Ɓimezle ngi Yesu Kristu ZAŊ mitil di mi 11 - Bible en langue guiziga

Lazar mumucu

¹ Mbur ada, i misi jiji, a zilaka Lazar ar walahay Betani. Mariya ati sukum naŋ Marta, taŋ ar walahay nah vuna.

² I Mariya mipa urdi da sar ngi Buy Yesu, yo naŋ mutukuɗaŋ di ti himac hirnga zleˀe tuwa. Lazar misi jiji na, i sukum naŋ.

³ Sukum naŋ tayna a slinam ng'avi Yesu, ɓa a ɓakaŋ: «Buy, yeme ɗike naŋ gu ta.»

⁴ Yesu micina labara nah cin si na, a ɓi: «Anta sa muc ti jiji nah ta, amma i jiji ngi sa biga dudok ngi Buymisemuŋ, mizli a sa gaka dudok da Mangal ngi Bumbulvuŋ aseˀeŋ.»

⁵ Yesu a wuɗ Marta ati Mariya waɗ Lazara.

⁶ Na, a si na le, Lazara naŋ gu ta ngbaŋ, amma a zik hin cuw angi li naŋ misi anga tuwa ma.

⁷ A dirba nah so na, a sa ɓa mizli ngi seˀeheye: «Mukum nga hirwuy Yude.»

⁸ Mizli ngi seˀehey a ɓakaŋ: «Kumani, wureˀ ani aka, Yudehey a supukuw ɓa a kuyupukuw ti ɗugur. Ani ki wuɗ ki mi nga diga ma mbrike?»

⁹ Yesu mbiɗa taŋ di: «Hiipasa, a wuɗuk taˀ taˀ kuruˀ nga cuw ta kwa? Mbur maru digi ti papas na, anta ru tiɗam tiɗam ta, asi ara pura li minjahha ngir duniya hana.

¹⁰ Amma da mbur ara ru digi ti duvuɗ na, aru tiɗam tiɗam ɓula, asi li minjahha anta a hur naŋ ta.»

¹¹ A dirba Yesu miɓa ɓi hana na, a ɓi ma: «Ngama ndra Lazar a hinje le, amma i ra ru nga puɗukaŋ.»

¹² Joˀ mizli ngi seˀehey a ɓakaŋ: «Buy, da a hinje ti hinje na, a sa mbul.»

¹³ Dambalaka Yesu a wuɗ a ɓi di i ɓi ngi muc ngi Lazar, amma mizli ngi seˀehey a waka kaɓa a ɓi di i ɓi ngi hinje tewle si.

¹⁴ Joˀ Yesu a ɓa taŋ di njah so: «Lazar a muc le.

¹⁵ Yo i ra mumul vur kum, asi ya misi anta a diga ta na, ɓa ki tiɓikiy. Amma wurenna akum ng'avaŋ.»

¹⁶ Dar Tomas mazilaka «Misa» a ɓa mizli ngi si Yesu mekelemeye na: «Ndra kwana, akum aya, ɓa i micam bumoˀ ati naŋ.»

Yesu i mislikiɗa mumucahay, yo i siifa

¹⁷ Ti Yesu mindil a Betani na, a luuma Lazara a caka le a ruwuy, a gi le hin mufaɗ si.

¹⁸ Betani naŋ gweˀ avu Zeruzaleme, a ndila kilometir makire ta.

¹⁹ Yudehey haɗa a soko ng'avi ti Marta ati Mariya, ɓa a tikinaka taŋ ar li tuwuy sukum taŋ mumuc na.

²⁰ Marta micina Yesu ara ndilawa na, ara ji di hirngaŋ. Amma Mariya a ro a hay.

²¹ Marta a ɓa Yesu: «Buy, da k'ada aka zleˀe na, anja ani sukum ɗu na muc ta.

²² Amma yi si na le, ko wurenna kwana, Buymisemuŋ a sa vuluw gwat gar ka mucufuɗ le ava.»

²³ Yesu a ɓaŋ: «Sukum ɗik a sa mo ti siifa a muŋ.»

²⁴ Marta a mbiɗaŋ di: «Yi si na le, tapas mizli mumucahay masa slikiɗam angi hin ngi dirba na, a sa mo ti siifa a muŋ.»

²⁵ Yesu a ɓaŋ: «Maslikiɗ mbur mumuca i ya, yo siifa i ya. Mbur matiɓiy na, ko da a muc le kwana, a sa ndir ti siifa.

²⁶ Yo ko wa gar misi ti siifa, da ara tiɓiy na, naŋ anta sa muc ta ndiɗaˀ. Ki tiɓa ɓi hana le kwa?»

²⁷ Marta a mbiɗa da Yesu: «Haˀaw, Buy! Yi tiɓa le, ki Mesi, ki Mangal ngi Buymisemuŋ masawa ar duniya tuwa.»

Yesu mutuwuy

²⁸ A dirba nah na, Marta a ru, ara zilo sukum naŋ Mariya, a ɓaŋ ti miyaŋ yaŋ: «Kumani a so le, ara ziluw.»

²⁹ Mariya micina si na, a slikiɗ kutum, aru ng'avi Yesu.

³⁰ Naɓa Yesu a walahaya t'aruŋ, a ro ar li Marta miji di hirnga tuwa.

³¹ Yudehey a roko hay ati Mariya, ara tikinakaŋ ɓa a taˀa tuwuyo. Taŋ mupuraka naŋ mislikiɗ kutum, ara bi tuwa na, a sipakaŋ. Taŋ a waka kaɓa aru nga tuwuy a mizivi.

³² Mariya mindil ar li Yesu misi anga tuwa, naŋ mupura Yesu keɗ na, a hin kuɓ asi sar naŋ, a ɓaŋ: «Buy, da k'ada zleˀe aka na, anja ani sukum ɗu na a muc ta.»

³³ Yesu mupura Mariya ati Yudehey musoko aseˀe tuwa matuwam na, a jijik, a gaŋ lesle welele.

³⁴ A ɓa taŋ: «Ki kaka amaka?» A mbiɗakaŋ di: «Buy, so puraŋ.»

³⁵ Dar Yesu a tuwuy.

³⁶ Yudehey a ɓam: «Puraka, a wuɗaŋ zleˀe haɗi!»

³⁷ Amma mekelemey a ɓam: «Naŋ muwuna hiri ngi dangar tuwa na, a tika muc ngi Lazara gu mata mbrike?»

Yesu mumo ti siifa ngi Lazar

³⁸ Ar nah na, a ga Yesu welele a mevele ma, aru nga mizivi. I buutum midislaka mi naŋ ti ɗugur.

³⁹ Dar Yesu a ɓi: «Kirahaka ɗugur avra.» Marta, sukum ngi vagay Lazar a ɓaŋ: «Buy, zliv ara zĩˀĩ si, vur i hin mumufaɗ naŋ.»

⁴⁰ Amma Yesu a mbiɗaŋ di: «Yi ɓuw le, da ki tiɓiy le na, kisa pura dudok ngi Buymisemuŋ kini ta kwa?»

⁴¹ A kirahaka ɗugur tuwa avra so. Dar Yesu a zuɓa hiri nga muŋ, a ɓi: «Aw Baha, i guw sise vur ka mitiɓa mi ɗu na.

⁴² Yi si na le, ki ra tiɓa mi ɗu ndrehhe. Amma yi ɓi asi zigiduw mugun hirnga ɗu hana, ɓa a tiɓaka i ka mislino ya.»

⁴³ A dirba naŋ miɓi kahana na, a til mi ti gidaŋ, a ɓi: «Lazar, bawa!»

⁴⁴ Joˀ mbur mumuca tuwa, a bawa, saray ati haŋhaya vah vah ti gabaga, waɗ hiri mbizeˀ mbizeˀ ti zana. Yesu a ɓa mizli: «Puskakaŋ, pulaka a ru.»

Gidiɓi ngi ji Yesu

⁴⁵ Mizli haɗa a wuzla Yude tayna musoko avu Mariya, yo mupuraka gwat Yesu miga na, a tiɓaka Yesu le.

⁴⁶ Amma mekelemey a wuzla taŋ a ram ng'avi Farisahay, a slufaka taŋ ɓi ngi gwat Yesu miga na.

⁴⁷ Dar masay madiɗahay ati Farisahay a kusom ngi ngila wuy, a ɓam: «I gam mbrike? Ani mbur nah ara gi cekenehey haɗa.

⁴⁸ Da i pulaka le mbak a gi si na, mizli gar a sa tiɓakaŋ, yo romahay a sa coko, a sa hiryaka li ndra mipala, waɗ a sa hiryaka sukwi ndra!

⁴⁹ Mbur pal a wuzla taŋ, a zilaka Kayif, angi vi nah na, naŋ i masay madiɗa a mbuŋ Buymisemuŋ, a ɓa taŋ: «Kum anta slaka wala ngi ɓi ko neˀ ta!

⁵⁰ Zuwen mbur purla mamuc vur mizli gar, a funa zigiduw taˀ mazizi na le na, ki slaka wala nah ta wãˀ mbrike?»

⁵¹ Naŋ miɓi kahana na, i mingiɓi ngi hirnga naŋ ta, amma asi naŋ i masay madiɗa a mbuŋ Buymisemuŋ angi vi nah, naŋ miɓi a zlir le ɓa Yesu a muc vur sukwi Yudehey na, a ɓi di i ɓi ngi mijiviɗi.

⁵² Anta muc vur Yudehey tew ta ma, amma ɓa ngi kuso ziri ngi Buymisemuŋhoy mizliɗam hirnga gar, ɓa a tiram purla.

⁵³ Mizli madiɗahay majuwaka a mevel taŋ, ɓa a zizaka Yesu na, i ngi pas nah vuna.

⁵⁴ Yesu kwana, naŋ anta liˀi bidas a wuzla Yudeheye mata. Aru ng'ar li migweˀ avu wuzlaɓuh, ar walahay mazilaka Efrayim, a cifam ati mizli ngi seˀehey a diga.

⁵⁵ Naɓa muguzlum Pak ngi Yudeheye naŋ gweˀe. Ɓa li wun i muguzlum Pak nah vuna na, mizli ngir prokoy haɗa a ram nga buna vu taŋ a Zeruzalem.

⁵⁶ A ra sipaka Yesu, a cufuɗam vu ar hay Bumbulvuŋ, taŋ misi anga vuna: «Ki wulkam mbrike? N'anta sa sawa ar muguzlumo ta wãˀ kwa?»

⁵⁷ Masay madiɗahay ati Farisahay a ɓaka mizli na: «Da mbur misina li naŋ misi anga na le na, sey a njika ɓa a jakaŋ.»