LEVIHEY 3 - Bible en langue guiziga

Mikuli ngi ngiɓiˀay

¹ Da mbur a wuɗ le ɓa a gi mikuli ngi jumoˀay ati ya Bumbulvuŋ ti sla na, sey a jo di i gusoŋ malla bulkoŋ manja hereweɗ ava, nga mbuŋ ɗu.

² Mbur vuna, a buca haŋ bac a hirnga ginew naŋ muso di tuwa, dar a slaka ˀay naŋ a mizlingre guɗuk ngi zlir ti ya Bumbulvuŋ. Masayay, ziri ngi Aroŋhoyo, a kucaka pumbus da ciki li gi mikuli gun gun zlar.

³ Mikuli ngi ngiɓiˀay na, a wuɗam ngi zlumo, i mungul misirit ar jofo, waɗ ngi vi tanday naŋ.

⁴ Yo ɗugur dubahaya cuw taŋ jom ti mungul naŋhaya, meficek naŋhay milaw lawa, waɗ muguzlurvuy ngi mevele torro bac ng'avu ɗugur dubahaya.

⁵ Akẽh na, ziri ngi Aroŋhoy a wuraka taŋ ar li gi mikuli, jom ng'avu mikuli ngi zlum ti zlum miɓaˀ ar dum miɗiyam di vu ar li gi mikuli tuwa. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ.

⁶ Da mbur a wuɗ le ɓa a gi mikuli ngi ngiɓiˀay ti tumuŋ malla ti ˀaw na, sey a jo da ya Bumbulvuŋ i mizile malla mongoso, manja hereweɗ ava.

⁷ Da mbur a so di i tumuŋ ngi vulo na, a so di nga mbuŋ ɗu.

⁸ Mbur a buca haŋ bac a hirnga ginew naŋ muso di tuwa, a slaka ˀay naŋ a mbuŋ guɗuk ngi zlir ti ya Bumbulvuŋ, dar ziri ngi Aroŋhoy a kucaka pumbus naŋ da ciki li gi mikuli gun gun zlar.

⁹ Mikuli ngi ngiɓiˀay tuwa na, a vulam kaɓa gwat ngi zum mizlam zlam wãˀ da ya Bumbulvuŋ i li misi malay: dangwala paɗ wãˀ, buk avu ngbalalaŋ, mungul misirit a hirnga gwat ngi kwacayaya wãˀ.

¹⁰ Yo ɗugur dubahaya cuw taŋ ti mungul naŋhaya, jom ti meficek naŋhay milaw lawa, waɗ guzluzluk ngi mevele torro, bac ng'avu ɗugur dubahaya.

¹¹ Akẽh na, masay a zluma taŋ ar li gi mikuli. Hana i gwat ngi zum mizlam zlam wãˀ da ya Bumbulvuŋ.

¹² Da mbur a so di ngi vulo i ˀaw na, a so di nga mbuŋ ɗu.

¹³ Mbur muso di vuna, a buca haŋ bac a hirnga ˀawa, a sla ˀay naŋ daˀ a mbuŋ guɗuk ngi zlir ti ya Bumbulvuŋ. Dar ziri ngi Aroŋhoy a kucaka pumbus naŋ da ciki li gi mikuli, gun gun zlar.

¹⁴ A vulam kaɓa gwat ngi zum mizlam zlam wãˀ da ya Bumbulvuŋ na, i mungul misirit a hirnga gwat ngi kwacayaya wãˀ,

¹⁵ yo ɗugur dubahaya cuw taŋ jom ti mungul naŋhaya waɗ meficek naŋhay milaw lawa, guzluzluk ngi mevele torro, bac ng'avu ɗugur dubahaya.

¹⁶ Dar masay a wura taŋ ar li gi mikuli. Hana i gwat ngi zum mizlam zlam, misi zĩˀĩ naŋ a tisliy mevel da ya Bumbulvuŋ. «Li misi mungul mungul gar na, inga ya Bumbulvuŋ.

¹⁷ Mungul ati pumbus gar na, kum anta sa zumaka ta. Hana i ɓimujuwa avu kum, ar li wanaka gar kum masa cifam anga na, anta mbiɗi ta, a ndir avu dideˀ avu dideˀ kumoy hã ngi caˀa kine.»