Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

DIMISEY 145 - Bible en langue guiziga


Zuma buy ɗike, i zumabuy ngi sete

1 Dimis ngi hunuma vu. I mulumo di ar ɗerewol ngi Davit. Buymisemuŋ ɗu, Buy madiɗa ɗu, i wuɗ i guw dudok, i wuɗ i guw sise ngi caˀa.

2 I wuɗ i guw sise vur hin gar, yo i hunumuw ti dimis ngi caˀa.

3 Bumbulvuŋ naŋ madiɗaŋ, a ndila le wãˀ ngi hunumo, madiɗa naŋ na, gwat ngi wa ti naŋ anta.

4 Gwat ka miga na, mizli masa ya ka taŋ, a sa ɓaka ɓi nah nga mbuŋ nga mbuŋ, a sa tilam mi ti ɓi ngi gwat madiɗahay, ka miga taŋ.

5 I sa mahiri ngi ɓa ɓi ngi cekene ɗikeye, ngi dudok ɗik ati ngi wucuɗ ɗiki.

6 A sa ɓaka ɓi ngi gidaŋ ɗik ngi gi gwat migam ɗaˀ tahaya, yo i sa slufa ɓi ngi gwat madiɗahay, ka miga taŋ.

7 A sa wulkam keŋ ar gi mezle ɗikey mihaɗa na, a sa jam salalay vur gi jeŋŋe ɗike.

8 Bumbulvuŋ naŋ ti mevel mezleŋ, yo a pur ircece haɗi, a ji mevel kutum ta, yo naŋ teŋteŋ haɗa.

9 Bumbulvuŋ naŋ mezle avu mbur gar, gwat naŋ miga taŋ gar na, a wuɗ taŋ.

10 Gwat ka miga taŋ gar na, a hunumukuw jom arleˀe, Bumbulvuŋ, yo mizli miteŋteŋ ɗikey a gukuw sise.

11 A ɓaka ɓi ngi zumabuy ɗik misi dudoko, yo a ɓaka ɓi ngi gwat madiɗahay, ka miga taŋ.

12 Gwat madiɗahay, ka miga taŋ waɗ zumabuy ɗik misi ti dudoko, a sa njikaka taŋ da mizli.

13 Zuma buy ɗike, i zumabuy makiɗ mi ta, gidaŋ ɗik ngi zuma buyo a ndir ngi sete. Bumbulvuŋ naŋ kaslsla, naŋ teŋteŋ ar gwat ngi gi naŋ gar.

14 Mizli mandilam gar na, Bumbulvuŋ a jaha taŋ jah jah, mizli mugurjoŋ gurjoŋ gar na, a cica taŋ cir cir.

15 A roko hiri taˀ taˀ avu ka, hiri njah njah asi ka, ɓa ki vula taŋ gwat ngi zumo kasl angi may taŋ.

16 Ka muwuna taŋ haŋ ɗike le baŋ na, gwat misi titirihey, ka mawuɗ taŋ gar na, a mbam pecek.

17 Bumbulvuŋ naŋ jeŋŋe angi slra naŋ gar, naŋ teŋteŋ ar gwat ngi gi naŋ gar.

18 Bumbulvuŋ naŋ gweˀ avu mizli gar mazilakaŋ, gweˀ avu mizli gar mazilakaŋ ti mevel purla.

19 Mizli mazluwunam di na, a ga taŋ gwat taŋ mawuɗama, taŋ mitilakaŋ mi le til si na, a cina, a laha taŋ.

20 Bumbulvuŋ ara jigina ngama naŋhaya gar, amma ara susuyumo misi moˀoreheye gar.

21 I hunuma Bumbulvuŋ ti dimis, yo gwat misi titiri gar, a ga sise da Bumbulvuŋ mipal na, ngi caˀ kine.

Bible en Langue Guiziga © L’Alliance Biblique du Cameroun, 2011.

Bible Society of Cameroon
ကြှနျုပျတို့နောကျလိုကျပါ:



ကြော်ငြာတွေ