MIGI KIITAHAY 10 - Bible en langue guiziga

Mizli mekelem migi kiitahay: Tola ati Yaˀir

¹ A dirba Abimelek mumuc na, Tola mangal ngi Puwa, dideˀ ngi Dodo, i muy ngi Isakar, hay naŋ a Samir, a muwã Efrayim, a so laha Israyele.

² A zum buy angi Israyele vi kukur cuw nga makir, a muc, a dikaka a Samir.

³ A dirba nah, Yaˀir mbur Galaˀat, a ci ar li naŋ, a zum buy angi Israyele vi kukur cuw nga cuw.

⁴ Yaˀire, ziri naŋ mizileheye, taŋ kukur makir, a jiɗam zungu kukur makir taŋ, yo walahay taŋhaya kukur makir ma, hã wurenna, a zilaka walahay tayna, walahay ngi Yaˀirey.

⁵ Yaˀir a muc, a dikaka a Kamoŋ.

Mizli Amoŋhoy mizlaka Israyeley ngi kiɗa vu.

⁶ Mizli Israyeley a zlaka gi malambaˀ a mbuŋ Bumbulvuŋ sima. A huruk hurukam a mbuŋ Baˀal ati Astarte, waɗ a mbuŋ kuli ngi mizli Aramay, ngi Sidoŋhoy, ngi Moˀapay, kuli ngi Amoŋhoy, waɗ a mbuŋ kuli ngi mizli Filistihey. A pulaka Bumbulvuŋ mbak, a gam gawla naŋ mata.

⁷ Bumbulvuŋ, a slikiɗ mevel fõh fõh ng'ar Israyeleye, a vula taŋ asi haŋ ngi Filistihey ati Amoŋhoy,

⁸ Zle ti nana, Amorihey ati Galaˀatay, ara gaka taŋ bonoy, ara guzuvuraka taŋ, hã vi kuruˀ.

⁹ Mizli Amorihey, a tuwuɗaka mizaw Zurdeŋ, nga gi vurum ati sukwi ngi Zuda, ngi Benjameŋ, waɗ ngi Efrayim. Hã Israyeley a cam ar bonoy madiɗaŋ.

¹⁰ Akẽh na, Israyeley, a tilam mi da Bumbulvuŋ a ɓakaŋ: «I gam malambaˀ le avu ka, asi i pulukuw ka Buymisemuŋ ndra fuk, i ra huruk hurukam a mbuŋ kuli Baˀalay.»

¹¹ Bumbulvuŋ a mbiɗa da Israyeleye: «Ti Eziptehey, Amorihey, Amoŋhoy, Filistihey,

¹² Sidoŋhoy, Amalekey ati Maˀoŋhey mugukum bonoy na, ki tilikiy mi, i luhukum tisi haŋ taŋ ta kwa?

¹³ Amma kumo, ki pulikiy fuk, joˀ ki gam gawla ngi kulihey. Vurˀe, y'anta mahiri ngi lih kumo mata.

¹⁴ A ram! kum ara tilam mi da kulihey kum muwunaka taŋ na si. Anja i taŋ makiloko widi ngi bonoy kum madiɗa vuna!»

¹⁵ Israyeley a ɓaka Bumbulvuŋ: «Aw Bumbulvuŋ ɗu! I gam mungra le, gi ti ndra kaɓa ka mawuɗo, amma laha ndra dana ma si!»

¹⁶ Dar a kursaka kulihey misi zleˀe avu taŋ na, a huruk hurukam a mbuŋ Bumbulvuŋ muduba. Na Bumbulvuŋ a ɓusa bonoy Israyeley masaka na gu ta.

¹⁷ Mizli Amoŋhoy a cikilam, a ndaham ndah ndah tir vay Galaˀat. Israyeley kwana, a cikilam, a ndaham a Mispa.

¹⁸ Mizli Galaˀatay ati buy taŋhay, a ɓam ar wala taŋ: «Mara zla kiɗa vu dumbuŋ ati Amoŋhoy i waka? Mbur mizla le na, masa cifi buy ngi Galaˀatay gar i naŋ.»