Mark 15 - Bible en langue guiziga

Yesu a mbuŋ Pilat

¹ Ngi miprik prik na, masay madiɗahay a kusom ati mizli micawwahay, yo buy ngi ɓimujuwahay waɗ mizli ngir kus taŋ madiɗa ngi mingila wuyoy gar. A juwaka Yesu, a ram di, a vulaka da Pilat.

² Pilat a cufuɗaŋ: «Ki buy ngi Yudehey kwa?» Yesu a mbiɗaŋ di: «Ki ɓa le ta kwa.»

³ Masay madiɗahay a soko, a kupakaŋ ɓi haɗi.

⁴ Pilat a cufuɗaŋ ma: «Ki mbiɗa ta kwa? Cin, taŋ makupukuw ɓihey haɗa na, ki mbiɗa ta kwa?»

⁵ Amma ko Yesu a mbiɗa neˀ mata, hã a zuma hirnga da Pilata.

Migaka kiita ngi muc da Yesu

⁶ Angi muguzlum Pak migi le gar na, Pilat ada pula taŋ mbur dangay mbak le, mbur taŋ mawuɗam.

⁷ Ti di nah na, mbur ada, a zilaka Barabas. Naŋ ar dangay ati mizli mislikiɗa ɓihey, ti taŋ mislikiɗam ɓi na, a kiɗam mbur le vagay.

⁸ Mizli a jiɗam ng'avi Pilat a hay naŋ, a zlaka a cufuɗakaŋ, ɓa a ga kaɓa naŋ misirik di zleˀe.

⁹ Pilat a mbiɗa taŋ di: «Ki wuɗam ɓa yi pulukum Buy ngi Yudehey na kwa?»

¹⁰ Asi a si na le kuy kuy, masay madiɗahay a vulakaŋ di ti suloŋ.

¹¹ Amma masay madiɗahay a paka mi da zigiduwo, ɓa a cufuɗam, a pula taŋ Barabas zuwen.

¹² Pilat a zla, a ɓa taŋ: «Ki wuɗam ɓa yi gi mi ti mbur kum mazilaka Buy ngi Yudehey na ka?»

¹³ A tilam mi, a ɓam ma: «Dira avu dum mizliraŋ!»

¹⁴ Pilat a ɓa taŋ: «A gi gwat malambaˀ wanaka?» Amma a tilam mi ti gidaŋ fineˀ mizli ma: «Dira avu dum mizliraŋ!»

¹⁵ Pilat a wuɗ ɓa a gi gwat ngi cira hiri da zigiduwo, a pula taŋ Barabasa, dar a vula Yesu ɓa a sliɗakaŋ, a dirba nah, ɓa a diraka avu dum mizliraŋ.

Sojehey misingiram ar Yesu

¹⁶ Sojehey a ram ti Yesu nga wazlaray Pilat, ar li gi kiita, a zilaka sojeheye gar.

¹⁷ A kakaŋ zana gagaza, a fuɗam loppol ngi hadaw, a cakaŋ di a hirnga.

¹⁸ Dar a zlaka a jakaŋ salalay, a ɓakaŋ: «Zuy zuy aya, Buy ngi Yudehey!»

¹⁹ A kiɗakaŋ a hirnga ti lavaɗ, a tufakaŋ tazlay, a dilkam, a hurkom a mbuŋ naŋ.

²⁰ A dirba taŋ misingiram anga na, a cukokoŋ zana gagaza tuwa avra, a kakaŋ zana naŋhay a muŋ. Joˀ a bam di ɓa ara diraka avu dum mizliraŋ.

Midiraka Yesu avu dum mizliraŋ

²¹ Mbur ngi hirwuy Sirene ada, a zilaka Simoŋ, i cine ngi Aleksaŋdir ati Rufus. A mo ti ɓuh, ara cuh baɗ ti kẽh. A tikakaŋˀay, ɓa a zuɓa dum mizlira ngi Yesu ɓa a jijiraŋ.

²² Joˀ a ram ti Yesu ng'ar li mazilaka Golgota, mbiɗeˀvra: guduguzluŋ hirnga.

²³ A wuɗam ɓa a vulakaŋ mbaazla milihiɗa ti gwat miɗalak, ɓa a saŋ, amma Yesu a ngum si naŋ ta.

²⁴ A diraka avu dum, a kiɗam caca ngi wuɗka zana naŋhaya, ɓa a sinaka, mbur gar a sa lum wanaka na.

²⁵ Taŋ midraka na, naɓa i pas ngi vula yam da pilisi.

²⁶ Ɓi taŋ migakaŋ kiita ngi muc aseˀe vuna, a tohoko toh toh ar dum misliprak, a tohoko na: «I buy ngi Yudehey» kini.

²⁷ A diram mufuyvuhoy le cuw avu dum aciki Yesu ma. Pal tir vay hazum naŋ, yo pal tir vay gula naŋ.

²⁸ Mingiɓi ngir Ɓimutoho a gi le kahana, a ɓi na: «A slufakaŋ a wuzla mufuyvuhoy.»

²⁹ Mizli macohom ti kẽh, a hizigiɗam hirnga, a zakaŋ, a ɓakaŋ: «Hey, ka mambuzla hay ngi Bumbulvuŋ, ɓa ki ndira hiri naŋ a muŋ, angi hin makir tuwa,

³⁰ laha hirnga ɗike ta haŋ ɗike so, po sar tir dum mizlira!»

³¹ Naŋ kanah ma, masay madiɗahay ati buy ngi ɓimujuwahay, a singiram anga ar wala taŋ, a ɓam: «A lih mizli mekelemey le, amma a laha hirnga naŋ gu ta!

³² Mesi, buy madiɗa ngi Israyele, anja a po sar wurenna tir dum mizlira, ɓa i puraka, yo ɓa i tiɓakaŋ so.» Mizli midiraka taŋ avu dum aciki naŋ tuwa, a zakaŋ aya.

Muc ngi Yesu

³³ Ngi wuzla papas na, luvuŋ a gi asi ruwuyo gar, a zik hã a ndila pas ngi ɓula away ngi hay.

³⁴ Yo ti pas ngi ɓula away ngi hay na, Yesu a til mi: «Eloy, Eloy, lemasabaktani?» Mbiɗeˀvra: «Bumbulvuŋ ɗu, Bumbulvuŋ ɗu, ki puliy fuk vur mike?»

³⁵ Mizli mekelemey midedeŋ akẽh micinaka na, a ɓam: «Cinaka ayɗi, ara zila Eli!»

³⁶ Mbur pal a kil, a yupo gugumay angi mbaazla mikwerek, a ngika ngik avu lavaɗ, a tilaŋ di ɓa a saŋ, a ɓi: «Ɗagay, purukum di da Eli a sa sawa, a po di sar ti nga kwana.»

³⁷ Amma Yesu a til mi ti gidaŋ ma, a mucu.

³⁸ Dar godo ngir hay ngi Bumbulvuŋ a Zerusalem a ngir cããt a wuzla cuw, zle a muŋ, sesẽŋ a ruwuy.

³⁹ Madiɗa ngi soje ngi romahay mideŋ a mbuŋ naŋ na, naŋ mupura naŋ mamuc kanah tuwa na, a ɓi: «Mbur hana i Mangal ngi Buymisemuŋ zleˀe gisiŋ!»

⁴⁰ Ngwasay ada, taŋ zar, ara puroko hiri. I ti Mariya ngi Magdala, Mariya mumuŋ ngi Zak meciɗek ati Zozes waɗ Salome, t'ada a wuzla taŋ ya.

⁴¹ Ti Yesu misi a hirwuy Galile zleˀe na, t'ada ram aseˀeŋ, ada jinakaŋ, yo waɗ ngwas mekelemey haɗi miram aseˀe nga Zerusaleme.

Mikaka vagay ngi Yesu ar vigiɗi

⁴² Pastaˀ a gi le si, yo i hin ngi ɗiya gwatay, mbiɗeˀvra: ɓa put ti miprik naŋ na, i hin ngi sabat.

⁴³ Zozef ngi Arimate a ndilawa. Naŋ i mbur madiɗa ngi wuzla kus ngi mingila wuyoy, naŋ kwana ara kutuko Zumabuy ngi Buymisemuŋ ya. A tus didak ngi ci ngi hay Pilata, ɓa a cufuɗa vagay ngi Yesu.

⁴⁴ Pilat micina Yesu a muc le si na, a zumaŋ hirnga le. A zilo madiɗa ngi sojeheye, a cufuɗaŋ: «A muc zlezle, a zik le kwa?»

⁴⁵ A dirba madiɗa ngi sojehey miɓaŋ di tuwa na, a pula jiviɗ da Zozef, ɓa a zuɓa vagay ngi Yesu.

⁴⁶ Zozef a hiɗik gabaga ngi dika vu, a po sar ti vagay ngi Yesu tir dum mizlira, a tuwuɗa ti gabaga tuwa, ara ka angi vigiɗ muguroko angi mandazlay muwã zleˀe. Dar a gidigilo ɗugur dasl ameˀe.

⁴⁷ Mariya ngi Magdala ati Mariya, mumuŋ ngi Zozes, a puraka li taŋ mikaka anga na le.