DIMIS MIMEZLE 8 - Bible en langue guiziga

¹ Ayyah! da ki sukum ɗu mizile zleˀe, yo da i maha muguluw ti ɗuwa ngi didak naŋ zleˀe gisiŋ na kuy! Da ya misa ji hirnga le ti ka avra na, i sa juw kuɓuy: amma ko mizli anta sa hirsikiy ta.

² I sa ru ti ka, i ci ti ka sesẽŋ a hay maha. Ki sa dubuniy gwata, i sa vuluw mbaazla mazĩˀĩ ndum, mbaazla ngi yi ngi hunduruk ɗu.

³ Haŋ ɗik vay gula kulaˀ asi hirnga ɗu, yo haŋ vay hazumo kilaw ar ya.

⁴ Kum diili Zeruzalemey, ambuh ambuh kum, wuɗa vu ɗu na, da naŋ miwa nga naŋ t'aruŋ na, ki slikiɗikiy di ta, ki puɗukikiy di ta.

Diilihey

⁵ Ngwas maso ani a diga tir li papala, ginasl ti mikiɗa may naŋ na, i waka? I puɗuko ka asi widis mezle ngi zum ar li munuk miga hur ɗik ara, ar li munuk miyuw anga

Wuɗa vu, naŋ gidaŋ ka mucu Ngwasa

⁶ Ɗuviy taˀ a mevel ɗik, kaɓa gwat ngi ɗuvam haŋ ar gwata. ɗuviy taˀ ar hirbazla ɗike, kaɓa gwat ngi ɗuva haŋ ar gwat. Asi mike na, wuɗa vu, naŋ gidaŋ haɗa kaɓa mucu, yo suloŋ, naŋ kutuɗak kaɓa li cifi ngi mizli mumucahay, a wur vu kaɓa irne vu mihilɓiɓ, kaɓa vuŋ mapi sar.

⁷ Yam ngir mubuliye gar, a muca wuɗa vu gu ta, yo mizaw madiɗahay a ndakaŋ gu ta. Mburo, lum ngi hay naŋ gar, da ko a vula le ar deɗe ngi wuɗa vu tekeɗe kwana, mizli a sa purakaŋ hiris le na si.

Sukumuŋ mizilehey

⁸ Ndrˀada ti sukum ndra mongoso, i meciɗeke, a bo ti ɗuwa t'aruŋ. Tapas da ara ɓaka ɓi ngi vul naŋ da zile na, i sa gaka sukum ndra mongoso nah mbrike?

⁹ Da naŋ solok ka mohol zleˀe na, i sa ndiram hay ngi ɓiri bara a hirnga naŋ. Da naŋ kaɓa mizlingre zleˀe na, i sa gicakaŋ kiɗasl ti palalam ngi dum ngi miter.

Ngwasa

¹⁰ Ya solok ka mohol, yo ɗuwa ɗu naŋ kaɓa hay musuburoy gisiŋ. Dar yi ndir a mihiri mangasl ɗu, kaɓa ngwas maso ti zuy.

Zil

¹¹ Salomoŋ naŋ da ti guva ngi gudubun a Baˀal-Hamoŋ. A vula guva tuwa da mizli ɓa a jiginakaŋ. Mbur gar na, sey a lumo suloy gabal purla ti yi ngi gudubun tuwa.

¹² Guva ngi gudubun inga ya ɗu. Ka Salomoŋ, suloy gabal purla na, da ka, amma suloy skat cuwo ani, da mijigina guvahay.

¹³ Yeme ɗu, ka mua wuzla jarne na, ngama ɗuwoy ara wuɗam cine ˀay ɗike, ɓi ti ˀay paɗ a muŋ ɓa i cina.

¹⁴ Mikiɗa may ɗu, kil le, kil kutum kaɓa mangazaw malla zinga ngi muuni, a muwã misi kalafay mazĩˀam dummo.