ESDRAS 8 - Bible en langue guiziga

Yudehey mukusaka Esdras ti Babiloŋ

¹ Ti Artakzerses mazum buyo, buy ngi hayay, vur tizer taŋ vur tizer taŋ, ndra miram bummoˀ ti Babiloŋ nga Zeruzaleme, slimiɗ taŋhay ani:

² Asi muy ngi Pinasaya, i Gersom, asi ngi Itama raya i Daniyel, asi ngi Daviteye, i Hatuk.

³ Mbur purla asi dideˀ ngi Sekaniyahaya. Asi muy ngi Parokoyo, i Zakari, waɗ muy naŋhay skat ti kukur zlum aseˀeŋ.

⁴ Asi muy ngi Pohat-Moˀapaya, i Eliyohenay, mangal ngi Zeraya, mizli skat skat cuw aseˀeŋ.

⁵ Asi muy ngi Zatuhoy, i Sekaniya, mangal ngi Yaziyel, mizli skat skat makir aseˀeŋ.

⁶ Asi muy ngi Adiŋhey, i Ebet mangal ngi Yonataŋ, mizli kukur zlum aseˀeŋ.

⁷ Asi muy ngi Elamay, i Yesaya mangal ngi Ataliya, mizli kukur tarnaˀ aseˀeŋ.

⁸ Asi muy ngi Sefatiyahay, i Zebadiya mangal ngi Mikayel, mizli kukur dangafaɗ aseˀeŋ.

⁹ Asi muy ngi Yoˀapaya, i Obadiya mangal ngi Yehiyel, mizli skat skat cuw ti kuruˀ nga dangafaɗ aseˀeŋ.

¹⁰ Asi muy ngi Baniheye, i Selomit mangal ngi Yosifiya, mizli skat ti kukur merkeɗ aseˀeŋ.

¹¹ Asi muy ngi Bebayay, i Zakari mangal ngi Bebay, mizli kukur cuw nga dangafaɗ aseˀeŋ.

¹² Asi muy ngi Asgatay, i Yohanaŋ mangal ngi Hakataŋ, mizli skat ti kuruˀ aseˀeŋ.

¹³ Dideˀ ngi dirbahay wãˀ asi muy ngi Adonikamaya, i ti Elifelet, Yehiyel, Semaya, waɗ mizli kukur merkeɗ asi taŋ.

¹⁴ Asi muy ngi Bigivayay, i ti Utay ati Zakur, waɗ mizli kukur tarnaˀ asi taŋ.

Esdras mujuw vu ngi mi nga Zeruzalem

¹⁵ I kuso mizli tayna gweˀ a mi mizaw mabi a Ahawa, i pam walahay guɗuk a diga, i gam hin makir. I pura mizli ati masayaya keɗ keɗ na, ko dideˀ ngi Levi anta purla le ta.

¹⁶ Dar i slin buyoy, i ti Eliyezer, Ariyel, Semaya, Elnataŋ, Yarip, Elnataŋ, Nataŋ, Zakari, Mesulam, waɗ Yoyarip ati Elnataŋ, mizli madubunaka ɓimujuwa da mizli.

¹⁷ I ɓa taŋ ɗaˀ, a ram ngi hay Ido, buy ngi Kasifiya. Yo i ɓa taŋ ɓi taŋ masa ra ɓaka da Ido ati sukum naŋhay, gawla migi slrahay a Kasifiya walahay meciɗek, ɓa a soko ndra ti mizli ngi gi slra ar hay ngi Buymisemuŋ ndra.

¹⁸ Mbele Buymisemuŋ majigina ndra ti haŋ naŋ mezle tuwa na, a soko ndra ti Serebiya, mbur misi lesl haɗi, i muy ngi Mali, dideˀ ngi Levi, mangal ngi Zakop, waɗ ziri naŋhay ati sukum naŋhaya, a gam le jom gar, mizli kuruˀ nga dangafaɗa,

¹⁹ Hasabiya waɗ Yesaya aseˀeŋ, Yesaya i muy ngi Merari, waɗ sukum naŋhay ati ziri taŋhaya, a gam le jom gar, mizli kukur cuw.

²⁰ A soko ti mizli le skat skat cuw ti kukur cuw ma, i mizli muwuna taŋ hĩˀĩ, daɗ daɗ ti slimiɗ taŋ, ngi gi slra ar hay ngi Bumbulvuŋ, mizli Davit ati buyoy mihilaka taŋ ngi gi slra ngi levihey zleˀe.

²¹ A ciki mizaw Ahawa tuwa na, i til mi ti ɓi ngi dalyam, i hinam hirnga a mbuŋ Buymisemuŋ ndra, ɓa a ga ndra mezle, i zuɓaka mulaka jam jam ati ziri ndrahay waɗ ti gazlanga ndraˀahaya.

²² Asi mike na, ɓa i cufuɗa buyo, a vula ndra sojehey ati misi pilisey ngi jigina ndra avu mesene ndrahay a jiviɗe na, kay i mesem. Asi i ɓaka buyo le zleˀe: «Mizli masipaka Buymisemuŋ ndra gar na, ara jigina taŋ ti haŋ naŋ, amma mizli mapulakaŋ fuk na, himaˀ naŋ a zuɓ ti gidaŋ ar taŋ gar.»

²³ Joˀ i gam dalyama so, i cufuɗaka Buymisemuŋ ɓa a ga ndra mezle, a cine diradibiɗ ndra le.

²⁴ A dirba nah, i hil buy masayay kuruˀ nga cuw sek pal, waɗ Serebiya, Hasabiya ati sukum taŋhay kuruˀ.

²⁵ Ɓiri bara, ɓiri tapasl tapasl waɗ gwat mupuɗaw puɗaway, buy ati mukuti vu naŋhay, mizli madiɗa ngi slra naŋhay waɗ Israyeley misi asi ruwuyo, micikilaka vur hay ngi Buymisemuŋ ndra na, i wa taŋ di weˀ weˀ ti kilo.

²⁶ I vula taŋ di asi haŋ taŋ, ɓiri bara, ton kukur cuw, gwat mupuɗaw puɗaw ngi ɓiri barahay, ton makir, waɗ ɓiri tapasl tapasl, ton makir,

²⁷ kisa ngi ɓiri tapasl tapaslay, cikili taŋ suloy ngi ɓiri tapasl tapasl gabal, waɗ tutuŋ mukuleɗ kuleɗ ngi ɓiri gazahay cuw, taŋ kuyu gwatta, puɗaw taŋ kaɓa ɓiri tapasl tapasl.

²⁸ Dar yi ɓa taŋ: «Kum i mizli muvulahay le da Bumbulvuŋ, gwat hanayna kwana i muvulaŋ taŋ le ya, ɓiri bara ati ɓiri tapasl tapasl hanayna, i gwatay mizli muvulaka taŋ ngi mongoy taŋ da Bumbulvuŋ, Buymisemuŋ ngi dideˀ kumoy.

²⁹ Jiginaka taŋ kuy kuy, hã ki ndilam, ki ra waka taŋ ti kilo a Zeruzaleme, ar viŋ ngi hay Bumbulvuŋ, a mbuŋ masay madiɗa hay ati levihey, waɗ a mbuŋ buy ngi hayay ngi wuzla Israyeleye.»

³⁰ Akẽh so na, masayay waɗ levihey, a hilaka ɓiri bara ati ɓiri tapasl tapasl waɗ gwat muwahay ti kilo tuwa, ɓa a ram taŋ nga Zeruzalem, ng'ar hay ngi Buymisemuŋ ndra.

Zuɓa mulak sesẽŋ kasl a Zeruzalem

³¹ Hin mukuruˀ nga cuw ngi kiya mudumbuŋ na, i slikiɗam a mi mizaw Ahawa, ɓa ngi ru nga Zeruzaleme. Ndra ma ram a jiviɗe gar na, ndra asi haŋ ngi Buymisemuŋ ndra, a tiɓa ndra asi haŋ ngi mesene ndrahay waɗ ngi mipi hirihey muwam vu vur ndra a jiviɗe.

³² Ndra mindilam a Zeruzalem na, i musukam vu hin makir.

³³ Angi hin mumufaɗ naŋ na, ɓiri bara, ɓiri tapasl tapasl waɗ gwat mupuɗaw puɗawaya, i waka taŋ ar hay ngi Buymisemuŋ ndra. Dar i vulaka asi haŋ ngi Meremot, masay, mangal ngi Uriya, taŋ ati Elazar mangal ngi Pinas, waɗ levihey ada a ciki taŋ, i ti Yosabat mangal ngi Yesuwa ati Noˀadiya, mangal ngi Binuwi.

³⁴ Gwataya gar slaf slaf, waɗ weˀ weˀ taŋ ti kilo, dudok taŋ miji kilo jom gara, a tohoko toh toh le. Ti di nah na,

³⁵ mizli mijahay zleˀe, mumoko tir hirwuy mulak tuwa, a gam mikuli mizlam zlam da Buymisemuŋ ngi Israyele. Vur Israyeley gara, gusoŋ kuruˀ nga cuw, zlengerek kukur ngoltir nga merkeɗ, ziri tumuŋhoy kukur tarnaˀ nga tarnaˀ, waɗ bazuwayay kuruˀ nga cuw vur mikuli ngi pula mungra. Ginew tayna, a gam taŋ mikuli mizlam zlam wãˀ da Bumbulvuŋ.

³⁶ A dirba nah, a ɓaka ɓi ngi buy miɓa ɗaˀ le tuwa da buy miwi li madiɗahay waɗ da buy miwi li meciɗekey misi ngir tisi pas ngi pastaˀ ngi Efrata. Dar taŋ kwana, a jinaka Israyeley ar ɓi ngi hay ngi Buymisemuŋ.