DIMISEY 68 - Bible en langue guiziga

Dimis ngi tiɓa Buymisemuŋ bugawla

¹ Dimis ngi wuzla dimis ngi Davitey. I mulumo di ar ɗerewol ngi buy dimis.

² Buymisemuŋ a slikiɗ le deŋ na, mesene naŋhay a waham hirnga, yo mizli mazliram ti naŋ ta gar na, a kilam di!

³ Naŋ kine, ka Buymisemuŋ ki susuyumo taŋ, kaɓa cunju masusuyum, mukuwahay kwana, a zizam a mbuŋ ɗike, kaɓa tebeɗ maluwusl ar vu.

⁴ Amma mizli mijeŋŋeheye, ara mumulom, ara zluzluɓam a mbuŋ ɗike, asi ki cira taŋ hiri le haɗa.

⁵ Hunumaka Buymisemuŋ ti dimis, hunumakaŋ ti zila slimiɗ naŋ, zluzluɓam a mbuŋ mbur maso ar mota ngi vurum ar gazlavaya, slimiɗ naŋ i Bumbulvuŋ zluzluɓam a mbuŋ naŋ.

⁶ Ar hay naŋ mipal na, Buymisemuŋ i cine ngi mutuhoy, i micika vu a hirnga wudigahay.

⁷ Buymisemuŋ a ɗuv hay taˀ da mizli mizlaɗ pal taŋ, yo mizli mijahaya, a vula taŋ mumul ngi mizli ngir wuyahay, amma mislikiɗa ɓiheye, a ndiram pal taŋ ar li papala.

⁸ Haˀaw Buymisemuŋ, ti ka miki ɓaˀ a mbuŋ mizli ɗikey, yo ti ka maru a wuzlaɓuh mikirɗak kirɗak na,

⁹ hirwuy a zla a jijik, muŋ a vunoho yam, a mbuŋ ka Buymisemuŋ ngi Sinaya, a mbuŋ ka Buymisemuŋ ngi Israyele.

¹⁰ Buymisemuŋ ɗu, ki go vuŋ madiɗa le, hirwuy ɗik migir le wãˀa, ki vulaŋ gidaŋ le.

¹¹ Mizli ɗikey mipam na, ar li nah, i li ka Buymisemuŋ miɗiya ti mezle ɗik da mizli mige ircecehey.

¹² Bumbulvuŋ a ɓi ɗaˀ purla si na, joˀ ngwas misliney, zigiduw taˀ, a tilam mi ti ɓi mezle ani:

¹³ «Buy madiɗahay ati sojeheye, a kilam le, a kilam le kwatak!» joˀ ki wunka gwat ngi wuyahay taŋ mupulaka taŋ a haya, kaɓa gwat muluma ar vurum.

¹⁴ Ki sa ndiram tup tup ar walahay guɗuko kwa? Kirpasl ngi gonoko, a ro sirit sirit ti ɓiri gaza, yo zlara naŋhaya, sirit sirit ti ɓiri tapasl tapasl.

¹⁵ Ti Buy madiɗa miwãˀ muwaha buyoy baɗ a diga na, naɓa yam ara pawa buk buk nga muwã Salmoŋ.

¹⁶ Muwã Basaŋ i muwã ngi Buymisemuŋ, muwã Basaŋ, mesengel ava mbeˀ mbeˀe.

¹⁷ Muwã misi mesengel mbeˀmbeˀe, muwã Buymisemuŋ muwuɗ ɓa a cifi ara na, a guw hiri vur mike? Haˀaw! Bumbulvuŋ a cifi ara ngi sete.

¹⁸ Buymisemuŋ naŋ ti mota ngi vurumoy, durmuk mbeˀ mbeˀ, a sluf ta, misi vuhoy njilim njilim. Bumbulvuŋ naŋ da a wuzla taŋ, a muwã Sinay, li ngi Bumbulvuŋ.

¹⁹ Bumbulvuŋ, Buymisemuŋ, ki jiɗ le nga diga, ki ji mizli le ng'ar dangay. Mizli a vulukuw gwatay le, ko mislikiɗa ɓihey kwana, a vulukuw le, joˀ ki ndir a Siyoŋ!

²⁰ Gukum sise da Bumbulvuŋ vur hin gar! I Buymisemuŋ nah na mavula ndra bugawla.

²¹ Buymisemuŋ ndra nah, i Buymisemuŋ mavula ndra bugawla, Bumbulvuŋ ndra, Buymisemuŋ, naŋ da ti jiviɗ ngi laha ndra avu muco.

²² Amma Buymisemuŋ ara kuyupo hirnga ngi mesene naŋhaya, hirnga misi ngwic silip silip ngi mizli migi mungra madiɗahay.

²³ Bumbulvuŋ a ɓi na: «I ra mo ti mesene kumoyo ti Basaŋ, i ra mo taŋ tir mijileŋ ngi mubuliy,

²⁴ ɓa ki ram digi ar pumbus taŋ, joˀ kiri kumoy, a sa humbuɗaka useˀ ngi mesene kumoyo.»

²⁵ Haˀaw Buymisemuŋ ɗu, mizli a puraka mamar mitaˀ asi ka na le, mamar mitaˀ asi ka Buymisemuŋ ɗu, buy madiɗa ɗu, misi ar hay mipal:

²⁶ mizli dimiseye sek a mbuŋ, mikiɗa gwat ngi dunguroyo ti dirba, diiliheye sek a wuzla, ara kiɗam badak memeɗehey.

²⁷ Ar li mizli mukusom le na, gaka sise da Buymisemuŋ, mizli ngir tizer ngi Israyel gar, gaka sise da Bumbulvuŋ.

²⁸ Miɓaˀ a mbuŋ, i Benjameŋ, mangal tuboˀo, a dirba taŋ, buy ngir sukwi ngi Zudahay, ɓaˀ ɓaˀ ti zana midira vah vah, a dirba taŋ kwana, i buy ngir sukwi Zabuloŋ ati ngi Neftali.

²⁹ Buymisemuŋ kumo, a wuɗ le ɓa kisa lumam gidaŋ, Buymisemuŋ ɗu, ka majina ndra na, biga gidaŋ ɗike.

³⁰ Ka muar hay ɗik mufuna ngi Zeruzalemey gar na, buyoy a sa rukuw ti gwat ngi vul taŋhayay nga diga.

³¹ Guco mi da gwat misãmi misi ar giziŋ lavaɗa, da gusoŋhoy mitaˀ jigine, guco mi da sukwi ngi mizli misi ka ziri sla tayna, mapulukom a mbuŋ ɗike, ɓa a tumbulukuw ti dala na. A zliɗa hirnga le da sukwi ngi mizli mawuɗam vurumo.

³² Mizli madiɗa ngi si ruwuyoy a ndiloko ti Ezipte, Etiyopihey ara kilam bal ti tila haŋ da Buymisemuŋ.

³³ Zuma buy ngi si ruwuyoy, hunumaka Buymisemuŋ ti dimisi, kiɗam gwat ngi dunguroy da Bumbulvuŋ.

³⁴ Mbur maguno dadala muŋ diga zlezle ti mota naŋ ngi vurumo. Puraka, ara buc tiˀ ay naŋ mubok na.

³⁵ Misi gidaŋ i Buymisemuŋ, tilam di mi, i buy madiɗa ngi Israyel, yo gidaŋ naŋ, naŋ a muŋ ar gazlavay.

³⁶ Haˀaw Buymisemuŋ, zle ar hay ngi ɗike, ki gi zluwun da mbur. Ki Buymisemuŋ ngi Israyel, mavul gidaŋ waɗ madiɗa da mizli ɗikey. Sise Buymisemuŋ ɗu!