Ɗerewol ZAK 3 - Bible en langue guiziga

Irne

¹ Sukum ɗuwoy, anja kum gar kumo, ki tiram mudubuna gwat da mizli ta. Asi ki sinaka le, ndra mudubuna gwat da mizli na, Buymisemuŋ a sa ga ndra kiita ti himaˀ haɗa.

² Ndra gar, i ra zluɓam ɓi haɗa. Da mbur anta zluɓ ar mingiɓi naŋ ta na, naɓa i mbur manja hereweɗe. A jigina dumvu naŋ gara gu.

³ Da i caka lejeŋ le a mi piliseye, ɓa a cinam ndra mi na, i gam ti dumvu taŋ cunuˀ cunuˀ wãˀ.

⁴ Yo ma na, wulkam ar palalam madiɗa ngir yamay, himiɗ gambara mahizigiɗa taŋ na. I madidiɗahay ngbaŋ, amma mizli ngir taŋhaya, a kukuroko taŋ ng'ar li taŋ mawuɗama ti gwat meciɗek wãˀ.

⁵ Naŋ kanah ya, irne i gwat meciɗek ngi vu dumvu ngi mburo, amma a huhumo vu naŋ ti ɓi ɓi ngi gi gwat madiɗahay haɗi. Puraka ɗi: Vu ndiveɗ kini na, a wura ɓuh sikinih gar.

⁶ Irne kwana, naŋ kaɓa vu, ɓi malambaˀhay gar a boko ti vaŋ. Irne, naŋ avu dumvu ndra, a jupa dumvu ngi mburo talalaŋ wãˀ. A nduvuɗa ndra vu, zle avu yi ndra hã avu muc ndra. I vu naŋ munduvuɗo di angi vu mamuc ta.

⁷ Sukwi ngi gwat ngi ɓuhoy wal wal gar, ɗiyuwoy, gwat maram ti kwacayay ati kilifey gar na, mbur a sirka taŋ gu, a sirka taŋ le si.

⁸ Amma ko mbur masirka irne gu, anta ndiɗaˀ. Irne i gwat malambaˀ manja lejeŋ, muwuŋ makiɗ vu vagay ava haɗa.

⁹ I hunumaka Cine ndra Bumbulvuŋ ti naŋ. Yo mizli Buymisemuŋ miga taŋ mibam vu ati naŋ na, i nisaka taŋ ti naŋ ma.

¹⁰ Balam mupurla hana, a bo ti ɗuwulami ati nisavu ma. Sukum ɗuwoy, a zlir kanah ta.

¹¹ Yam muzuyyo ati yam mutuwak a boko tir miviɗiviɗi purla kwa?

¹² Sukum ɗuwoy, ˀuruf a yi tutumburo gu kwa? Malla gudubun a yi ˀurufo gu kwa? Yam milemme a bo ti yam muzuyyo gu ta ya.

Sinmijileŋ maso paɗ ti muŋ

¹³ Mbur misi sinmijileŋ, yo misi lesl ada a wuzla kumo kwa? Anja a biga ar joˀ naŋ mimezle, ti slra mezle, naŋ maga ti hina hirnga waɗ ti sinmijileŋ na.

¹⁴ Amma da ki ra gam suloŋ mikas naŋ a mevel kumo, yo ki roko ti may tiri na, anja ki huhumom vu ta, ki gam slir ngi hirya ɓi mikaslsla ngi Buymisemuŋ ta.

¹⁵ Naɓa sinmijileŋ nah na, a so paɗ ti muŋ ta, i sin ngi ruwuy, sin ngi ginewey, a bo tivi setenehey.

¹⁶ Naŋ kine, da mizli ara gam suloŋ, ara wuɗam fini cala na, naɓa a sa gam gwat mibiyãˀ biyãˀ lambaˀ waɗ sukwi ngi gwat ngi ji mevel wal wal gar.

¹⁷ Amma sinmijileŋ maso paɗ ti muŋ na, dumbuŋ dumbuŋ na, hiryi anta ara ta, a vul zuy, naŋ teˀteˀe, a jum ˀay ngi mizli, a pur ˀircece haɗi, a gi gwat mezlehey, anta jini vu cah ti cah ta, yo a ɓi mi cuw cuw ta.

¹⁸ Mizli magam gwat mezle ɓa mizli a cifam zuy zuy na, kite a zligam di i hilfa gwat, mazilaka «zuy.»