Ɓimezle ngi Yesu Kristu ZAŊ mitil di mi 5 - Bible en langue guiziga

Yesu miɗiya mbur muhulɓa

¹ A dirba nah, Yudehey ara gam muguzlum ngi sipi taŋ, Yesu kwana aru nga Zeruzalem a diga ya.

² Futuŋ mulaka ti li ada a Zeruzaleme, gweˀ avu mizlingre ngi tumuŋhoy, palakay zlum gun hirnga naŋ. A zilaka ti mi Hebere «Betzata».

³ Misi jijihey haɗa a hinam asi palakay tuwa: dangaray, jegwerey ati mizli muhulɓahay. [A kutukom ɓa yam a wusu.

⁴ Asi pas mekeleme, modro ngi Bumbulvuŋ ada po sar ng'ar futuŋ, a wusa yama, yo mbur misi jiji mici le dumbuŋ a dirba yam muwus le na, ko naŋ ti jiji wanaka gar na, a mbul tir jiji naŋ.]

⁵ Mbur misi ble ada akẽh, a gi di le vi kukur makir nga dangafaɗa.

⁶ Yesu mupuraŋ tuppo, yo naŋ micina a zik di le kahana diga zlezle si na, a ɓaŋ: «Ki wuɗ le ɓa ki ɗiyi kwa?»

⁷ Mbur misi ble tuwa a mbiɗaŋ di: «Hirak ti yam mizla le ɓa a wus na, mbur ɗu anta ɓa a ci ti ya ng'ar futuŋ ta, Buy. Yo ɓa hã i sara ci ar yama tikeˀe na, mbur mekelem a ci le dumbuŋ ar ya si.»

⁸ Yesu a ɓaŋ: «Slikiɗi, zuɓa kitihin ɗike, a ru.»

⁹ Angi nah vuna si na, mbur a ɗiyi. A zuɓa kitihin naŋ, dar a ru. Dambalaka tapasa, i hin ngi sabat.

¹⁰ Yudehey a ɓaka mbur miɗiyi tuwa: «Dana i hin ngi sabat, ɓa ki zuɓa kitihin ɗike na, jiviɗ naŋ anta.»

¹¹ Amma naŋ a mbiɗa taŋ di: «Miɓiy: ‹Zuɓa kitihin ɗik, a ru› na, i mbur miɗiyiy vuna.»

¹² Dar a cufuɗakaŋ: «Muɓuw: ‹zuɓa kitihin ɗik, a ru› vuna, i waka?»

¹³ Amma mbur miɗiyi tuwa a si na Yesu i mana ta, asi Yesu a kirih le baˀ avu zigiduw misi angi li nah.

¹⁴ A zikam, a dirba nah ma na, Yesu a lumaŋ angi hay ngi Bumbulvuŋ ma, a ɓaŋ: «Ani wurenna ki ɗiyi le muduba so. Anja ki gi mungra mata, ɓa ɓi malambaˀ mifineˀ hana a lumuw mata.»

¹⁵ Mbur tuwa ara ɓa da Yudeheye, i Yesu miɗiyaŋ.

¹⁶ Zle tapasa, Yudehey a zlaka sipa Yesu nder nder, asi naŋ miga gwat hana tapas hin ngi sabat na.

¹⁷ Amma Yesu a mbiɗa taŋ di: «Baha ara gi slra hã wurenna, yo ya kwana, i ra gi slra ya.»

¹⁸ Zle tapasa, Yudehey a puram jiviɗ ti gidaŋ ɓa a zizakaŋ. Anta vur naŋ mangila hin ngi sabat tewle ta, amma vur naŋ mazila Buymisemuŋ i Cine nga naŋ na ma. Yo a ga vu naŋ rak rak ati Buymisemuŋ.

Gidaŋ ngi Mangal ngi Buymisemuŋ

¹⁹ Dar Yesu a mbiɗa taŋ di: «Gisiŋ gisiŋ, yi ɓukum na: Mangala, naŋ anta gi gwat ko loŋ ti hirnga naŋ gu ta, amma sey a gi di i gwat naŋ mapura avu Cine. Asi gwat Cine maga na, Mangala, a ga kanah vuna ya.

²⁰ A mbiɗeˀvra: Cine a wuɗ Mangala, yo a bigaŋ gwat naŋ maga gar. A sa bigaŋ slra madiɗa mifineˀ tayna ma, hã a sa zumukum hirnga.

²¹ Naŋ kine, Cine maslikiɗa mumucahay waɗ naŋ mavula taŋ siifa na, naŋ kanah ya, Mangala kwana, a vul siifa da mbur naŋ muwuɗ le gar.

²² Baha anta gi kiita da mbur ta, amma a pula gi kiita gar a haŋ Mangal,

²³ ɓa mizli gar a ɗuvaka hirnga da Mangala ka taŋ maɗuvaka da Cine. Mbur maɗuva hirnga da Mangala ta na, naɓa anta ɗuva da Cine mislino di vuna ta ya.

²⁴ Gisiŋ gisiŋ, yi ɓukum na: mbur macina mingiɓi ɗu, yo matiɓa mbur mislino ya na, naŋ da ti siifa ngi sete. Anta gakaŋ kiita geˀ le ta, amma a tuwuɗ le tir muco ng'ar siifa si.

²⁵ Gisiŋ gisiŋ, yi ɓukum na: Pas naŋ ara ndilawa, wurenna a ndilo le vuna si. Tapasa mumucahay a sa cinam ˀay ngi Mangal ngi Buymbulvuŋ, yo micin naŋhay gar na, a sa ndiram ti siifa.

²⁶ Cine naŋ ti gidaŋ ngi vula siifa da mizli, naŋ kanah ya, a vula gidaŋ da Mangala ɓa a vula siifa da mizli.

²⁷ A vulaŋ gidaŋ ngi gi kiita, asi i Mangal ngi mburu.

²⁸ Anja ɓi tayna gar a zumukum hirnga mata! Pas nah ara ndilawa ɓa mizli mumucahay misi angi zivihey gar a sa cinam ˀay naŋ.

²⁹ Yo a sa bam tir zivi taŋhaya. Migi gwat mezlehey a sa slikiɗam ng'ar li ngi siifa, migi gwat malambaˀhay a sa slikiɗam ng'ar li ngi kiita.

³⁰ Ya ti hirnga ɗu, y'anta gi gwat ko neˀ ta. Yi ga kiita weˀe avu ya macin, yo kiita ya maga, naŋ jeŋŋe, asi i sipi di i gwat ya mawuɗ ta, amma gwat mbur mislino ya mawuɗo.

Sedewo ar Yesu

³¹ «Da i ra ga sedewo ngi hirnga ɗu tehhe a muŋ na, naɓa mizli anta sa tiɓaka ta.

³² Amma maga sedewo ɗu i mbur mekelem, yo yi si na le, sedewo naŋ maga ar ya na, naŋ jeŋŋe gisiŋ.

³³ Kumo, ki slinam mizli ng'avi Zaŋ. Sedewo naŋ miga na, naŋ jeŋŋe gisiŋ.

³⁴ Avi ya na, anta ɓa hã mbur a gi sedewo ar ya ta, amma yi ɓi kahana, ɓa ki laham.

³⁵ Zaŋ i lampe mija vu le ava, mapusluɗa li. Yo ki wuɗam le zleˀe haɗa ɓa ki zikam neˀ ti mumul ar li minjahha naŋ na.

³⁶ Na, sedewo ya maga na, naŋ fineˀ ngi Zaŋ, i slrahay Baha muvuliy taŋ ɓa i ga taŋ. I ra ga taŋ. Maga sedewo ɗu, i Baha mislino ya na, i naŋ.

³⁷ Miga sedewo ɗu i Baha mislino ya vuna. Amma kumo, ki cinaka ˀay naŋ ɗaˀ ta, ki puraka hiri naŋ ɗaˀ ta ma.

³⁸ Yo mingiɓi naŋ naŋ anta a mevel kumo ta, asi ki tiɓaka mbur naŋ mislino di na ta.

³⁹ Ki ra wunjilaka Ɓimutoho, asi ki ra wulkam kaɓa kisa lumam siifa ngi sete angaŋ. Dambalaka i Ɓimutoho nah vuna magi sedewo ar ya!

⁴⁰ Amma kum anta ngumam soko ng'avi ya, ɓa ki lumam siifa ngi sete ta.

⁴¹ Dudok ngi mizli magikiy di na, y'anta tiɓa ta.

⁴² Na zle, yi sinukum le, wuɗa Buymisemuŋ anta a hur kumo ta.

⁴³ Yi so ti slimiɗ ngi Baha, ki ngumam tiɓikiy ta. Amma da mbur mekelem a so le ti slimiɗ naŋ tehhe a muŋ na, kisa tiɓam di i naŋ jaka.

⁴⁴ Kumo, ki vulam dudoko ar wala kum tehhe a muŋ, kum anta sipam dudok Buymisemuŋ pal naŋ mavula na ta ma na, anja kisa tiɓikiy mbri mbri zleˀe ka?

⁴⁵ Anja ki waka kaɓa i ya masa widi ti kum a mbuŋ Baha ta. Moyis, kum muɗuvaka wuluk kum taˀ anga na, i naŋ masa widi ti kum.

⁴⁶ Naŋ kine, da ki tiɓaka Moyise le zleˀe na, anja ani ki tiɓikiy le ya, asi Moyis a tuh di i ɓi miɓi vur ya.

⁴⁷ Amma da ki ngumam tiɓa ɓi naŋ mutoho na ta na, naɓa kisa tiɓaka mingiɓi ɗu mbri mbrike?»