HEBEREY 8 - Bible en langue guiziga

Yesu i masay madiɗa a mbuŋ Buymisemuŋ ndra

¹ Gwat mupuɗaw haɗa angi ɓi ndra muboko di na, anihĩ: ndr'ada ti masay madiɗa a mbuŋ Buymisemuŋ ka ndra mawuɗama. N'ada joˀ tir vay hazum ngi Buymisemuŋ Mimadiɗa misi ar janga naŋ a muŋ.

² A ra ga slra naŋ angi li mipal, mbiɗeˀvra, guɗuk migisiŋ gisiŋ ngi Bumbulvuŋ minga ti haŋ naŋ, i mbur minga ta.

³ Masay madiɗa gar na, a cifakaŋ ngi gi sedege ti gwat mavulaka taŋ ti vul waɗ ngi gi mikuli a mbuŋ Buymisemuŋ da Buymisemuŋ. Anja masay madiɗa ndra kwana, a lum gwat ngi gi sedege ya.

⁴ Da Kristu naŋ zleˀe a ruwuy na, naŋ anta cifi i masay ta, asi mizli migi sedegehey mikaslsla kaɓa ɓimujuwa miɓa vuna, t'ada si.

⁵ Amma masay tayna madilkam na, avu fotohoy, avu susuɗuk ngi gwat migisiŋ gisiŋhey a muŋ, kaɓa Buymiemuŋ miɓa ɗaˀ ɗaˀ le da Moyis ti di naŋ muwuɗ ɓa a ɗiy guɗuk mipal na. Buymisemuŋ a ɓaŋ: «Pura ɗi, ki ɗiya heˀ ka ya mubuguw di a muwã.»

⁶ Gisiŋ, slra muvula da Yesu ɓa a ga na, i slra madiɗa wãˀ fineˀ mekelemeye, asi mijiviɗ ngi jumoˀay mimezle na, i naŋ. Vur jumoˀay nah na, a cici ar gwat mimezle miɓa le ɗaˀ le na.

⁷ Naŋ kine, jumoˀay mudumbuŋ, da hereweɗ, anta ava zleˀe ta na, anja gira vu anta ngi mbiɗa ti mucuw naŋ mata.

⁸ Amma Buymisemuŋ a lum malambaˀ le avu mizli naŋhaya, a mbiɗa taŋ hirnga, a ɓa taŋ: «Ya Bumbulvuŋ i ɓi na: ani, hin ara ndilawa, tapasa, i sa jum ˀay nawaya ati Israyeley waɗ Yudeheye.

⁹ Jumoˀay ɗu nah na, anta sa gi kaɓa ya mujumo ati dideˀ taŋhay zleˀe na ta. Tapas ya mujo taŋ kaw kaw avu haŋ, ɓa ngi bo taŋ ti ngi hirwuy Ezipte. Bumbulvuŋ a ɓi ma: Asi taŋ vuna a cicam angi jumoˀay ɗu ati taŋ na ta, Vurˀe, ya kwana, yi ki slimiɗ ar taŋ mata ya.

¹⁰ Bumbulvuŋ a ɓi ma: Jumoˀay ɗu, ya masa jum ati Israyeley anihĩ: A dirba hin tayna, i sa ca ɓimujuwa ɗu ar lesl taŋ, i sa toho toh toh a mevel taŋ. I sa tiri Buymisemuŋ taŋ. Taŋ kwana, a sa tiram mizli ɗuwoy.

¹¹ Vur ɓi ngi siniy ya Bumbulvuŋ na, ko mbur masa dubuna ti dubun da mbur ngi si ruwuy naŋ, malla da sukum naŋ na, anta. Asi taŋ gar a sa sinikiy. Zle avu meciɗek taŋhay, hã avu madiɗa taŋhay.

¹² Vur i sa pula malambaˀ taŋhay avra, y'anta sa wulka mungra taŋhaya mata.»

¹³ Da Buymisemuŋ ara ɓi ɓi ngi jumoˀay nawaya na, naɓa a tiri magala le ti mudumbuŋ. Dambalaka gwat magala mira gi gal na, naŋ gweˀ ngi susuyum.