DIMISEY 88 - Bible en langue guiziga

Ya njimet njimet avu muco

¹ Dimis ngi wuzla dimis ngi mizli ngi sukwi ngi Kore. I mulumo di ar ɗerewol ngi buy dimis. I dimis ngi ndurɓo hiri. Mazla i Heman, mbur Ezra.

² Bumbulvuŋ, Buymisemuŋ ɗu, milaha vu, papas waɗ kap ti duvuɗ naŋ gar na, i ra widi ng'avi ka.

³ Anja diradibiɗ ɗu a ndil sesẽŋ avu ka, jika slimiɗe kuy kuy, ɓa ki cine ya makuɗuma tuwuy na.

⁴ Asi bonoy a finiy gidaŋ le ar joˀ ɗu, yo a ndir mata ɓa i sa mucu.

⁵ A ra slufikiy ya a wuzla mizli migweˀ ngi mucoy, yakaɓa mbur, gidaŋ naŋ mitiki le wãˀa.

⁶ Yi mihiziga le fuk, giceˀ a wuzla mumucahay, i bam vu le ati mizli mumucahay ar zivi, misi ko k'anta wuluk ar taŋ mata, asi a gwaham le avu ka.

⁷ Ki hizigiɗiy ya le ng'ar vigiɗ mijileŋ, ng'ar luvuŋ mitimbiɗim makiɗ vu vagay.

⁸ Himaˀ ɗik a jiy le hirasl a ruwuy kaɓa gwat mududoko, ki mbizla le kip ar yakaɓa diɓel ngi yam a mizaw.

⁹ Ki ɓula yeme ɗuwoyo le kileŋ avu ya, ki tiri ti ya le a mihiri taŋ, yi mbur maga taŋ kuy ta muwãˀ naŋ. Yi migica le giceˀ ar bonoy ɗu, ko yi bi gu ta.

¹⁰ Gidaŋ ngi hiri ɗu a tiki le wãˀ ti bonoy, Bumbulvuŋ, vur hin gar na, i ra ziluw, i ra tiluw haŋ.

¹¹ Kˀada kisa gi cekenehey vur mizli mumucahaya aruŋ ma kwa? Tˀada sa slikiɗam ngi hunumukuw aruŋ ma kwa?

¹² Ada sa ɓaka ɓi ngi gi mezle ɗike a wuzla mumucahaya aruŋ ma kwa? yo ada sa ɓaka ɓi ngi gi kaslsla ɗik a ruwuy aruŋ ma kwa?

¹³ Ada sa sinaka cekene, ka maga na ar luvuŋ mitimbiɗim aruŋ ma kwa? Yo angi hirwuy ngi puyuko hirnga na, gi jeŋŋe ɗik ada sa sin aruŋ ma kwa?

¹⁴ Bumbulvuŋ, ya i ra tiluw mi, ɓa ki kilo widi ɗu, zle ti miprik si na, yi ra tumbuluw si.

¹⁵ Bumbulvuŋ, ki hizigiy fuk avra, yo ki ɗuv hiri ar ya ta vur mike?

¹⁶ Ya geˀ ircece le, yo yi hĩhĩy le zle ti zuŋ, ka magiy zluwun na, a finiy gidaŋ le.

¹⁷ Ji mevel ɗik matiɓi njilim njilim ka vu na, a cuh le baɗ tir ya, zluwun a kiɗiy le ɓaˀ vagay a ruwuy.

¹⁸ Vur hin gar na, ji mevel ɗik ati zluwun ti ka tuwa, ara ndiy yik kaɓa yam, a guniy hirnga le gun tika tika gar.

¹⁹ Cil ɗuwoy ati ngama ɗuwoyo, ki ɓula taŋ le cek kileŋ avu ya, ngama ɗu, mindir pal i luvuŋ.