DIMISEY 30 - Bible en langue guiziga

Bumbulvuŋ, ki miy ti siifa le a muŋ

¹ Dimis ngi mezegwel ngi vula hay da Bumbulvuŋ. I dimis ngi wuzla dimis ngi Davitey.

² Bumbulvuŋ ɗu, i ra guw ɗongor, asi ki bo ti ya le tir butum madiɗa, ki pula mesene ɗuwoy a singiram ar ya ta.

³ Bumbulvuŋ ɗu, Buymisemuŋ, ti ya miwidi ng'avu ka na, ki so mbuliy le.

⁴ Bumbulvuŋ ɗu, ki bo ti ya le tir li ngi mizli mumucahaya, i ra diɗ zleˀe ng'ar vigiɗ ngi mizli mumucahay, amma ki miy ti siifa ɗu le a muŋ.

⁵ Hunumaka Bumbulvuŋ, kum mizli miteŋteŋ naŋhay, gakaŋ muguzlum ti zila slimiɗ naŋ mipal na.

⁶ A ji mevel le na, anta zik di ta, amma gi mezle naŋ a zik, hã hin ngi siifa ngi mburo wãˀ. Ti pastaˀa, mizli ara tuwam kaɗam kaɗam aruŋ, amma ti miprike, i salalay.

⁷ Yo ya mapul vu zleˀe na, i ɓi: «Ya zlak gidaŋ gidaŋ.

⁸ Bumbulvuŋ, ar gi mezle ɗike, ki ciciy le gidaŋ gidaŋ ka muwã.» Amma ka mimbiɗiy duba na, i zluwun.

⁹ Bumbulvuŋ, i ziluw le ɓa ki kilo widi ɗu, yo i tumbuluw le.

¹⁰ Bumbulvuŋ ɗu, da yi muc le na, ki lum di mike? Da yi ci le ng'ar vigiɗ na, ki lum di mike? Mbur mitiri mereɓ le na, a hunumuw gu aruŋ makwa? A til mi ti gi teŋteŋ ɗike gu aruŋ makwa?

¹¹ Bumbulvuŋ, ti pura ircece ɗik na, cine tuwuy ɗu. Bumbulvuŋ ɗu, so jiniy takwa.

¹² Tuwuy ɗu ngi vagaya, ki tiri di mumul le, zana ɗu ngi vagaya, ki mbiɗiy di zana ngi muguzlum le.

¹³ Ɓa membezleŋ ngi vu ɗu a hunumuw ti dimis ko mbak le ta, Bumbulvuŋ ɗu, Buymisemuŋ, i guw sise ndrehhe.