ESTER 3 - Bible en langue guiziga

Kire ar wala ngi ti Haman ati Mardoke

¹ Neˀ a dirba ɓi tayna mucohom na, Hama na, buy Zerses a vulaŋ li ngi slra mimadiɗa haɗa. Haman i mangal ngi Hamedata, mbur Agak. Buy a tiri ti Hama na ɗongor, a cifaŋ i madiɗa ngi mizli madiɗa ngi slra naŋhay gar.

² Gawla migi slrahay misi a mamay buyo cek cek na, a huruk hurukam, a hinam huruk huruk a mbuŋ Hama na, asi buy a vula jiviɗ nah le kanah. Amma sey Mardoke anta huruk huruk ta, anta hin huruk a mbuŋ naŋ ta.

³ Akẽh na, gawla migi slra ngi mamay buyoy tuwa gar, a ɓaka Mardoke: Ka mangila ɓi ngi buy muɗuva na vur mike?

⁴ Vur hin gar na, mizli ara ɓakaŋ di kanah, amma ko Mardoke anta cine taŋ di ta na si. Mardoke vuna ada ɓa taŋ zleˀe, naŋ i mbur Yude. Vurˀe, mizli ara faka ɓi nah da Hama na, ɓa a pura da Mardoke naŋ da nga naŋ nga naŋ ar gwat ngi gi naŋ kwana.

⁵ Haman a pura na, Mardoke anta huruk huruk a mbuŋ naŋ ta, yo naŋ anta hin huruk a mbuŋ naŋ ta ma. Dar Haman a slikiɗ himaˀ.

⁶ Haman a pura ɓa a kiɗ vagay i Mardoke pal naŋ na, preˀe, asi mizli a ɓakaŋ di le, Mardoke i mbur Yude. Haman ara pur jiviɗ ɓa ngi ngizla sukwi ngi Mardokeheye, mizli Yudehey misi asi ruwuy ngi Zerses mazum buy anga gar.

⁷ Ngi kiya muɓulaˀ naŋ, a mbiɗeˀvra, kiya mazilaka Nisaŋ, angi vi mukuruˀ nga cuw naŋ ngi zumabuy ngi Zerses na, mizli a gam ceregezleŋ mazilaka Purim mbuŋ Hama na,, ɓa ngi luuma hin mezle. A gaka vur hine vur hine, yo vur kiya vur kiya. Ceregezleŋ a diɗ ar kiya mukuruˀ nga cuw naŋ, a mbiɗeˀvra, kiya Adar.

Haman mujuw vu ngi ngizla Yudehey

⁸ Akẽh na, Haman a ɓa buy Zersese: «Kumani, mizli ada na, sukwi taŋ gwah pal, taŋ suɓulak a wuzla mizli ngir li buyoy miwaka taŋ gar asi ruwuy ɗik, ka mazum buy anga gar. Ɓimujuwa nga taŋ naŋ pal avu ngi mizli gar. Yo ɓi ngi ka buy mujuwa na, taŋ, t'anta sipaka ta. Ɓa ki pula taŋ setette kanah na, ko t'anta pulukuw gir neˀ ta.

⁹ Da ki hĩyã le na buy, ɓi ɗaˀ si na, i tohom ɗerewol toh toh ɓa ngi ngizla taŋ. Ya kwana, yi ra vul suloy bara kilo durmuk skat skat makir a haŋ migi slra ngi si ruwuy ka mazum buy anga gar, ɓa taŋ kwana, a sa paka ng'ar zlili ngi ɗik ka buyo.»

¹⁰ Ar nah na, buy a cuko dangwa naŋ ngi muzuŋ haŋ, a ca da Haman mangal ngi Hamedata, mbur Agak, mesene ngi Yudeheye.

¹¹ A dirba nah na, buy a ɓa Hama na: «Mbak dala ɗike gwat ɗiki, yo mizli tayna kwana, ka gi ti taŋ kaɓa ka muwuɗu.»

¹² Ti hin mukuruˀ nga makir ngi kiya mudumbuŋ na, a ziloko mizli mutoho ɗerewol ngi buyoyo cek cek. Haman a ɓa taŋ, ɓa a tohom letirey kaɓa naŋ mavula taŋ jiviɗ ngi tuh naŋ. A tohoko da mijingaˀ ngi buy miwi li ngir lihey, da buy miwi lihey purla purla gar, da buy ngi wuzla sukwi ngi mizli pal pal gar. A tohoko ng'ar li ngi buy gar, kaɓa toho gwat nga taŋ, yo da sukwi ngi mizli gar ti mi taŋ ti mi taŋ. A tohoko ti slimiɗ ngi buyo waɗ haŋ naŋ taˀ taˀ araŋ.

¹³ Akẽh na, a slinam ti letireye kutum kutum ng'ar lihey, buyoy miwaka taŋ gar asi hirwuy ngi buy Zerese. I letir ngi vula jiviɗ ngi ngizla Yudehey, ngi kiɗa taŋ vagay vagay, yo waɗ ngi ngizla hilfa taŋ cek, gawla ati diilihey, midigilahay, ziri ati ngwasay gar. Ɓa a ngizlaka taŋ pay ar hin purla si, i hin mukuruˀ nga makir ngi kiya mukuruˀ nga cuw naŋ, a mbiɗeˀvra, kiya Adar. Yo ɓa a hilaka zlili taŋhaya ma kini.

¹⁴ Ar li ngi buy miwi li gar na, letir nah a tiri le i ɓi micica, ɓa a tilam di mi da mizli gar, ɓa mizli a wam vu weˀ le vur hin muɗuva tuwa.

¹⁵ Buy miɓi ɗaˀ si na, misliney a wusam vu kutum kutum ng'ar liheye si, yo ɓi micica nah, a tilam di mi le a Sus, walahay hirnga. Hirak ti nah na, naɓa buy ati Haman a cifam le, ara sam mbaazla. Amma walahay Sus taˀ gar na, ɓi nah a ga taŋ ngirkik lambaˀ.