Ɓimezle ngi Yesu Kristu LUK mitil di mi 6 - Bible en langue guiziga

Yesu i buy ngi sabat

¹ Ngi hin ngi sabat mekelem ada ma na, Yesu ara cuh tir guva ngi alkamari. Mizli ngi seˀehey a ngurom alkamari tuwa, a surɓoko a haŋ taŋhay, dar a humbuɗakaŋ.

² Mekelemey a wuzla Farisahay a ɓam: «Gwat mitika jiviɗ naŋ le ngi gi tapas sabat ma na, kumo, ki gaka vur mike?»

³ Yesu a mbiɗa taŋ di: «Gwat Davit miga tapas may mijaŋ, naŋ ati mizli naŋhay na, ki slufaka ɓi nah ɗaˀ ta kwa?

⁴ Davit a ci ng'ar hay ngi Buymisemuŋ, a hila ɗaf muvuhay le da Buymisemuŋ na, dar a zum waɗ a vula mizli naŋhay tuwa ya. Ɓi ndra a pul jiviɗ da masayay tewle mazumaka zleˀe si.»

⁵ Joˀ Yesu a ɓa taŋ: «Mangal ngi mburo, i buy ngi sabat vuna.»

Yesu mumbulo mbur misi haŋ mumuca

⁶ Ngi hin ngi sabat mekelem ma na, Yesu a ci ng'ar hay ngi dira dibiɗi, a dubuna gwat da mizli. Mbur ada akẽh, haŋ naŋ vay hazum a muc le.

⁷ Buy ngi ɓimujuwahay ati Farisahay ara jiɗaka Yesu, ɓa a puraka, da a sa ɗiyi mbur ti hin ngi sabata kwana, ɓa a sa kupakaŋ ɓi.

⁸ Amma naŋ a si na wuluk taŋ le, a ɓa mbur misi haŋ mumuca tuwa: «Slikiɗ, cici deŋ a wuzla.» Mbur tuwa a slikiɗ, a cici deŋ.

⁹ Yesu a ɓa taŋ: «Yi cufuɗukum ani: Ɓi ndra a pul jiviɗ ngi gi mi ti hin ngi sabata ka? Ngi gimezle kwa? Malla ngi gi malambaˀ kwa? Ngi laha hutuŋ ngi mbur kwa? Malla ngi zizaŋ kwa?»

¹⁰ Joˀ Yesu a bula hiri bal bal ar taŋ gar, a ɓa mbur tuwa: «Murɗo haŋ!» Mbur tuwa a murɗoŋ, joˀ haŋ naŋ a ɗiyi kuy kuy.

¹¹ A ja mevel le haɗi da buy ngi ɓimujuwahay ati farisahay tuwa, dar a ngilam wuy ar wala taŋ ar gwat taŋ masa gaka da Yesu.

Yesu miwini mislin naŋhay kuruˀ nga cuw

¹² Ngi pas mekelem ada na, Yesu a jiɗ nga dira dibiɗ a muwã. A hin kap ar li tumbulo Buymisemuŋ.

¹³ Li naŋ muwun na, a zilo mizli ngi seˀeheye, a wini kuruˀ nga cuw a wuzla taŋ, a ca taŋ slimiɗe misliney:

¹⁴ Simoŋ, Yesu a caŋ slimiɗe Piyer, Andre sukum naŋ, Zak, Zaŋ, Filip, Bartelemi,

¹⁵ Matiye, Tomas, Zak mangal ngi Alfe, Simoŋ mawuɗ hirwuy naŋ,

¹⁶ Yudas mangal ngi Zak waɗ Yudas Iskariyot, mbur masa vula Yesu ngi ji.

Yesu mudubun gwat da mizli, yo naŋ mumbul misi jijihey

¹⁷ Yesu a po sar baɗ ti muwã ati mislin naŋhaya, a cici ar li micay ati mizli ngi seˀehey haɗi waɗ zigiduw ngi hirwuy Yude gar, ngi Zeruzalem ati ngi ˀayzaw Tir ati ngi ˀayzaw Sidoŋ.

¹⁸ A soko ɓa a cinam mingiɓi naŋ, yo ɓa a mbulo taŋ tir jiji taŋhaya. Mizli misi setenehey na, a ɗiyam le.

¹⁹ Zigiduw gar ara pur jiviɗ ɓa a jaka haŋ avu Yesu, asi gidaŋ ada bo ti vaŋ, ara mbulo taŋ cek.

Wuya ati bonoy

²⁰ Dar Yesu a zuɓa hiri ng'ar mizli ngi seˀeheye, a ɓa taŋ: «Yawwa, kum misi murgahay, kum ar wuya, asi Zumabuy ngi Buymisemuŋ, i ngi kum!

²¹ Kum misi may majukum wurenna, kum ar wuya, asi kisa mbam! Kum matuwam wurenna, kum ar wuya, asi kisa singiram!

²² «Da mizli ara gam mesene ti kum, ara ɓulukum avra, ara zukum, yo ara vusoko slimiɗ kumo, asi Mangal ngi mbur na, yawwa kum mumulom!

²³ Tapasa, mumulom, zluzluɓam, asi migir kum ada haɗi a muŋ! Asi mike na, dideˀ taŋhay a gam ti mijiviɗeye le zleˀe kanah ya.

²⁴ «Amma kay, kum misi zlilihey, kum ar bonoy: asi ki lumam gwat ngi tisla mevel kumo le si!

²⁵ Kum mizli mumbam le wurenna, kum ar bonoy: asi may a sa jukum! Kum masingiram wurenna, kum ar bonoy: asi kisa tuwam tuwuy ngi vagay!

²⁶ Da mizli gar ara ɓam ɓi mezle ar kum na, kay, kum ar bonoy. Asi mike na, dideˀ taŋhay a gam ti mijiviɗ misi slireye le zleˀe kanah ya.

Wuɗam mesene kumoy

²⁷ «Amma kum mizli macinam ɓi ɗu na, yi ɓukum: Wuɗam mesene kumoyo, gam mezle da mizli mazliram ti kum ta.

²⁸ Ɗuwulaka mi da mizli manisukumo. Diram dibiɗ vur mizli majukum ɓi na.

²⁹ Da mbur a cuw babarva le avu kwala vay pal na, mbiɗaŋ vay mekeleme ma. Da mbur a zuɓa dawra ɗike le na, pulaŋ a zuɓa zana ngi seˀe wãˀ.

³⁰ Da mbur a cufuɗ gwat le avu ka na, vulaŋ. Da mbur a tiɓa gwat ɗikeye le na, ki cufuɗa mata.

³¹ Gwat kum mawuɗam ɓa mizli a gukum di na, gaka taŋ di kanah ya.

³² Da ki wuɗam di i mizli mawuɗam kum tewle na, kisa lumam sise wana aseˀe ma ka? Ko mizli magam mungrahay kwana, a wuɗam di i mizli mawuɗam taŋ ya.

³³ Yo da ki gam mezle, sey da mizli magukum mezle ya na, kisa lumam sise wana aseˀe ma ka? Migi mungrahay vuna kwana, a gaka kanah ya.

³⁴ Da ki vulaka gwata, sey da mizli kum mawulkam, zliv a sa mukum di gu na, kisa lumam sise wana aseˀe ma ka? Ko migi mungrahay kwana, a vulaka gwata da migi mungrahay, ɓa a sa maka taŋ di kanah a muŋ ya.

³⁵ Kumo so na, wuɗam mesene kumoy. Gam mezle, yo mizli midindilam gwat le avu kum na, ki wulkaka mata. Naŋ kine, kisa lumam migir kumo haɗi, kisa tiram ziri ngi Buymisemuŋ Mimadiɗa. Asi naŋ, naŋ i mezle avu mizli manja si na gi sisehey waɗ avu mizli misi moˀorehey gar.

³⁶ Gam mezle da mizli kaɓa Cine kum magi mezle na ya.

Ki gam kiita da mizli ta

³⁷ «Ki gam kaɓa kum i migi kiitahay ta, ɓa a sa gukum kiita ta. Ki hizigiɗam mizli ti kiita ta, ɓa a sa hiziguɗukum ti kiita ta ya. Pulaka mungra ngi mizli, ɓa Buymisemuŋ a sa pula mungra kum aya.

³⁸ Vulam, a sa vulukum aya. A sa wukum di ti daram mezle, a zlurukum di ng'ar jiiba ngi zana kumo, jok jok, mbak hã a pi a ruwuy. Asi daram kum mawam di gwat da mizli na, a sa wukum di ti naŋ vuna ya.»

³⁹ Yesu a ɓa taŋ ɓi miweˀ ti wi ma: «Dangar a ɗiɗi dangar cil naŋ gu kwa? Naɓa taŋ cuw taŋ, a sa ndilam ng'ar vigiɗ takwa?

⁴⁰ Mbur madubun gwata, anta funa mbur madubunaŋ gwata ta, amma da naŋ mudubun le kuy kuy wãˀ na, a ndila mbur madubunaŋ gwata ɓula.

⁴¹ «Ki pura giziŋ meciɗek misi a hiri sukum ɗike ɓula, amma mbal misi a hiri ɗike, k'anta pura ta vur mike?

⁴² Ka, k'anta pura mbal misi a hiri ɗike ta, amma kisa ɓa sukum ɗike: «Sukum ɗu, kwaɗay, i ˀufuw giziŋ misi a hiri ɗike» na, mbri mbrike? Na ka, mbur miɓi mi cuw cuw, zuɓa mbal misi a hiri ɗike ɗagay ayɗi! Ɓa kisa pur kweŋ kweŋ ngi zuɓa giziŋ misi a hiri sukum ɗike.

Widis ati yi naŋ

⁴³ Widis mukuy kuyo, anta yi malambaˀa ta. Yo widis mukuy kuy ta kwana, anta yi mezle ta ya.

⁴⁴ Naŋ kine, a sinaka widise gar na, avu yi naŋ: anta ngilam yi ngi ˀuruf avu sisime ta. Anta ngilam yi ngi gudubun avu titife ta ma.

⁴⁵ Mbur mezle, a bo ti gwat mezle, naŋ miwi di vu le a mevele mezleŋ. Yo mbur malambaˀa, a bo ti gwat malambaˀ, naŋ miwi di vu le a mevele malambaˀ aya. Asi mike na, mburo, a ɓi di i ɓi minahaŋ mevele le wãˀ.

Hayay cuw

⁴⁶ Kum anta ki gaka gwat ya maɓukum di na ta, na ki zilikiy «Buy, Buy» vur mike?

⁴⁷ Mbur gar maso ng'avi ya, macina mingiɓi ɗu, yo maga ka ya maɓa hana na, yi bugukum mbur taŋ mubam vu cuwa:

⁴⁸ A bam vu ati mbur mindira hay naŋ le. A la hirwuyo jileŋ, a ɗuva virzi naŋ ar mandazlay muwã. Mekepel a zuɓ, yam a so luuma hay tuwa, amma ko a mbuzla gu ta, asi a ndir le kuy kuy.

⁴⁹ Amma mbur macina mingiɓi ɗu, yo maga kanah ta na, a bam vu ati mbur mindira hay naŋ le a ruwuy, manja a la li ngi ɗuva virzi naŋ. Mekepel a zuɓ, a so luuma haya, hay a mbizli a haŋhaŋ si. A mbizli kap kap wãˀ.»