DIMISEY 144 - Bible en langue guiziga

Dira dibiɗ ngi buy madiɗa

¹ Dimis ngi wuzla dimis ngi Davitey. I ga sise da Bumbulvuŋ, mandazlay muwã ɗu. I naŋ madubuniy gi vurumo, yo ara sirikiy kiɗa vu.

² Buymisemuŋ i migi mezle da ya, i li ɗu muguno ti mohol, i li ɗum ɗu, yo i milih ɗu, i mbaray ɗu ngi tika hiri. I naŋ mavuliy sukwi ngi mizli ɓa yi wa taŋ.

³ Bumbulvuŋ ɗu, mbur vuna i mi, ɓa ki ki slimiɗ ara naka? Mbur titra vuna i mi, ɓa ki wuluk ara naka?

⁴ Mburo, naŋ kaɓa himiɗi, yo siifa naŋ, naŋ ka susuɗuk masusuyum.

⁵ Bumbulvuŋ, hinjiko muŋ hinjak ɓa ki po sar. Wusa muwãhaya vrek vrek, ɓa a ngisam cunju turliŋŋe.

⁶ Ndislo vuŋ, waha taŋ hirnga mber mber, loho luvutoy, ɓa a kilam njak li.

⁷ Tilo haŋ baɗ a muŋ ɓa ki lihiy, ɓa ki tiɓiy avu mekepel ngi yama, waɗ tisi haŋ ngi mulakaya.

⁸ Mizli tayna, a gam slir, a hudumom kaɓa i gisiŋ, amma t'anta jaka ɓi ngi hudum taŋ vuna ta.

⁹ Yawwa Buymisemuŋ ɗu, i wuɗ i hunumuw ti dimis nawayaŋ, i wuɗ i mumuluw ti gujuvur misi zeweɗ kuruˀu.

¹⁰ I ka mavula bugawla da buy madiɗahaya, I ka malaha gawla ɗik Davite, avu maslalam makiɗ vu vagaya.

¹¹ Lihiy, tuɓo ya tisi haŋ ngi mulakaya, a gam slir, a hudumom kaɓa i gisiŋ, amma t'anta jaka ɓi ngi hudum taŋ vuna ta.

¹² Anja ziri mizile ndrahay a ndiram kaɓa widisey, magilam cir cir zle ti meciɗeke! Anja ziri mongoso ndrahay a tiram kuy haɗa, kaɓa gwat maciɗaka taŋ ngi gi wuya da hay ngi buy madiɗahay.

¹³ Anja dirgwaɗ ndrahay a naham mbaf mbaf, caɓ caɓ ti sukwi ngi gwatay wal wal gar, yo ginew ndrahay a jam a ɓuh durmuk durmuk, ko durmuk kukur mbeˀ mbeˀe.

¹⁴ Anja sla ndrahay a zlumburam kuleɗ kuleɗe, anja mizli a ndiloko ɓuyoh, a jam ndra ng'ar beke mata, yo anja widi, ˀay ngar ngar, anta ar li ngi luuma ndraˀahaya mata.

¹⁵ Mizli misi gwat tayna gar na, a mumulom! Mizli misi Buymisemuŋ i Bumbulvuŋ taŋ na, a mumulom!