KORENTIHEY MUDUMBUŊ 3 - Bible en langue guiziga

Gawla ngi Buymisemuŋhoy

¹ Sukum ɗu misikristuhoy, ɓa i ɓukum kaɓa maɓam da mizli mulumam ˀUf ngi Buymisemuŋ le na, i ɓukum gu ta, amma i ɓukum kaɓa maɓam da mizli ngir duniya hana, kaɓa maɓam da ziri memeɗehey masipam jiviɗ ngi Kristu.

² I vulukum di i ɗuwa ngi si, i ɗaf migidaŋ ta, asi ki ɓusaka zum naŋ zleˀe ta. Amma ko dana vuna kwana, ki ɓusaka ta na si.

³ Asi kum ka mizli ngir duniya hana aruŋ. Vur ki ra gam suloŋ, ki ra tiram ar wala kumo. Hana a bigi kite kum i mizli ngir duniya hana, yo ki gam di i gwat ngi mizli ho gar ta kwa?

⁴ Da mbur pal asi kumo, ara ɓi: «Yi mbur ngi Pol», mbur mekeleme: «Yi ngi Apolos» na, kite ki ra gam ka mizli gar ta kwa?

⁵ Apolos vuna kpak i waka? Pol vuna kpak i waka? Taŋ i gawla ngi Buymisemuŋhoy musoko ti kum ɓa ki tiɓaka Kristu na ta kwa? Ko wa gar asi taŋ a gi di i slra Bumbulvuŋ muvulaŋ di ngi gi.

⁶ Ya i hirva le, Apolos a pa yama le aseˀeŋ. Amma migil naŋ i Buymisemuŋ.

⁷ Naŋ kine, mbur mahirvi ti hirvi i ngataraŋ. Mipi yam aseˀeŋ i ngataraŋ. Sey midar dar i Buymisemuŋ pal naŋ, naŋ migil naŋ.

⁸ Mbur mahirvi ati mbur mapi yam aseˀeŋ, taŋ rak raka. Mbur gar a sa luuma migir naŋ weˀe avu slra naŋ migaŋ.

⁹ Asi ndr'i migi slra ngi Buymisemuŋhoy jom ati naŋ. Kum i guva Buymisemuŋ mahuvaŋ, hay naŋ mandiraŋ.

¹⁰ Weˀ avu gwat ngi vul ɗu Buymisemuŋ muvuliy di na, i ɗuva virzi naŋ le ka mbur misina wi hay le ti jiviɗ naŋ. Mbur mekelem a ɗuva a hirnga naŋ. Amma anja mbur gar a ji lesl ar naŋ masa ɗuva a hirnga naŋ na so.

¹¹ Virzi naŋ i muɗuva le si, i Yesu Kristu. Mbur maɗuv mekelem gu kaˀ a ruwuy, anta mata.

¹² Virzi naŋ muɗuva hana, anja ko mizli a ɗuvaka a hirnga naŋ ti ɓiri tapasl tapasl, ti ɓiri bara, ti ɗugur hirngahay, ti dum, ti murbuc, malla ko ti himac kwana,

¹³ slra ngi mbur gar, a sa njik ar li babara, i hin ngi kiita masa njikaŋ. Asi a sa njik ar vu, yo da slra ngi mburo, naŋ mbri gar na, i vu masa bigaŋ.

¹⁴ Da slra ngi mbur muɗuva a hirnga naŋ tuwa, vu a zuma ta na, a sa lum migir naŋ.

¹⁵ Amma da ngi mburo, vu a zuma le na, anta sa lum migir naŋ ta. Naŋ vuna so na, a sa lih ɓula, amma kaɓa malaham ti wuzla vu.

¹⁶ Kum i hay ngi Bumbulvuŋ, yo ˀUf ngi Buymisemuŋ, a cifi le a hur kumo na, ki sinaka ta kwa?

¹⁷ Da mbur a hirya hay ngi Bumbulvuŋ le na, Buymisemuŋ a sa zizaŋ. Vur hay ngi Bumbulvuŋ naŋ pal, yo hay ngi Bumbulvuŋ i kum vuna.

¹⁸ Anja mbur a ga gilaw da vu naŋ ta. Da mbur ar wala kumo, ara pura vu naŋ ka naŋ ti sinmijileŋ ngi duniya hana na, anja a tiri mibirnga, ɓa a tiri misi sinmijileŋ far.

¹⁹ Vur sinmijileŋ ngi duniya hana, Buymisemuŋ a pura kaɓa ɓi ngi mibirngahay ngataraŋ. Asi mike, a tohoko na: «Buymisemuŋ a ja misi sinmijileŋheye ti wer taŋ vuna tehhe a muŋ.»

²⁰ Yo a tohoko ma na: «Bumbulvuŋ a si na wuluk ngi mizli misi sinmijileŋheye le i ngatara lambaˀ.

²¹ Naŋ kine, anja mbur a ɗuva huhumvu naŋ taˀ vur mizli ta. Asi gwat gar i ngi kumoy.

²² Pol, Apolos malla Piyer, duniya, siifa malla mucu, hin misi dana ati hin ngi mbuŋ gar na, i ngi kumoy.

²³ Amma Kumo, kum i ngi Kristuhoy, yo Kristu kwana, i ngi Buymisemuŋ.