Mark 6 - Bible en langue guiziga

Nazaretey mitiɓaka Yesu ta

¹ Ti Yesu mibi ti kẽh na, aru nga hirwuy naŋ migil angaŋ. Joˀ mizli ngi seˀehey a sipakaŋ.

² Ngi pas sabat na, a zla dubuna gwat da mizli ar hay ngi diradibiɗi. Micin naŋhaya, taŋ haɗi, a ga taŋ welele, a ɓam: «A lumo ɓi hana vuna amaka? A vulakaŋ sinmijileŋ wana hana maka? Hã cekenehey kwana, ara gam a haŋ naŋ!

³ I micira dum tuwa ta kwa? Mangal ngi Mariya ta kwa? Sukum ngi Zak ati Zozes, Yudas waɗ Simoŋ ta kwa? Sukum naŋ mongosohoyo, t'ada a wuzla ndra ka ta kwa?» Wuluk tayna gar, a tika taŋ le ɓa a tiɓakaŋ ta.

⁴ Dar Yesu a ɓa taŋ: «A hirsaka mijiviɗe na, sey angi hirwuy naŋ migil anga, a wuzla muy naŋhay ati mizli ngi hay taŋhay si.»

⁵ Naŋ kine, ko Yesu a gi cekene purla le a diga ta, sey naŋ mumbul misi jijihey neˀ tewle, ti naŋ mubuca haŋ ar taŋ.

⁶ Taŋ mitiɓakaŋ ta na, a zuma hirnga le da Yesu. Dar Yesu a bula prok ngi hirwuy nah gar, bal ti dubuna gwat da mizli.

Yesu mislina mizli ngi seˀehey mukuruˀ nga cuw

⁷ A zila mizli ngi seˀehey mukuruˀ nga cuwo, a zla a slina taŋ cuw cuw. A vula taŋ gidaŋ, ɓa a waka setene mihirya vuhoyo.

⁸ A ɓa taŋ: «Anja ki zuɓam gwat a haŋ ngi zuɓa jiviɗe ta, sey ganday tewle. Gwat ngi zum ta, gabal ta, dala ar jiiba ta.

⁹ Amma cam tarak mapiya piyahay, ki kam zana cuw cuw ta.»

¹⁰ A ɓa taŋ: «Da kum mindilam le ar li numuŋ, kum micam le a hay mbur na, ndiram anga, hã kum masa pulaka li nah.

¹¹ Ar li mekeleme, da mizli a tuɓukum ta, yo da t'anta cinaka mingiɓi kumo ta na, ti kum masa bam ti kẽh na, tukoko lagwada ngi vi sar kumoyo: a sa gi i sedewo avu taŋ.»

¹² Dar mizli ngi seˀehey a ram, a tilam mi ti Ɓimezle da mizli, ɓa a mbiɗaka mevel taŋhaya.

¹³ A ɓulam setenehey haɗi, a pam mal a hirnga misi jijihey haɗi, a mbuloko taŋ.

Muc ngi Zaŋ mici mizli ar yam

¹⁴ Herod, buy madiɗa, a cine maɓaka ɓi ngi Yesu na le, asi slimiɗ ngi Yesu ara zil haɗi. A ɓam: «Zaŋ mici mizli ar yama, a slikiɗ le ti wuzla mumucahaya, naŋ misi ti gidaŋ ngi gi cekenehey na, vurˀeŋ.»

¹⁵ Mizli mekelemey a ɓam: «I Eli.» Numuŋhoy a ɓam ma: «I mijiviɗ mubam vu ati mijiviɗ purla asi mijiviɗ ndrahay zleˀe.»

¹⁶ Herod micina ɓi nah na, a ɓi: «I Zaŋ, ya mubuko hirnga naŋ na, mislikiɗ i naŋ.»

¹⁷ Asi mike na, Herod a ɓa mizli, a jaka Zaŋ le zleˀe, a juwaka le ar dangay asi Herodiyad. I gwas ngi sukum naŋ Filip ngbaŋ, na Herod a ɗuva le.

¹⁸ Asi Zaŋ a ɓa Herodo na: «Ɓa ki zuɓa ngwas ngi sukum ɗike da ka na, jiviɗ naŋ anta.»

¹⁹ Herodiya kwana, ara gi mesene ti Zaŋ, a wuɗ kiɗ naŋ vagay, amma a luuma jiviɗ nah gu ta.

²⁰ Asi Herod a zluwun ti Zaŋ, asi a si na le, Zaŋ i mbur mijeŋŋe, yo naŋ pal. A jiniˀis asi Zaŋ. Naŋ micina mingiɓi ngi Zaŋ cin cin na, a gaŋ welele teˀe, amma a wuɗ cin naŋ vuna ngbaŋ.

²¹ Amma hin mizlir kuy wãˀ, a ndilo le. Tapasa Herod a gi muguzlum ngi yi naŋ, a gi gwat ngi zum haɗi da mizli madiɗa ngisi hirwuy naŋhay, madiɗa ngi sojehey ati mizli micawwa ngi Galilehey gar.

²² Zuŋ diili ngi Herodiyad tuwa, a sawa, a ga ɓuruk. Herod a hĩyã le waɗ mizli naŋ muzulo taŋ gara ma. Dar buy a ɓa zuŋ diili tuwa: «Cufuɗ gwat ka muwuɗ le avu ya gar, yi sa vuluw di.»

²³ Joˀ a hudum, a ɓaŋ: «Gwat ka masa cufuɗ avu ya gar na, i sa vuluw di, ko ki wuɗ reta ngi Zumabuy ɗu kwana, i sa vuluw di.»

²⁴ Dar zuŋ tuwa a bi, ara cufuɗa mumuŋ: «Yi ra cufuɗ mike?» Mumuŋ a mbiɗaŋ di: «Cufuɗ hirnga ngi Zaŋ mici mizli ar yam.»

²⁵ Zuŋ diili tuwa, a wus vu ng'avu buyo, a cufuɗaŋ: «Yi wuɗ ɓa ki vuliy hirnga ngi Zaŋ mici mizli ar yama wurenna, ɓaˀ ar taasa aka.»

²⁶ Buy a nduruɗ hiri haɗi, amma a sli himaˀ gu mata, asi naŋ muhudum a mbuŋ mizli naŋ muzulo taŋ tuwa.

²⁷ Buy a slin soje kutum si, a ɓaŋ ɓa ra saŋ ti hirnga ngi Zaŋ. Soje ara buko hirnga ngi Zaŋ ar dangaya.

²⁸ A so di ɓaˀ ar taasa, a vula da zuŋ diili tuwa. Joˀ zuŋ diili kwana, aru di, a vula da mumuŋ naŋ.

²⁹ Mizli ngisi Zaŋhay micinaka ɓi nah na, a soko, a zuɓaka vagay naŋ, ara kaka ar vigiɗi.

Yesu mimba mizli durmuk zlum

³⁰ Mislinay tuwa a moko, a kusom avu Yesu, a slufakaŋ ɓi ngi gwat taŋ migaka ati gwat taŋ mudubunaka da mizli gar.

³¹ Yesu a ɓa taŋ: «Kumo, soko silaŋ pal kum nga ɓuh, ɓa ki muskam vu neˀe.» Asi zigiduw haɗa, ara mam, ara soko, hã ti Yesu ati mizli ngi seˀeheye, a lumam haŋ ngi zuma gwata mata.

³² Dar a cam palalam, a ram silaŋ pal taŋ nga ɓuh.

³³ Amma taŋ mawuɗ a ram kileŋ na, mizli a sinaka le, dar mizli a kilam ti sar tir walahayay gar, a ndilam a diga dumbuŋ ar taŋ.

³⁴ Yesu mabo tir palalama, keɗ na, zigiduw sikiniy. ˀIrcece a gaŋ haɗi ti taŋ, asi taŋ kaɓa tumuŋ manja mijiginey. Dar a zla, a dubuna taŋ gwatay haɗi.

³⁵ Hiikuɗ a ji le si, mizli ngisi Yesuhoy a kirohoko ng'avi Yesu, a ɓakaŋ: «Ani hiikuɗ a ji le si, yo hana i ɓuh.

³⁶ Waha mizli ɓa a ram ng'ar prokoy ati walahay migweˀ gweˀhey na, ɓa ara hiɗikam gwat ngi zum.»

³⁷ Amma naŋ a mbiɗa taŋ di: «Kum vuna, vulaka taŋ gwat ngi zum vuna sini!» Taŋ a ɓakaŋ: «Ki wuɗ i ra hiɗikoko ɗaf ngi gabal skat cuw, i vulaka taŋ di ngi zumo kwa?»

³⁸ Yesu a ɓa taŋ: «Kum ti ɗaf kite ka? Ara purakaŋ.» Taŋ mupuraka na, a ɓakaŋ: «Peŋ zlum, waɗ kilif cuw.»

³⁹ Dar a ɓa taŋ ɓa a cifaka mizli ndac ndac ar giziŋ mutukuzo.

⁴⁰ A cifam ti jobbol, mizli skat skat, yo kukur zlum kukur zlum.

⁴¹ Dar Yesu a hila ɗaf muzlum ati kilif cuw tuwa, a zuɓa hiri nga muŋ, a ɗuwul mi, a ngila ɗafahay tuwa, a vula taŋ da mizli ngi seˀeheye, ɓa a vulaka da mizli, yo a wunka kilif mucuw tuwa da mizli gara ma.

⁴² Taŋ gar a zumam hã a mbam.

⁴³ Joˀ a cikilaka is ngi ɗaf ati kilif mubulngus bulngusoyo, gadagar caɓ caɓ kuruˀ nga cuw.

⁴⁴ Mizli muzumama, ziley a gam gwat ngi durmuk zlum.

Yesu muru ti sar a hirnga yam

⁴⁵ Neˀ a dirba Yesu muwaha zigiduwo na, a tikaˀay da mizli ngi seˀeheye, ɓa a cam palalam, a cohom dumbuŋ angi naŋ nga dubazaw a Betsayda.

⁴⁶ A dirba naŋ muɓula taŋ na, naŋ, aru nga muwã ɓa a dirdibiɗi.

⁴⁷ Hiikuɗ miji na, naɓa palalama naŋ a wuzla yam, misi a ruwuyo, i naŋ pal naŋ.

⁴⁸ A pura taŋ na, ara kiɗam vu ngi ru ti palalama, himiɗe jik angi taŋ. Ng'avi miprik na, a so ng'avi taŋ ti sar njiraŋ njiraŋ a hirnga yama, hã a wuɗo pula taŋ a dirba.

⁴⁹ Ti taŋ mupuraka naŋ maru ti sar a hirnga yama na, a waka kaɓa i musuɗuk ngi mbur mumuca, dar a zlaka widi cǝruw cǝruw.

⁵⁰ Asi taŋ gar a puraka le, a muɗa taŋ didak le haɗa. Amma Yesu a ɓa taŋ kutum: «Tusom didak! Ki zluwunam ta, i ya!»

⁵¹ A ci ng'avi taŋ a hur palalama, himiɗ a cici kiŋ. A zuma hirnga le da mizli ngi seˀeheye haɗi.

⁵² Asi mike na, a slaka wala ngi cekene ngi ɗaf na ta, hirnga taŋ gidaŋ.

Yesu mumbul misi jijihey tir vay Zenezarete

⁵³ A dirba taŋ mutuwuɗama, a ndilam ar hirwuy Zenezaret.

⁵⁴ Taŋ muboko put si na, mizli a sinaka Yesu le si.

⁵⁵ Mizli micinam le, Yesu naŋ aka gar na, a bulaka hirwuyo gar, a zuɓoko misi jijiheye ti cacalahay.

⁵⁶ Li naŋ mici le anga gar, angi walahay ati walahay madiɗahay waɗ prokoy gar na, a soko ti misi jiji taŋhaya ng'ar li ngi luuma, a tumbuloko Yesu, ɓa a pula misi jijihey a wusaka mi ngi zana naŋ si. Muwus naŋhay gar na, a mbulom le.