Ɓimezle ngi Yesu Kristu ZAŊ mitil di mi 18 - Bible en langue guiziga

Mijaka Yesu

¹ A dirba Yesu miɓi kahana na, a ram ati mizli ngiseˀeheye nga dubazaw Kedroŋ. Jarne ada diga, a cam ng'araŋ ati mizli ngiseˀeheye.

² Dambalaka Yudas, mbur muvul naŋ ɓa a jaka na, a si na li nah le, asi Yesu ati mizli ngi seˀeheye, a kusom le a diga is mbeˀ mbeˀ si.

³ Yudas a ki ɓaˀ a mbuŋ ngay ngi sojehey ati soje mijigina hay ngi Bumbulvuŋhoy, masay madiɗahay ati Farisahay muvuloko taŋ. A cam ng'ar jarne, taŋ ti daliivuhoy, lampehey waɗ gwat ngi vurumoy a haŋ.

⁴ Yesu, gwat masa gi ava gar na, a si na le, a kirih, a ɓa taŋ: «Ki ram ti sipi waka?»

⁵ A mbiɗakaŋ di: «Yesu mbur Nazarete.» Yesu a ɓa taŋ: «I ya vuna.» Naɓa Yudas, mbur mavulaŋ ɓa a jaka tuwa, naŋ da deŋ a wuzla taŋ akẽh.

⁶ Yesu miɓa taŋ ɗaˀ: ‹I ya si› na, a didirkam murdirba, a ndilam a ruwuy.

⁷ Yesu a cufuɗa taŋ ava ma: «Ki ram ti sipi waka?» A ɓakaŋ: «Yesu mbur Nazarete.»

⁸ Yesu a mbiɗa taŋ di: «Yi ɓukum di le, i ya vuna. Da ki sipam di i ya na, pulaka mizli tayna.»

⁹ Naŋ kine, mingiɓi Yesu miɓa zleˀe tuwa a gi le muduba, asi a ɓi zleˀe na: «Baha, ko yi zizi mbur pal a wuzla mizli ka muvuliy taŋ na ta.»

¹⁰ Maslalam ada avu Simoŋ Piyere, a muɗo di, a nguma gawla ngi masay madiɗa a mbuŋ Buymisemuŋ, a bukoŋ slimiɗ vay hazumo kirac. Gawla nah, a zilaka Malkus.

¹¹ Amma Yesu a ɓa Piyere: «Ca maslalam ɗike ng'ar hay a muŋ. Sikiɗ ngi bonoy Baha muvuliy di na, yi sa mata kwa?»

Miram ti Yesu nga mbuŋ Han

¹² Dar sojehey ati madiɗa taŋ waɗ Yude mijigina liheye, a jaka Yesu, a juwakaŋ.

¹³ A ram ti Yesu dumbuŋ ngi hay Han ɗagay. Han i jomo ngi Kayif, masay madiɗa a mbuŋ Buymisemuŋ angi vi nah.

¹⁴ Dambalaka Kayif i mbur miɓa Yudehey zleˀe: «Zuwen mbur purla mamuc vur mizli gar» tuwa.

Piyer miji mi: i mbur ngisi Yesu ta

¹⁵ Simoŋ Piyer waɗ mbur ngi si Yesu mekelem pal a sipaka Yesu. Masay madiɗa a si na mbur ngi si Yesu mekelem tuwa le. Vurˀe, a ci asi Yesu ngi hay masay madiɗa a mbuŋ Buymisemuŋ vuna.

¹⁶ Amma Piyere, naŋ a cici deŋ avra, gweˀ avu mizlingre. Mbur ngi si Yesu mekelem, masay madiɗa a mbuŋ Buymisemuŋ misinaŋ tuwa a bawa, a ɓa ngwas mijigina mizlingre, a ci ti Piyere.

¹⁷ Ngwas mijigina mizlingre tuwa a ɓa Piyere: «Ka kwana, ki mbur ngi si mizli ngi mbur hana vuna ya ta kwa?» Piyer a mbiɗaŋ di: «Ĩˀĩ, yi mbur ngi seˀe ta.»

¹⁸ Gawlahay ati mijigina lihey a bulam vu le, ara naˀaka, asi himiɗe yaɓ yaɓ haɗa. Piyere naŋ da deŋ avu taŋ, ara niˀi ya.

Masay madiɗa mucufuɗa Yesu

¹⁹ Dar masay madiɗa a mbuŋ Buymisemuŋ a zla a cufuɗa Yesu vur mizli ngi seˀehey waɗ vur gwat naŋ madubuna da mizli.

²⁰ Yesu a mbiɗaŋ di: «Yi ɓa le njah a mbuŋ mizli gar, y'ada i dubun gwat ndrehhe da mizli ar hay ngi dira dibiɗey waɗ ar hay ngi Bumbulvuŋ, li Yudehey gar macikilam anga, amma ko yi ɓi ɓi yaŋ ti yaŋ neˀ ɗaˀ ta.

²¹ Ki cufuɗ di i ya vur mike? Ɓi ya miɓa gar na, cufuɗa avu mizli micinaka. Mingiɓi ɗu ya miɓa na, a sinaka le kuy kuy.»

²² Yesu miɓi kanah na, mbur pal a wuzla mijigina lihey misi akẽh a caŋ babarva paw, a ɓaŋ: «Ki mbiɗa mi da masay madiɗa a mbuŋ Buymisemuŋ kanah kwa?»

²³ Yesu a mbiɗaŋ di: «Da yi ɓi ɓi malambaˀ le na, bigiy di. Amma da yi ɓi di i ɓi mezle na, ki kiɗiy vur mike?»

²⁴ Angi nah ma na, Han a slin ti Yesu kaˀ kaˀ kine da Kayif, masay madiɗa a mbuŋ Buymisemuŋ.

Piyer a ji mi ma ni, a si na Yesu ta

²⁵ Hirak ti nah na, Simoŋ Piyere naŋ da niˀi vu akẽh. A ɓakaŋ: «Ka kwana, ki mbur ngi wuzla mizli ngi si mbur hana ya ta kwa?» Amma Piyer a ji mi: «Ĩˀĩ, yi mbur ngi seˀe ta.»

²⁶ Mbur pal a wuzla gawla ngi masay madiɗa a mbuŋ Buymisemuŋ, muy ngi mbur Piyer mubukoŋ slimiɗ tuwa, a ɓa Piyere: «Yi purukum le cuwa angi jarne a diga ta kwa?»

²⁷ Amma Piyer a ji mi ma ni. Hirak ti nah vuna si na, kucukur a ji ˀay.

Miram ti Yesu nga mbuŋ Pilat

²⁸ Put ngi miprik prik naŋ na, a bam ti Yesu ti hay Kayife, a ram di ngi hay buy miwi li. Mizli miram di na, a cam ngi haya ta, vur taŋ masa ndiram ti dili, naɓa a sa zumam gwat ngi muguzlum Paka ta.

²⁹ Pilat a bawa, a sa luuma taŋ avra, a ɓa taŋ: «Ki wudam ti mbur hana asi ɓi mike?»

³⁰ A mbiɗakaŋ di: «Da mbur hana a gi gwat malambaˀ ta na, i soko di ng'avi ka ma kwa?»

³¹ Dar Pilat a ɓa taŋ: «A ram di, kum vuna gakaŋ kiita kaslsla kaɓa Ɓimujuwa kumo.» Yudehey a ɓakaŋ: «Kiɗa mbur vagaya, jiviɗ naŋ anta avu ndra ta.»

³² A gi kahana ɓa ɓi Yesu miɓa zleˀe na, a gi muduba. I ɓi naŋ mibiga taŋ wala ngi muc naŋ, naŋ masa muc di.

³³ Pilat a mi ngi hay a muŋ, a zila Yesu, a ɓaŋ: «Ki buy ngi Yudehey kwa?»

³⁴ Yesu a mbiɗaŋ di: «Ki ɓi di i ɓi ngi hirnga ɗik kwa? Malla i mizli mekelemey muɓukuw vur ya kwa mbrike?»

³⁵ Pilat a mbiɗaŋ di: «Yi mbur Yude kwa? I sukwi ɗik tehhe ati masay madiɗahay muvulukuw, ɓa yi juw. Na, ki gi di i gwat mi ska?»

³⁶ Yesu a mbiɗaŋ di: «Zumabuy ɗu i ngi duniya hana ta. Da Zumabuy ɗu i ngi duniya hana zleˀe na, anja ani gawla ɗuwoy a cikam vu le, ɓa a vulikiy da Yudehey a jikiy ta. Amma Zumabuy ɗu wurenna, i ngi duniya hana ta.»

³⁷ Dar Pilat a ɓaŋ: «Na, ki buy sukwani?» Yesu a mbiɗaŋ di: «Maɓi yi buy na, i ka. A yikiy, yo yi so ar duniya ɓa ngi gi sedewo vur ɓi mikaslsla. Ko wa gar mawuɗ ɓi mikaslsla gar na, a cine mingiɓi ɗu.»

³⁸ Pilat a ɓaŋ: «Ɓi mikaslsla vuna, i mike?» Ar naŋ miɓi kanah na, Pilat a bi ng'avu Yudehey a muŋ ma, a ɓa taŋ: «Avi ya na, ko yi lum ɓi ava ngi jaŋ ti kiita ta.

Migaka kiita ngi muc da Yesu

³⁹ Amma tapas muguzlum Pak gar na, ki sirkam le ɓa yi pulukum mbur dangay mbak le. Ani, ki wuɗam ɓa yi pulukum buy ngi Yudehey na kwa?»

⁴⁰ Joˀ taŋ a zlaka a tilam mi, a ɓam: «Ĩˀĩ, mbur nah ta, pula ndra Barabas!» Dambalaka Barabas vuna, i mbur mufuyo vu zleˀe ngbaŋ.