DIMIS MIMEZLE 2 - Bible en langue guiziga

¹ Ya, ya ka mufuyuk ngir filkiy Saroŋ, ka matay mezle mafuyuk ar sozo.

Zil

² Yeme ɗu, a wuzla ziri mongosohoyo naŋ kaɓa matay mezle mafuyuk a wuzla titif.

Ngwasa

³ Mikiɗa may ɗu, a wuzla ziri mizileheye, naŋ kaɓa mayngoro a wuzla widis ngi ɓuhoy. Yi wuɗ le haɗa ɓa i naˀa susuɗuk naŋ, yi nah, naŋ deɗek a balam ɗu.

⁴ Kumani ɗu a ci ti ya ng'ar hay ngi mbaazla, amma gwat ngi bigi ɗu ar deɗe ngi drapo na, i wuɗa vu.

⁵ Jihikiy ɗangal ti maɗaf ngi gudubun, vulikiy gidaŋ ti yi ngi mayngoro, asi wuɗa vu a kiy jiji le.

⁶ Kumani ɗu a ca haŋ gula naŋ kulaˀ asi hirnga ɗu, haŋ hazumo kilaw ar ya.

Zil

⁷ Kum diili Zeruzalemey, hadam ti slimiɗ ngi mangazaw malla muuni: wuɗa vu ɗu na, da naŋ miwa nga naŋ t'aruŋ na, ki slikiɗikiy di ta, ki puɗkikiy di ta.

Mbur zil masawa Ngwasa

⁸ Yi ra cine ˀay ngi mikiɗa may ɗu! Nˀani, ara sawa! A ra jiɗawa ar muwãhaya fãt fãt, ara kito li miɗagaraya kat kat.

⁹ Mikiɗa may ɗu a bam vu ati mangazaw, malla ati zinga ngi muuni. Nˀani deŋ a duba mohol ndra, ara puro hiri tir fenetir, ara hilɗo vu tir dum mikilika kilak kilak njororo.

¹⁰ Mikiɗa may ɗu ara zli dimis, a ɓiy na: «Yeme ɗu, mifetek fetek hiri ɗu, slikiɗi, sawa.

¹¹ Asi kiya himiɗ a cuh le, vuŋ a wi mi le, a kiɗ mi le.

¹² I puraka na, gwatay ara fuyukom asi ruwuyo, hin ngi mumul ara ndilawa, i ra cinam gonokoy matuwam asi hirwuy ndra.

¹³ Uruf a zla le, ara nihi, yo gudubun maɗuv guduguluko, ara zĩˀĩ jirre. Yeme ɗu, mifetek fetek hiri ɗu, slikiɗi, sawa.

¹⁴ Minjeɗeɗ ˀay ka gonok, ka misi ar wala muwã, ka muɗum ar butumoy, bigiy vu ɓa i pura mihiri ɗik ayɗi, ɓiy ɓa i cine ˀay ɗike, asi ˀay ɗike, a cin calala, yo mihiri ɗike kuy teˀe.»

Mumuŋ

¹⁵ Biigaɗay ati ziri biigaɗay mahiryaka yi ngi gudubun na, jam ndra taŋ, ani gudubun ndra vuna, ara ɗuv guduguluk ti ɗuv aruŋ ngbaŋ.

Ngwasa

¹⁶ Mikiɗa may ɗu inga ya, yo ya kwana, yi nga naŋ, ara jigina ginew naŋ gezleŋ taˀa, ar matay mezle mafuyuk.

¹⁷ Ɓa hã himiɗ mifiɗek fiɗek a gi, yo ɓa hã susuɗuk ngi gwatay a cuh na, mikiɗa may ɗu, mawa a muŋ, kilo ka mangazaw malla ka zinga ngi muuni, ar wala muwã.