗa maakway ngi Amoŋhoy.

³⁰ Zefte a hudum a mbuŋ Bumbulvuŋ, a ɓi: «Da ki vuliy Amoŋhoy na le asi haŋ ɗu gisiŋ na,

³¹ ti ya masa mo tir vurumo, mbur masa bo dumbuŋ ti hay ɗu, nga ji ti ya hirnga na, mbur nah i ngi Bumbulvuŋ, i sa gi di mikuli mizlam zlam wãˀ.»

³² Zefte a tuwuɗa maakway ngi Amoŋhoy nga gi vurum ati taŋ, Bumbulvuŋ a vulaŋ taŋ asi haŋ naŋ.

³³ a kiɗa taŋ zle a Aroˀer hã sesẽŋ gweˀ avu Mimit ati Abel-Keramim, a tiɓi walahay kukur cuw. Mizli Amoŋhoy a hĩhĩyam haɗi. Akẽh Amoŋhoy a hinam hirnga a mbuŋ Israyele.

³⁴ Ti zefte mamo ngi hay naŋ a Mispa so na, i zuŋ naŋ mubo nga ji di hirnga, ara kiɗ jãwjãw, ara ɓuruk aseˀe. Zuŋ naŋ kpesl purla i naŋ, ko mizile, ko mongoso mekelem anta.

³⁵ Zefte mupura keɗ na, a ngira zana naŋhaya, a ɓi: «Aw zuŋ ɗu! Ki zuɓiy mendere le, mawuɗ a lumiy mendere na i ka vuna si. Yi lih mi le haɗi a mbuŋ Bumbulvuŋ si, i mo ti mi gu mata.»

³⁶ Amma zuŋ naŋ tuwa, a ɓaŋ: «Baha, ki lih mi le haɗi a mbuŋ Bumbulvuŋ, na ka gi ti ya ka ka miɓa vuna si, asi Bumbulvuŋ a pula bol ɗike le avu mesene ɗik Amoŋhoyo.»

³⁷ Dar a ɓa cine tuwa ma: Vuliy kiya pal, i sa ram nga hirnga muwã ati cil ɗuwoy, i ra kuɗuma tuwuy, asi ya ma ra muc pam manja ɗuva zil na.»

³⁸ Zefte a ɓaŋ: ‹Aru›, a pulaŋ jiviɗ ɓa aru ngi kiya cuw. A cohom nga hirnga muwã ati cil naŋhaya, a kuɗma tuwuy a diga vur naŋ ma ra muc pam manja duva zil na.

³⁹ Kiya cuw migi muduba na, a mo ngi hay cine. Dar cine a ja mi ngi hudum naŋ ti zuŋ naŋ tuwa. Naɓa zuŋ a sin zile t'aruŋ. Dar Israyel a tiram di i sirik taŋ zle tapasa.

⁴⁰ Vur vi gar na, ngwas Israyeley a ram ndol le nga muwã ngi hin mufaɗ nga tuwa zuŋ ngi Zefte mbur Galaˀata.