ESTER 5 - Bible en langue guiziga

Ester mupur jiviɗ ngi ndil ng'avu buy

¹ Ar kiɗa mi ngi hin mimakir naŋ tuwa na, Ester a ka zana naŋ ngi maˀãyaya, waɗ a cici deŋ a wazlaray buyo, hiri pulaˀ ng'avu mugum ngi buyo. Buyo, a ro joˀ zleˀe ar janga naŋ ngi buy ar mugum naŋ, hiri pulaˀ nga mizlingre.

² Akẽh na, buy mupura maˀãy Ester mideŋ a wazlaray tuwa keɗ na, a gaŋ kuy teˀe. Buy a tilaŋ ganday nga naŋ ngi ɓiri tapasl tapasl mikaw asi haŋ naŋ na. Ester a kirih, a ja haŋ kaw avu mi ngi ganday ngi buyo.

³ Dar buy a cufuɗaŋ: «Maˀay ɗu Ester, i mi migi ka? Ki wuɗ mike ma? Ko da i reta avu zumabuy ɗu kwana, i juw vu le ɓa i vuluw di.»

⁴ Ester a mbiɗaŋ di: «Kumani ɗu, da ki ngum le na, anja ki soko dana ati Haman ng'ar ɗaf ngi muguzlum ya mida vur naŋ na takwa.»

⁵ Buy a slin ɓa ara ɓaka Hama na, a wus vu kutum ng'ar zil ngi Estere, anja a buluw ta. Dar buy ati Haman tuwa, a ram cuw taŋ ng'ar ɗaf ngi muguzlum ngi Estere so.

⁶ A zumam gwata, a kiɗ mi le, a dirba nah na, buy a cufuɗa Estere: «Ki wuɗ mike Ester? Ɓa i vuluw di. Ki cufuɗ di i gwat mi avu yaka? Ko da cah avu zumabuy ɗu na kwana, i vuluw di si.»

⁷ «Ester a mbiɗaŋ di: «Kumani, gwat ya mawuɗ i cufuɗ avu ka anihĩ…

⁸ Buy ɗu, da ki puriy le kuy na, tiɓa cufuɗ ɗu, yo ga gwat ya mawuɗ ani na. Anja tipirik na, kisa soko ati Hama na ng'ar ɗaf ngi muguzlum ya masa da vur kum na ta kwa. Naɓa i sa ziluw mi ngi cufuɗ ɗik na so kumani.»

Haman miɗiyi dum muwurkak ngi dira Mardoke

⁹ Tapasa, Haman a bi ta hay Estere, ti cira hiri, mevele zuyyo. Amma naŋ mupura Mardoke keɗ a mizlingre na, a slikiɗ himaˀ ar Mardoke tuwa, asi Mardoke a slikiɗ di ta, yo a zluwun di ta.

¹⁰ Ti nah gar na, Haman a muca mevele, a mi ngi hay naŋ. A dirba nah, a slin ara zilakaŋ ngama naŋhay ati ngwas naŋ Zeres.

¹¹ Zlili naŋ mihaɗa teˀe, ziri naŋhay miheɓeheɓe, waɗ gwat buy migaŋ di gar, naŋ mucufaŋ madiɗa ngi mizli madiɗa ngi slra ngi buyoy, yo fineˀ gawla naŋhay gar na, dar a slufa taŋ di.

¹² Haman a ɓi ma: «Maˀay Ester a di ɗaf ngi muguzlum na, a zil di i ya pal ɗu muru asi buyo. Yo tiprike ma na, a zil di i ya pal ɗu masa ram ati buyo ng'ava ma kini.

¹³ Bam ti nah kwana, i pura i gwat mupuɗaw avu ya ta, asi ya mapura Mardoke, mbur Yude mua mizlingre buy na.»

¹⁴ Akẽh na, Zeres, ngwas naŋ waɗ ngama naŋhay tuwa, a ɓakaŋ na: «Inga ɓi ɓa a ɗiyam dum ngi luwa mbur, gil naŋ nga muŋ metir kukur cuw nga zlum. Ti miprik na, ɓa ki ɓa buy, a ɓi a luwaka Mardoke vuna anga, ɓaka kisa ru, mevele zuyyo ng'ar ɗaf ngi muguzlumo ati buyo sini.» Ɓi nah a cira hiri le da Hama na, a ɓi ɓa a ɗiyaka dumo so.