Ɓimezle ngi Yesu Kristu ZAŊ mitil di mi 7 - Bible en langue guiziga

Sukum ngi Yesuhoy a tiɓakaŋ ta

¹ A dirba nah, Yesu a bula hirwuy Galile, a ngum bula hirwuy Yude ta, asi Yudehey ara sipakaŋ ɓa a kiɗakaŋ vagay.

² Dambalaka muguzlum ngi guɗuk ngi Yudeheye, naŋ gweˀe.

³ Joˀ sukum naŋhay a ɓakaŋ: «Ki cifi aka ta, aru nga Yude, ɓa mizli ngi si kahay kwana, a puraka slra ɗik ka maga na.

⁴ Da mbur a wuɗ le ɓa a sinakaŋ na, a ga gwata ɗum ti ɗum ta. Ani ki ra gi gwat madiɗahay, zuwen biga vu ɗik a wuzla mizli gar.»

⁵ Dambalaka ko sukum naŋhay vuna tekeɗe kwana, a tiɓakaŋ ta.

⁶ Dar Yesu a ɓa taŋ so na: «Pas ɗu a gi t'aruŋ. Avu kumo, ko pas wanaka gar na, a zlir le ndrehhe.

⁷ Duniya a tiri mesene kum gu ta, amma ya, a tiri mesene ɗu gu, asi ya maɓa njah njah, gwat ngi gi naŋhay i malambaˀhay na.

⁸ Kumo, aram ng'ar muguzlumo ɓula, amma ya i ru ta, asi pas ɗu a gi t'aruŋ.»

⁹ A dirba naŋ miɓi kahana na, a ndir a Galile.

¹⁰ Amma a dirba sukum naŋhay miram ng'ar muguzlum tuwa na, Yesu kwana, a zuɓa jiviɗ aya, manja a biga vu naŋ, kite aru ɗum ti ɗum.

Yesu angi muguzlum ngi guɗukoy

¹¹ Yudehey a ram ti sipi naŋ ar muguzlumo, a ɓam: «Arona ma ska?»

¹² A wuzla zigiduwo, ara ɓam ɓi haɗa vur naŋ. Mekelemey a ɓam: «I mbur migi mezle.» Numuŋhoy a ɓam: «Ĩˀĩ, ara ziza mizli.»

¹³ Amma mbur matum vu ngi ɓi bidas vurˀe anta, vur ara zluwunam ti Yudeheye.

¹⁴ Hin ngi muguzlumo cuh le cah si, joˀ Yesu a ci ng'ar hay ngi Bumbulvuŋ, a zla a dubuna gwat da mizli.

¹⁵ Ɓi nah a zuma hirnga le da Yudeheye, a ɓam: «Naŋ a gi lekol ta ngbaŋ, a sin gwat haɗa mbri kahana ka?»

¹⁶ Yesu a mbiɗa taŋ di: «Gwat ya madubunukum di na, a bo ti vi ya ta, amma ti vu mbur mislino ya.

¹⁷ Gwat ya madubuna da mizli hana, da a bo ti vu Buymisemuŋ, malla da yi ɓi di i ɓi ngi hirnga ɗu na, mbur mawuɗ gi gwat Buymisemuŋ mawuɗ na, a sa sinaŋ.

¹⁸ Mbur maɓi ɓi ngi hirnga naŋ na, a sipi di i dudok da hirnga naŋ tehhe. Amma mbur masipi dudok ngi mbur mislino di na, a ɓi di i ɓi mikaslsla, yo ko ɓi ngi gi gilaw da mbur anta ava ta.

¹⁹ Muvulukum Ɓimujuwa i Moyis ta kwa? Amma ko mbur pal a wuzla kumo mija ɓi nah a hirnga anta. Ki wuɗam ɓa ki kiɗikiy vagay vur mike?»

²⁰ Zigiduw a mbiɗaŋ di: «Setene ada a hirnga ɗike! Mawuɗ kiɗ ɗik vagay i waka?»

²¹ Yesu a mbiɗa taŋ di: «Yi gi gwat purla aruŋ si na, a zumukum hirnga gar kumo mbrike?

²² Moyis a ɓukum ɓa ki cam a mizaw. Mizla virzi naŋ i naŋ vuna ta, i dideˀ kum mudumbuŋhoy. Vurˀe, ko angi hin ngi sabat kwana, ki ra cam ziri a mizawa.

²³ Da ki cam mbur a mizawa zuy ti hin ngi sabata, ko anta ngila ɓimujuwa ta ngbaŋ na, ki jam mevel ar ya, asi ya miɗiya mburo tapas sabata vur mike?

²⁴ Kiɗaka mi ngi sli kiita kaɓa hiri mapura tewle na. Slam kiita ti jiviɗ naŋ kaslsla.»

²⁵ Mizli a wuzla mizli ngi Zeruzalem a ɓam: «Hana i mbur masipaka ngi kiɗ vagay tuwa ta kwa?

²⁶ Puraka, n'ani ara ɓi bidas, ko anta ɓakaŋ neˀ ta! Ani na, mizli madiɗa ndrahay a sinaka le i Mesi gisiŋ muduba sukwani?

²⁷ Na, ti Mesi misa so le na, mbur masa si na a so ti kaha na, anta. Amma mbur hana, i sinaka li naŋ muso ti raˀa le.»

²⁸ Yesu madubuna gwat da mizli ar hay ngi Bumbulvuŋ tuwa, a zla a til mi, a ɓi: «Ki sinikiy le, yo ki sinaka li ya muso ti raˀa na le kini kwa? Na, dambalaka yi so ngi mongoy ɗu ta, amma mbur mislino ya na, naŋ kaslsla. Kumo, ki sinakaŋ ta.

²⁹ Amma ya i si na le, asi yi so ti vaŋ, mislino ya i naŋ.»

³⁰ Dar a puram jiviɗ ɓa a jakaŋ, amma mbur mija haŋ ava anta, asi pas naŋ a ndila t'aruŋ.

³¹ Mizli haɗa a wuzla zigiduwo, a tiɓakaŋ le, a ɓam: «Ti Mesi misa so le na, a sa gi cekenehey mifineˀ ngi mbur hana miga na kwa?»

³² Farisahay micinaka, mizli gar misi a wuzla zigiduwo maɓam ti ruwuy ti ruwuy vur Yesu na, taŋ ati masay madiɗahaya, a slinam mizli mijigina lihey ɓa ara jakaŋ.

³³ Yesu a ɓi: «Yi zik ati kumo neˀ aruŋ ɗagay, a dirba nah, i sa ru ng'avu mbur mislino ya.

³⁴ Ki sa sipikiy, amma ko kum anta sa lumikiy ta, asi li ya misi anga na, kum anta sa ram ng'ara gu ta.»

³⁵ Zle ti nah na, Yudehey a ɓam ar wala taŋ: «A wuɗ ɓa aru nga ma ɓa i lumakaŋ gu ta vunaka? Ani na, a wuɗo ru nga vu Yudehey mizliɗam hirnga pal pal a wuzla Grekey na kwa? Aru nga dubun gwat da Grekey kwa?

³⁶ Naŋ miɓi: ‹Ki sa sipikiy, amma ko kum anta sa lumikiy ta, asi li ya misi anga na, kum anta sa ram anga gu ta› na, mbiɗeˀvra naŋ mbrike?»

Yam maɓul goŋ goŋ

³⁷ Hin ngi kiɗa mi ngi muguzlum wãˀ na, i hin mufuna mekelemey gar. Yesu a slikiɗ deŋ, a zla a til mi ti gidaŋ, a ɓi: «Ko wa gar, da yam ara gaŋ na, anja a so ng'avi ya, a si.

³⁸ Yo mbur matiɓiy na, mizaw maɓul goŋ goŋ a sa bo tir mevele, kaɓa Ɓimutoho miɓi.»

³⁹ Yesu a ɓi di i ɓi ngi ˀUf ngi Buymisemuŋ, mizli matiɓakaŋ masa lumakaŋ. Asi ti di nah na, ˀUf anta aruŋ, asi Yesu a lum dudok zleˀe t'aruŋ.

⁴⁰ A wuzla mizli micinaka mingiɓi ngi Yesu na, mekelemey a ɓam: «Mbur hana i Mijiviɗ gisiŋ!»

⁴¹ Numuŋhoy a ɓam: «I Mesi!» Amma mekelemey a ɓam ma na: «Mesi a so baɗ ti Galile kwa?

⁴² Ɓimutoho a ɓi na: Mesi a sa so i dideˀ ngi Davit, a sa so ti Beteleyem, walahay miyaka Davit ara na, kini ta kwa?»

⁴³ Naŋ kine, zigiduw a wuɗuk taˀ taˀ asi ɓi naŋ.

⁴⁴ Mekelemey cah ar wala taŋ a wuɗam a jakaŋ, amma ko mbur mija haŋ ava anta.

⁴⁵ Mizli mijigina lihey tuwa a mam ng'avi masay madiɗahay ati Farisahay a muŋ. Joˀ taŋ a ɓaka taŋ: «Ki soko di a haŋ ta vur mike?»

⁴⁶ Mijigina lihey a mbiɗaka taŋ di: «Mbur miɓi ɓi ɗaˀ ka mbur nah anta!»

⁴⁷ Farisahay a ɓaka taŋ: «A gukum gilaw le ya kwa mbrike?

⁴⁸ A wuzla mizli madiɗahay malla a wuzla Farisahay na, mbur pal mitiɓaŋ ada kwa?

⁴⁹ Sey zigiduw nah, misina ɓimujuwa ta na, i minisahay!»

⁵⁰ Amma Nikodem, mbur ngi wuzla Farisahay, mira luuma Yesu ngi pas mekelem zleˀe tuwa, a ɓa taŋ:

⁵¹ «Da i cinaka mingiɓi ngi mburo ta, yo da i sinaka gwat naŋ maga ta si na, ɓimujuwa ndra a juwaŋ kwa?»

⁵² A mbiɗakaŋ di: «Ka vuna, ki mbur Galile ya kwa? Wunjula ɓimutoho ɓa ki puraŋ, ko mijiviɗ masa bo ti Galile anta.»

Ngwas migi madama

⁵³ A dirba nah ko wa gar aru ngi hay naŋ.