ESDRAS 7 - Bible en langue guiziga

Masay Esdras mindil a Zeruzalem

¹ A dirba gwat tayna migam na, naɓa mazum buy a Perse i Artakzerses. Esdras a so ti Babiloŋ. Esdras i mangal ngi Seraya, dideˀ ngi Azariya, ngi Hilkiya,

² ngi Salum, Sadok, Ahitup,

³ Amariya, Azariya, Merayot,

⁴ Zeraya, Uzi, Buki,

⁵ Abisuwa, Pinas, Elazar, mangal ngi Aroŋ, masay madiɗa.

⁶ Esdrasa, Ɓimujuwa ngi Bumbulvuŋ, Buymisemuŋ ngi Israyel muvula da Moyis na, a si na le haɗa. Gwat Esdras mucufuɗ gar avu buyo na, a vulaŋ di, asi gidaŋ ngi Bumbulvuŋ Buymisemuŋ naŋ, naŋ da ati naŋ.

⁷ Angi vi mitarnaˀ naŋ, Artakzerses mazum buy na, a wuzla Israyel, yo a wuzla masayay, levihey, mizli dimisey, mijigina mizlingrehey, waɗ gawla migi slra ngir hay ngi Buymisemuŋhoyo, mekelemey cah asi taŋ a ram nga Zeruzaleme.

⁸ Esdras a ndilam ati taŋ a Zeruzaleme, naɓa i kiya muzlum naŋ, ngi vi mitarnaˀ naŋ.

⁹ Asi mike na, ar hin muɓulaˀ ngi kiya mudumbuŋ naŋ na, naŋ ti haŋ naŋ, a sla hin ngi slikiɗ taŋ a Babiloŋ. Ar hin muɓulaˀ ngi kiya muzlum naŋ na, a ndil a Zeruzaleme, asi Buymisemuŋ ara gaŋ mezle.

¹⁰ Naŋ kine, Esdras a hurdum le hirdam ti mevel purla ngi si na ɓimujuwa ngi Bumbulvuŋ, ɓa a gi di slra, yo ɓa a dubuna ɓimujuwa taˀ gar ati sirikeye da mizli asi ruwuy Israyele.

Artakzerses mupula slra asi haŋ ngi Esdras

¹¹ Ɓi Bumbulvuŋ miɓa taŋ ɗaˀ ɗaˀ le ati ɓimujuwa taˀ gar vur Israyeley na, Masay Esdras, a si na taŋ le kwaŋ kwaŋ. Letir mutohoko, buy Artakzerses muvulaŋ di na, mingiɓi ngi raˀani:

¹² «Artakzerses, madiɗa ngi buy madiɗahay, matuhuw letir hana da ka Masay Esdras misina ɓimujuwa ngi Buymuŋ le kuy kuy, ndir zuy zuy.

¹³ Ɓi ɗu ya miɓa ɗaˀ le ani: asi ruwuy ɗu, ko wa gar a wuzla Israyeleye, a wuzla masay taŋhay waɗ a wuzla levi taŋhaya, muwuɗ ru le ngi mongoy naŋ nga Zeruzaleme na, anja aru asi ka!

¹⁴ Asi mike na, ya ati mukuti vu ɗuwoy mitarnaˀ na, i ndra mislinukuw nga lo virzi ngi ɓi vur hirwuy Zuda, waɗ vur Zeruzaleme, kaɓa ɓimujuwa ngi Buymisemuŋ ɗik mikaw asi haŋ ɗik na.

¹⁵ Yo ma na, ɓa ki ru ti ɓiri bara ati ɓiri tapasl tapasl, buy ati mukuti vu naŋhay muvulaka ngi mongoy taŋ da Buymisemuŋ ngi Israyel, misi li cifi naŋ a Zeruzaleme,

¹⁶ yo ɓiri bara ati ɓiri tapasl tapasl, ka misa lum le ar hirwuy ngi buy miwi li asi ruwuy Babiloŋ gar, waɗ gwatay, mizli ati masayay muvulaka taŋ ngi mongoy taŋ, taŋ masa ram taŋ ng'ar hay ngi Buymisemuŋ taŋ a Zeruzaleme gar na, kisa ru taŋ a haŋ.

¹⁷ Naŋ kanah, dala nah na, kisa gi di slra kuy kuy, kisa hiɗik di gusoŋhoy, zlengerekey, ziri tumuŋhoy, waɗ gwat ngi migam ngi gi mikulihey ati ngi pusl ti pusloy asi taŋ. Ki sa gi taŋ mikuli ar li gi mikuli ar hay ngi Buymisemuŋ kumo a Zeruzaleme.

¹⁸ Yo is ngi ɓiri bara ati ɓiri tapasl tapasla, ka ati sukum ɗikeye, kisa gam di gwat kum mupuraka le kuy, kisa gam di i gwat Buymisemuŋ kumo mawuɗo.

¹⁹ Gazlangahay masa vulukuw taŋ ngi gi slra ar hay ngi Buymisemuŋ na, pa taŋ sek ar hay ngi Buymisemuŋ ɗik a Zeruzaleme.

²⁰ Da gwat mindir ngi gi ada ar hay ngi Buymisemuŋ ma na, kisa hil ar zlili ngi buyo, ki hiɗika ti naŋ.

²¹ Ya buy Artakzersese, i ɓi le ɗaˀ le da miji zlili ngir li vay si pas ngi pastaˀ ngi Efrataya gar, Masay Esdras, misina ɓimujuwa ngi Buy ngi muŋ le kuy kuy na, gwat naŋ mucufuɗ le gar na, gakaŋ di kaslsla,

²² hã a sa vulakaŋ ɓiri bara, kilo durmuk makir, alkamari, kilo durmuk kukur makir, mbaazla, litir durmuk mufaɗ, mal litir durmuk mufaɗ, yo mandaŋ slaf le ta.

²³ Gwat Buymuŋ miɓa le ɗaˀ le gar na, anja a gaka ti jiviɗ naŋ vur hay ngi Buymuŋ, vur naŋ maslikiɗ himaˀ ar zumabuy ɗu, waɗ ar ya vuna ati ziri ɗuwoyo.

²⁴ Yo ma na, i ɓukum ɗaˀ le vur masayay ati leviheye, vur mizli dimisey ati mijigina mizlingreheye, waɗ vur gawla malla mizli migi slra ngir hay Bumbulvuŋhoy gar na, buutu, laada ati wurka jiviɗe, jiviɗ anta ngi tiɓa avu taŋ ta.

²⁵ Ka so na Esdras, wini buyoy ati migi kiitahay ti sinmijileŋ ngi Buymisemuŋ ɗik misi angi ɗerewol mikaw asi haŋ ɗik na, ɓa a gaka kiita da mizli gar misi tisi pas ngi pastaˀ ngi Efrata, mizli misinaka ɓimujuwa taˀ gar ngi Buymisemuŋ ɗike le, yo mizli misinaka ta kwana, kisa dubunaka taŋ di.

²⁶ Ko wa misa ga gwat ɓimujuwa ngi Bumbulvuŋ ɗik ati ɓimujuwa ngi buy mawuɗo kasl kasl ta na, anja a gakaŋ kiita mikaslsla: vagay naŋ ɓaˀ malla solom, da kanah ta na, a wuruk malla a zum dangay.

Esdras miga sise da Buymisemuŋ

²⁷ Dar Esdras a ɓi: «Sise da Bumbulvuŋ, Buymisemuŋ ngi dideˀ ndrahay, asi naŋ muvula wuluk a mevel buyo, ɓa a ɗuva hirnga da hay ngi Bumbulvuŋ misi Zeruzaleme.

²⁸ Buymisemuŋ a giy mezle le a mbuŋ buyo, a mbuŋ mukuti vu naŋhay waɗ a mbuŋ mizli madiɗa ngi slra ngi buyoyo. I lum gidaŋ le, asi gidaŋ ngi Bumbulvuŋ Buymisemuŋ ɗu naŋ da angi ya, dar i kus buy Israyeley cah ɓa i ram bummoˀ.»