Ɓimezle ngi Yesu Kristu LUK mitil di mi 14 - Bible en langue guiziga

Yesu mumbulo mbur misi jiji

¹ Ngi hin ngi sabat ada na, Yesu a ci nga zuma ɗaf a hay mbur pal ngi wuzla madiɗa ngi Farisahay. Mizli misi akẽh ara jiɗakaŋ.

² Mbur miji kwacay ada deŋ a mbuŋ naŋ.

³ Yesu a ɓa buy ngi ɓimujuwahay ati Farisahaya na: «Jiviɗ ada ngi mbulo mbur ti hin ngi sabata kwa malla anta kwa?»

⁴ Amma a cifam teteˀ teteˀ. Yesu a wusa mbur tuwa, a mbuloŋ, a ɓaŋ, a ru.

⁵ Dar a ɓa taŋ: «Da mburo, mangal naŋ malla sla naŋ a diɗ le ng'ar vigiɗ ngi yam, da ko i hin ngi sabat tekeɗe kwana, ara bo di kutum tir vigiɗe takwa?»

⁶ Ko a mbiɗakaŋ di ar ɓi hana gu ta.

Ɓi ngi wini li cifi ati zila mizli nga zuma gwat

⁷ Yesu a pura na, mizli mizilaka taŋ le nga zuma gwata, a winam sey li cifi mezle. A ɓa taŋ vurˀe:

⁸ «Da a zulukuw le ng'ar muguzlum ngi vula ngwas na, ki ra cifi sey ar li cifi ngi mbuŋ ta. Asinta, a ziloko mbur madiɗa mifineˀ ka le kwana.

⁹ Naɓa mbur muzulo kum na, a sa ɓuw ka malla ko mbur mekeleme: «Pula li da mbur hana.» Dar kisa ra cifi ti mesem ar li cifi ngi dirba wãˀ.

¹⁰ Amma da a zulukuw le na, ara cifi ar li cifi ngi dirba jak. Sey da mbur muzulo ka na, mindilo le, a sa ɓuw: «Ngama ɗu, so nga mbuŋ aka.» Joˀ a sa tiri avu ka i ɓi ngi ɗuvuw hirnga a mbuŋ mizli kum masa zumam bumoˀ gar.

¹¹ Asi mike na, mbur gar maɗuva hirnga da vu naŋ na, a sa makaŋ nga ruwuy. Yo mbur gar mama vu naŋ na, a sa ɗuvakaŋ hirnga.»

¹² Joˀ Yesu a ɓa mbur muzulo di tuwa ya: «Da ki ra gi gwat ngi zum ti wuzla papas malla ti pastaˀ na, anja ko ki zilo ngama ɗikey ta, ko sukum ɗikey malla muy ɗikey ta, ko midigwi ɗik misi zlilihey ta ma. Da kanah na, taŋ kwana, a sa zulukuw ya, naɓa a wurkukuw di le a muŋ.

¹³ Amma da ki gi gwat ngi zum ngi muguzlum le na, zil misi murgahay, misi haŋ malla sar mumucahay, jegwerey ati dangaray.

¹⁴ Dar kisa mumul, asi gwat taŋ anta ɓa a sa wurkukuw di ta. Naŋ kine, Buymisemuŋ a sa wurkuw di tapas mizli mijeŋŋehey masa slikiɗam ti wuzla mumucahay.»

Ɓi ngi ɗaf madiɗaŋ

¹⁵ Mbur pal a wuzla mizli mazumam gwat tuwa micina ɓi hana na, a ɓa Yesu: «Mbur masa cifi ngi zuma gwat angi Zumabuy ngi Buymisemuŋ na, naŋ ar mumul!»

¹⁶ Yesu a ɓaŋ: «Mbur mekelem ada, a di ɗaf madiɗaŋ, a zilo mizli haɗi.

¹⁷ Ti pas ngi zuma gwat migi na, a slina gawla naŋ ng'avi mizli mizilahaya, ɓa a ɓa taŋ: ‹Soko muduba, gwat ngi zumo, naŋ gweˀe.›

¹⁸ Amma taŋ gar, a zlaka a jam mi ti ɓi misi purla. Mbur mudumbuŋ a ɓa gawla tuwa: «Yi hiɗik guva le wureˀ ani, anja i ra puro di ɗagay. Ambuh, puliy takwa.»

¹⁹ Mbur mekelem a ɓaŋ: «Yi hiɗik sla ngi huvoy le, gam zlum. Ambuh, puliy i ra titila taŋ ɗagay takwa.»

²⁰ Mbur numuŋ a ɓaŋ: «Yi zuɓ ngwas le wureˀ aruŋ, ya masa ndil gu ta na vurˀe.»

²¹ Yo gawla tuwa mumo na, a slufa ɓi nah gar da buy naŋ. Dar buy naŋ tuwa a ji mevel, a ɓa gawla naŋ: «Aru kutum ng'ar li ngi luuma waɗ a jiviɗ ngir walahayay, zilo misi murgahay, mumuca haŋ malla saray, dangaray ati jegwerey, so taŋ.»

²² Zik neˀ na, gawla tuwa a mawa, a ɓaŋ: «Kumani, yi ga gwat ka miɓa tuwa le, amma li ada aruŋ.»

²³ Dar buy a ɓa gawla naŋ tuwa ma: «Aru nga jiviɗey, yo ng'aciki zluɓoy, tika ˀay da mizli, a soko cam, ɓa hay ɗu a nih wãˀ.

²⁴ Naŋ kine, yi ɓuw na: A wuzla mizli mizilahay zleˀe na, ko mbur pal masa titila gwat ngi zum ɗu anta.›»

Mbur masipa Yesu, a zlir a gi mike?

²⁵ Zigiduw haɗa ara ru asi Yesu. Yesu a mbuɗo hiri, a ɓa taŋ:

²⁶ «Da mbur muso le ng'avi ya, da a hiyĩy fineˀ cine, mumuŋ, ngwas naŋ, ziri naŋhay, sukum naŋ mizilehey ati mongosohoy, yo fineˀ hirnga naŋ vuna ta na, naɓa a tiri mbur ngisi ya gu ta.

²⁷ Mbur mazuɓa dum naŋ mizlira, yo misipa sar ɗu ta na, naɓa a tiri mbur ngi si ya gu ta.

²⁸ Asi mike na, da mbur a wuzla kumo, a wuɗ le ɓa a ndir hay na, a zla a cifi joˀ ɗagay, a toho dala naŋ masa tika gar, yo a pura, da a kiɗaŋ mi naŋ gu kwa mbrike takwa?

²⁹ Da kanah ta na, da a ɗuva virzi ngi haya le, a wa mi nah gu mata na, mizli masa puraka gar na, a sa singiram ar naŋ,

³⁰ a sa ɓam: «Puraka, mbur ani ayɗi, a ɗuva virzi ngi haya le, a kiɗa mi nah gu mata.»

³¹ Naŋ kine ya, da buy madiɗa a wuɗ le ɓa ara gi vurum ati buy madiɗa mekelem na, a cifi joˀ ɗagay, a pura, da aru ti mizli naŋhay durmuk kuruˀo nga zlir ti buy mekelem maso ti mizli durmuk kukur cuw na gu kwana.

³² Da kanah ta na, ti buy mekelem muro kileŋ aruŋ na, anja a slin mizli ng'ava, a cufuɗaŋ ɓa a ɗiyam ɓi ar wala taŋ.

³³ Naŋ kanah ya, ko wa gar a wuzla kumo, da a pula gwat naŋhaya mbak gar ta na, naɓa a tiri mbur ngisi ya gu ta.

Mandaŋ ngi pula gir ta

³⁴ Haˀaw, mandaŋ i gwat mezleŋ. Amma da lemme naŋ a susuyum le na, mbur a tira lemme a muŋ ti mi aruŋ maka?

³⁵ Naŋ mezle ngi jina hirwuyo mata, ko i ngi pi ar guva mata. Amma a sa tukoko avra. Mbur misi slimiɗ macin na, anja a cin.»