ESTER 9 - Bible en langue guiziga

Yudehey mupulam cuwal

¹ Kiya mukuruˀ nga cuw naŋ, kiya Adar tuwa, ngi hin mukuruˀ nga makir naŋ na, ɓi ngi buy miɓa ati ɓi naŋ mcica na, anja ɓa gwat nah a gi muduba zleˀe. Mesene ngi Yudehey gar ara njaham hiri zleˀe ɓa a cifam bugawla ar zudeheye. Amma ɓi a mbiɗi pirwizliˀ, mbak misa cifam bugawla i Yudehey ar mizli mihiris taŋhaya jaka.

² Walahayay, Zerses mazum buy anga anga gar na, Yudehey a kusom ar walahay taŋ, walahay taŋ, ɓa ngi kiɗa mizli muwuɗam ɓa a gaka taŋ malambaˀ tuwa vagay vagay. Ko mbur macici zlak a mbuŋ taŋ gu anta, asi mizli gar ara zluwunam ti taŋ.

³ Mizli madiɗa ngi slrahay misi ar hirwuy buy miwa gar, madiɗa ngi buy miwilihey, buy miwi lihey ati migi slra ngi buyoy gar na, taŋ tisi Yudehey, asi zluwun ara ga taŋ ti Mardoke haɗa.

⁴ Gisiŋ, Mardoke i mbur madiɗa a hay buyo gwaɗ naŋ. Mizli ara zilaka slimiɗ naŋ ti mezle ar li ngi buy miwi liheye gar. Naŋ kanah, Mardoke ara tiri madiɗa nga mbuŋ nga mbuŋ.

⁵ Dar Yudehey a kiɗaka mesene taŋhaya gar ti maslalam, a ngizlaka taŋ pay pay wãˀ. A gam ti mihiris taŋhayaka taŋ mawuɗam.

⁶ A Sus, walahay hirnga vuna, Yudehey a kiɗam vagay vagaya mizli skat skat zlum,

⁷ waɗ a kiɗaka ti: Parsanedata, Dalfoŋ, Aspata,

⁸ Porata, Adaliya, Aridata,

⁹ Parmaseta, Arisay, Ariday waɗ Wayezata.

¹⁰ Mukuruˀ hanayna i ziri mizile ngi Hamanay, Haman mangal ngi Hamedata, mesene ngi Yudehey. Yudehey a kiɗaka taŋ pay. Amma ko a jam haŋ kaw le avu zlili taŋhaya ta.

¹¹ Tapasa vuna si na, taˀ ngi mizli mikiɗahay a Sus, walahay hirnga na, ɓi nah a ndil sesẽŋ avu buy.

¹² Dar buy a zla a ɓa maˀãy Estere: «A Sus, walahay hirnga na, Yudehey a kiɗam vagay vagaya mizli skat skat zlum waɗ ziri mizile ngi Hama nay kuruˀu. A ruwuy mekelemey ya mazum buy anga anga gar na, a kiɗam kite ska? Amma ki cufuɗ gwat mekelem ava ma kwa? I vuluw di. Da ki wuɗ gwat mi maka na? I guw di.»

¹³ Ester a mbiɗa da buyo: «Kumani ɗu, da ki ngum le na, Yudehey misi a Sus aka gar na, tipirike, pula taŋ jiviɗ ɓa a gam kaɓa ɓi micica magi slra wurenna. Anja ɓa a luwaka ziri mizile ngi Hama nay mukuruˀ na angi dum.»

¹⁴ Dar buy a ɓi ɓa a gaka kanah vuna si. A tilam mi ti ɓi micica ngi buyo a Suso. Waɗ a luwaka ziri mizile ngi Hamanaya kuruˀ taŋ.

¹⁵ Ngi hin mukuruˀ nga mufaɗ ngi kiya Adar tuwa, Yudehey a kusom a Suso maso. A kiɗam mizli skat skat makir. Amma, ko a jam haŋ neˀ le avu zlili taŋhaya ta.

¹⁶ Mizli Yude ngir li mekelemey ngi buy miwi liheye, taŋ kwana, a kusom ngi laha hutuŋ taŋ. A pulam vu avu mesene taŋhaya, a kiɗam mizli mihiris taŋhaya durmuk kukur tarnaˀ nga zlum. Amma ko a jam haŋ kaw le avu zlili taŋhaya ta.

¹⁷ Naɓa i hin mukuruˀ nga makir naŋ ngi kiya Adar. Ngi hin mukuruˀ nga mufaɗ naŋ na, a musukom vu. A zumam ɗaf ngi muguzlum ti mumul.

¹⁸ Mizli Yude ngi Susoyo, taŋ a kusom ngi pula cuwala ti hin mukuruˀ nga makir ati hin mukuruˀ nga mufaɗ naŋ. Ngi hin mukuruˀ nga zlum naŋ na, a musukom vu, a zumam ɗaf ngi muguzlum ti mumul.

¹⁹ Vurˀe Yude ngir prokoyo, hin mukuruˀ nga mufaɗ ngi kiya Adar na, a gam di hin ngi mumul taŋ, ngi zuma ɗaf ngi muguzlum, ngi slina gwat ar wala taŋ.

Ɗuva virzi ngi muguzlum ngi wulka ɓi mucuh le

²⁰ Gwat mucohom tayna gar na, Mardoke a toho ɓi nah toh toh ar ɗerewol. A a slin ti letirey da Yude migweˀ gweˀ ati mikileŋ kileŋhey misi angi hirwuy buy Zerses miwa gar.

²¹ A ɓa mizli angi letir tayna, anja vur vi gar na, a gam mezegwel ngi muguzlum ngi kiya Adar, angi hin mukuruˀ nga mufaɗ ati hin mukuruˀ nga zlum naŋ.

²² Asi mike na, hin tayna, i hin Yudehey mulumam di musuko vu avu mesene taŋhay, i kiya ngi gwat mimbiɗi pirwizliˀ avu taŋ, hin ngi bonoy mimbiɗi hin ngi mumul, hin ngi tuwuy mitiri hin ngi muguzlum. Hin tayna a sa gam i hin ngi zuma gwat ngi muguzlum waɗ ngi mumul, hin ngi slin ti gwatay ar wala taŋ, yo ngi slin ti gwat ngatara da misi murgahay.

²³ Yudeheye, sirik taŋ muɗuvaka virzi naŋ na, a tiɓaka le ɓa a gaka caˀakanah. Yo ɓi Mardoke mutoho taŋ di tuwa kwana, a tiɓaka le, ɓa a sipaka kanah.

²⁴ I ɓi ngi Haman, mangal ngi Hamedata, dideˀ ngi Agak, mesene ngi Yudehey. Haman a gi gidiɓi zleˀe ar Yudeheye, a gi ceregezleŋ mazilaka purim, ngi pura hin mezle, ɓa a ngizla Yudeheye, ɓa a kiɗa hilfa taŋ kuɗup wãˀ.

²⁵ Amma ɓi nah mindil avu buyo buy a ɓi ɓa gidiɓi malambaˀ ngi Haman miga a hirnga Yudehey na, anja a mbiɗi nga hirnga naŋ a muŋ, yo ɓa a luwakaŋ naŋ vuna ati ziri naŋ mizileheye angi dum, naŋ vuna miɗiya na. Buy a vula jiviɗe ɓa a tohoko ɓi nah toh toh le angi ɗerewol.

²⁶ Vurˀe, a zilaka hin ngi muguzlum tayna Purim, mbiɗeˀvra ceregezleŋ. Yudeheye, asi mingiɓi ngir letir ati gwat taŋ mupuraka ti hiri taŋ waɗ ɓi mindilo avu taŋ tuwa gar na,

²⁷ a tiram ti hin nah, i sirik mandir caˀa vur hirnga taŋ, vur dideˀ taŋhay waɗ vur mizli gar masa tiram Yudehey. Hin mucuw, Mardoke muɗuva taŋ tayna, vur vi gar na, a sa sipaka ɓi nah, anta sa puyukom di hirnga ta.

²⁸ A hay mbur gar, ar li buy miwa gar, yo ar walahay madiɗa gar na, mizli a sa wulkaka hin tayna keŋ, a sipaka ɓi nah avu dideˀ avu dideˀ. Hin ngi Purim t'ayna, anta sa kiɗ a wuzla Yudeheye ta, yo wuluk nah a sa ndir keŋŋe a hirnga sukwi ngi Yudeheye hã ngi sete.

²⁹ Maˀay Ester, zuŋ ngi Abihayil waɗ Mardoke, mbur Yude, a tohom letire sar mucuw naŋ kutum, ɓa a ndir i ɓi migisiŋ gisiŋ wãˀ.

³⁰ Dar a slinam ti letireye da Yudehey gar misi ar li miwal wal, buy miwi lihey miwaka taŋ, miskat ti kukur cuw nga tarnaˀ, asi ruwuy ngi buy Zerses gar. Letir misi mingiɓi ngi vula zuy, yo ɓa mizli a cifam setette.

³¹ A ɗuvaka hin ngi Purim tayna angi hin taŋ, kaslsla kaɓa Mardoke, mbur Yude ati maˀãy Ester muɗuvaka taŋ di. A ɗuvaka taŋ di vur hirnga taŋ vuna ati dideˀ taŋhay, a ɗuvaka taŋ di jom ti ɓi ngi dalyam ati ɓi ngi tuwuy taŋ na ma.

³² Ɓi miɓa vur muguzlum Purime, i Ester muɗuva ti mingiɓi naŋ, waɗ ɓi nah toh toh ar ɗerewol.