DIMISEY 8 - Bible en langue guiziga

Dudok ngi Buymisemuŋ, yo mburo i madiɗaŋ

¹ Dimis ngi wuzla dimis ngi Davitey. I mulumo di ar ɗerewol ngi buy dimis. Dimis ngi gujuvur ngi ruwuy Gat.

² Haˀaw Bumbulvuŋ, Buy ndra, slimiɗ ɗik ara zil ti mezle asi ruwuy gar! Gi ɗongor ɗike, hã a funa ngi muŋ ma.

³ Ki biga gidaŋ ɗike le a mbuŋ mesene ɗikeye, ti dimis ngi hunum ɗik mabo ti balam ziri memeɗehey ati ziri gazahay na, ɓa ngi guco mi da mesene ɗikey mihirdam hirdam ti ka na.

⁴ Muŋ, i ka miga ti haŋ ɗiki, yo kiya ati wurzlaŋhay, i ka minga taŋ kaˀ kaˀ a muŋ. Amma, da ya mira pura taŋ keɗ keɗ na,

⁵ yi ɓi ti kwacay ɗu: mburo i mi, ɓa hã ki ki slimiɗ ara ka? I mi ɓa hã ki wuluk ara ka?

⁶ Ki ga mburo, naŋ slakka asi modro ɗikey. Vurˀe, dudok ati ɗuva hirnga, ki tuwuɗaŋ di vah vah a hirnga.

⁷ Ki cifaŋ ɓa a zum buy a hirnga gwatay gar, ka miga taŋ ti haŋ ɗiki, jo, ki pa gwatay gar asi sar naŋ:

⁸ ginewey gar, slahay, tumuŋhoy, ˀaway yo gwat misãmi ngi ɓuhoy gar,

⁹ ɗiyuwoy, kilifey waɗ gwatay maram digam asi yamay cek.

¹⁰ Haˀaw Bumbulvuŋ, Buy ndra, slimiɗ ɗik ara zil ti mezle asi ruwuyo gar!