Mark 12 - Bible en langue guiziga

Ɓi ngi mizli misi moˀorehey ar guva ngi gudubun

¹ Joˀ Yesu a zla a wa taŋ ɓi ti wiˀ, a ɓa taŋ na: «Mbur ada, a gi guva ngi gudubun, a guno hirnga naŋ ti zluɓ, a li vigiɗ ɓa ngi sa ɗuco yi naŋ anga, yo a ndir hay madiɗa ngi jigin naŋ. Dar a pula guva asi haŋ ngi migi slrahay, joˀ naŋ aru nga mulak.

² Hin a ndila le muduba, buy ngi guva, a slin gawla naŋ ng'avi migi slra ngi gudubunoy tuwa, ɓa a tiɓakaŋ mi nga naŋ avu taŋ ya.

³ Amma migi slraˀahaya jakaŋ, a mbakaŋ ti kiɗ, a pulakaŋ, a mi kavbar kine.

⁴ A slin gawla mekelem ma. A kiɗakaŋ a hirnga, a zakaŋ.

⁵ A slin gawla mekelem mani, a kiɗaka nah vagay wãˀ waɗ gawla mekelemey haɗi ma, a mbaka mekelemey ti kiɗ, yo numuŋhoy, a kiɗaka taŋ vagay vagay.

⁶ Mindiraŋ na, sey mangal naŋ miteŋteŋ na tewle. Ar kiɗa mi naŋ na, a slinaŋ ng'avi migi slra ngir guvahay tuwa, a ɓi a kwacay naŋ na: ‹Ko mbrike na, a sa kilam mesem ngi mangal ɗu.›

⁷ Amma migi slra ngir guvahaya a ɓam ar wala taŋ: ‹Puraka, ngi diga na, i muzuma hay naŋ. Akum, kuɗukum di, ɓa guva ngi gudubuno, a ndir da ndra.›

⁸ A jaka mangal tuwa, a kiɗaka vagay, a hizigaka tir guva ngi gudubun avra.»

⁹ Yesu a ɓi: «Buy ngi guva a sa gi mbrike? A sa sawa, a sa kiɗa migi slra ngir guva tayna vagay vagay, a sa pula guva asi haŋ ngi mizli mekelemey.

¹⁰ Ɓimutoho miɓi ani na, ki slufaka ɗaˀ ta kwa: ‹Ɗugur mindira hayay mihizigaka avra na, mitiri ɗugur hirnga i naŋ.

¹¹ Hana i slra ngi Buymisemuŋ, i gwat hirnga wãˀ avu ndra ngi pur hiri ngal ngal!›»

¹² Joˀ a puram jiviɗ ɓa a jaka Yesu zleˀe, asi a slaka wala nah le kuy kuy, a kicuwula ɓi hana vur taŋ. Amma a zluwunam ti zigiduwo, a pulaka mbak, joˀ taŋ a cohom.

Buutu mawurkaka da buy mimadiɗa

¹³ Buy ngi ɓimuwahay a slinam mizli mekelemey a wuzla Farisahay ati mizli ngisi Herodoy, ɓa ara cam a kwacay Yesu, a jakaŋ ar mingiɓi naŋ.

¹⁴ A soko, a ɓakaŋ: «Kumani, i sinaka le, ka ki ɓi njah njah, ko mbur matikinuw gu anta. Asi k'anta pur di i deŋ ngi mbur ta, amma ki ra dubuna jiviɗ ngi Buymisemuŋ kasl kasl da mizli. Na jiviɗ ada ngi wurka buutu da buy mimadiɗaa kwa, malla anta kwa? Sey i wurkaka kwa, malla i wurkaka ta kwa?»

¹⁵ Amma wuluk taŋ mucuw cuw na, Yesu a si na le, a ɓa taŋ: «Ki cam a kwacay ɗu vur mike? Sikiy ti suloy pal ɓa i puraŋ.»

¹⁶ A sakaŋ di, joˀ Yesu a ɓa taŋ: «Foto hana ati slimiɗ mutoho ngi ra na, i ngi waka?» Taŋ a mbiɗakaŋ di: «I ngi buy mimadiɗa Tiber.»

¹⁷ Yesu a ɓa taŋ: «Gwat ngi buy mimadiɗa, wurkaka da buy mimadiɗa Tiber, yo gwat ngi Buymisemuŋ kwana, wurkaka da Buymisemuŋ ya.» Ɓi naŋ mumbiɗa taŋ di hana, a zuma taŋ hirnga le haɗa.

Cufuɗ ar slikiɗ ngi mizli mumucahay

¹⁸ Mekelemey a wuzla Sadukiheye, a soko ng'avi Yesu. Taŋ a ɓam mizli mumucahay anta slikiɗam ta. A cufuɗaka Yesu, a ɓakaŋ:

¹⁹ «Kumani, Moyis a toho ndra di na: ‹Da mburo, naŋ da ti sukum naŋ, a muc le, a pul ngwas le, amma zuŋ anta na, sey sukum naŋ a ngila wudiga nah, ɓa a yi da sukum naŋ, mumuca tuwa.›

²⁰ Zleˀe na, mizli sukumuŋhoy ada tarnaˀ. Mudumbuŋ a zuɓ ngwas, a muc, a pul zuŋ ta.

²¹ Mucuw naŋ a ngila wudiga tuwa, a muc, ko a pul zuŋ ta ma. Naŋ kanah avu sukum taŋ mimakir taŋ ya,

²² hã tarnaˀ taŋ gar a ngilaka ngwasa, amma a micam, ko a yam zuŋ pal ta. A dirba taŋ gar kwana, ngwas tuwa a muca ya.

²³ Ani, tapas mizli mumucahay masa slikiɗam na, ngwas a sa ndir da wa asi taŋ ka? Asi taŋ tarnaˀ taŋ gar a ɗuvaka le.»

²⁴ Yesu a ɓa taŋ: «Kumo, ki ra zluɓaka haɗi, vur mike? Asi ki sinaka Ɓimutoho ta, ki sinaka gidaŋ ngi Buymisemuŋ ta ma.

²⁵ Asi mike na, tapas mizli mumucahay masa slikiɗam na, zuɓa zil anta, ko zuɓa ngwas anta, amma a sa ndiram kaɓa modrohoy a ciki Buymisemuŋhoy.

²⁶ Da vur ɓi ngi mizli mumucahay masa slikiɗam na, ɗerewol ngi Moyis miɓa ɓi ngi sisim mawur na, ki slufaka ɓi nah ɗaˀ ta kwa? Buymisemuŋ a ɓa Moyise: ‹Yi Buymisemuŋ ngi Abraham, Buymisemuŋ ngi Izak waɗ Buymisemuŋ ngi Zakop.›

²⁷ I Buymisemuŋ ngi mizli mumucahay ta, amma ngi mizli misi ti siifahay. Ki zluɓaka le haɗi wãˀ.»

Ɓimuɗuva mifineˀ mekelemey

²⁸ Mbur ada, i buy ngi ɓimujuwa, a kirahawa, a cine taŋ magam mi na le. A pura na, Yesu a mbiɗa taŋ di le kaslsla. Vurˀe a cufuɗaŋ: «Ɓimuɗuvahaya, madiɗa ngi wuzla taŋ gar i wanaka?»

²⁹ Yesu a mbiɗaŋ di: «Mudumbuŋ n'ani: ‹Cin, Israyel, Bumbulvuŋ Buymisemuŋ ndra, Bumbulvuŋ i naŋ pal naŋ.

³⁰ Sey ki wuɗ Bumbulvuŋ Buymisemuŋ ɗike ti mevel ɗik wãˀ, ti membezleŋ ɗik wãˀ, ti lesl ɗik wãˀ, waɗ ti gidaŋ ɗik wãˀ.›

³¹ Mucuw naŋ kwana, n'ani: ‹Wuɗ mbur cil ɗike, kaɓa ka mawuɗ hirnga ɗik vuna.› Ɓimuɗuva madiɗa mufuna mucuw hanayna anta mata.»

³² Buy ngi ɓimujuwa tuwa, a ɓa Yesu: «Naŋ kuy haɗa, Kumani, ka miɓa na kaslsla: Buymisemuŋ, i naŋ pal naŋ, mekelem mbak naŋ le na, anta.

³³ Yo wuɗ naŋ ti mevel ɗik wãˀ, ti lesl ɗik wãˀ, ti gidaŋ ɗik wãˀ, yo wuɗa mbur cil ɗik kaɓa vu ɗik na, a funa ginewey mazlumaka taŋ ati magam taŋ mikulihey na le.»

³⁴ Yesu a pura mbur nah, a mbiɗaŋ di le ti sinmijileŋ, dar a ɓaŋ: «K'anta kileŋ avu Zumabuy ngi Buymisemuŋ ta.» Mbak ko mbur matum vu ngi cufuɗ naŋ, anta mata.

Mesi ati Davit

³⁵ Yesu a dubun gwat da mizli ar hay ngi Bumbulvuŋ a Zerusalem, a ɓi: «Buy ngi ɓimujuwahay a ɓam, Mesi i mangal ngi Davit na, mbri mbri maka?

³⁶ Davit vuna, ˀUf Mipal a njikaŋ di, a ɓi: ‹Buymisemuŋ a ɓa Buy ɗu na: Cifi tir vay hazum ɗu, ɓa hã i hina mesene ɗikey asi sar ɗiki.›

³⁷ Davit ti hirnga naŋ, a zila ‹Buy›. Na, Mesi a sa tiri i mangal naŋ mbri mbri maka?» Zigiduw haɗi ara cine mingiɓi ngi Yesu ti mumul.

Yesu miɓa mizli ɓa a jam lesl avu buy ngi ɓimujuwahay

³⁸ Ar dubuna gwat da mizli na, a ɓa taŋ: «Jam lesl avu buy ngi ɓimujuwahay mawuɗam liˀi ti jibe madiɗahay, mawuɗam sey a jaka taŋ haŋ ar li ngi luuma na.

³⁹ Angi hay ngi diradibiɗeye, a wuɗam sey li cifi ngi mbuŋ. Da a zilaka taŋ le nga zuma gwat na, a wuɗam sey li cifi ngi mbuŋ.

⁴⁰ A ra zumaka zlili ngi wudigahaya, yo da ara diram dibiɗ na, a zikam di kwiliŋ kwiliŋ, ɓa mizli a sinaka taŋ. A sa gaka taŋ kiita mutuwaˀ miwãˀ naŋ!»

Ngwas wudiga muvula gwat naŋ

⁴¹ Yo Yesu a cifi le puɗak angi gwat macikilam di dala ar hay ngi Bumbulvuŋ, ara jiɗa zigiduw mapa dala ng'araŋ. Misi zlilihey haɗi a pam dala haɗi.

⁴² Ngwas wudiga misi murga, a so pi dala memeɗehey cuw, i sisihey.

⁴³ Yesu a zilo mizli ngi seˀeheye, a ɓa taŋ: «Gisiŋ, yi ɓukum na: ngwas wudiga misi murga hana, a pi dala ng'ar sunduruko, fineˀ mizli mekelemey gar.

⁴⁴ Asi mizli gar na, a vulam di i mineˀ ngir zlili taŋ mawuɗam mata, amma ngwas hana, ko ti viya naŋ na kwana, a zuɓa si haŋ naŋ, naŋ mangir di gar na, a paŋ.»