Ɗerewol OZE 9 - Bible en langue guiziga

Mizli ngi Buymisemuŋhoy a sa zizaka gwataya cek

¹ Israyel, asi ki ra gi sulome kileŋ avu Buymisemuŋ ɗike, yo asi migir ngir məlaŋ ngi alkamarihey gar na, kumo ki hĩyãm di i nah. Anta ngi cira hiri hã ngi zliɗukum lesl kaɓa sukwi mekelemey na ta.

² Mǝlaŋ ati li ɗuco gudubuno, anta sa kuɗukum may ta, mbaazla si, anta sa gi kaɓa kum mawuɗam na ta.

³ Efrayimeye, t'anta sa cifam a ruwuy ngi Bumbulvuŋ ta, a sa mam nga Ezipte a muŋ, waɗ nga Asiri, a sa zumam gwat ngi zum mitikahay.

⁴ Tˀanta sa kucaka li ti mbaazla vur Bumbulvuŋ mata, mikuli taŋ, anta sa ciraŋ hiri mata. A sa tiri avu taŋ, kaɓa ɗaf ngi vagay, mizli mazumam gar na, a tiram taŋ ti dili. Asi mike na, masa vula taŋ siifa i ɗaf vuna, amma anta sa cam di ng'ar hay ngi Bumbulvuŋ ta.

⁵ Ar hin ngi kus madiɗa, hin ngi muguzlum ngi Bumbulvuŋ na, kisa gam mike?

⁶ A puraka, ara wahaka li na, a kilam le. Hirwuy Ezipte a sa tiɓa taŋ mulaka, Walahay Memfi a sa tiri kaɓa zivi taŋhay. Zlili taŋ mupuɗaw piɗawa, hadaw a sa sirta taŋ, walahay guɗuk taŋhaya, hadaw a sa sirta taŋ.

⁷ Hin ngi kuta vu ti bonoy a ndilo le, hin ngi slufa ɓihey a ndilo le, anja Israyel a si na sin le. Mijiviɗ ngi Bumbulvuŋ a bi hirnga le, mbur Buymisemuŋ muvulaŋ lesle, ara gi lambaˀ lambaˀ, asi malambaˀ ɗik madiɗaka miga na, waɗ asi ka mazuɓ himaˀ haɗa ng'ar Buymisemuŋ na.

⁸ Madiɗa ngi soje Efrayimeye, naŋ ati Buymisemuŋ ɗu, i mijiviɗ ngi Bumbulvuŋ. Ar li gar naŋ maru na, ara pakaŋ mazaɓ. A ra zlakaŋ ngi kiɗa vu sesẽŋ a hay Buymisemuŋ naŋ.

⁹ Efrayimey, ki roko giw ti didak ar gwat malambaˀ, kaɓa ar hin ngi Gibeya. Buymisemuŋ a sa wuluk keŋ ar malambaˀ taŋ madiɗa na, a sa slufa taŋ ɓi ngi mungra taŋhaya.

Israyel a pula Bumbulvuŋ le mesem mesem

¹⁰ Bumbulvuŋ a ɓi: «Israyele, yi luuma na, naŋ kaɓa yi ngi gudubun ar li papala, yo ti ya muluma dideˀ kumoy na, taŋ kaɓa yi ngi ˀuruf minih mudumbuŋ naŋ ar widise. Taŋ mindilam ndil a Baˀal-Peˀor si na, a vulaka vu taŋ da kuli nah mapi mesem, a tiram gwat mukuy tahay wãˀ, kaɓa kuli taŋ mawuɗam nah vuna.

¹¹ Efrayimeye, gwat maga ɓa naŋ ti dudoko, a sa cuh fiw kaɓa ɗiyuw maslikiɗi, anta sa ya ka ta, anta sa gaka hur naŋ ta, yo anta sa kicuw a kwacaya ta.

¹² Ko da ara gilam ziri mizilehey tekeɗe kwana, i sa tika, ɓa ziri a tiram mizli tireˀ le ta. Haˀaw, ti ya masa cuh kileŋ avu taŋ na, taŋ ar bonoy.

¹³ Efrayime, yi pura na, a gi ti ziri naŋhaya kaɓa gwat ngi madala, a pula taŋ mbak a mbuŋ ɓa migi madalahay a kiɗaka taŋ.

¹⁴ Aw Bumbulvuŋ, vula taŋ… Ani kisa vula taŋ mi ska? Ga dirlay da ngwas taŋhaya, yo hisika taŋ ɗuwa haya ngbaˀ ngbaˀa.

¹⁵ Bumbulvuŋ a ɓi: «A Gilgala, moˀore taŋ na, a bugo vu le wãˀ a diga: Ya migi mesene ti taŋ na, a diga, yi sa ɓula taŋ ti hay ɗu avra, asi taŋ magaka gwata ti moˀore na. Y'anta sa wuɗ taŋ mata, asi buy taŋhay gar i mislikiɗa ɓihey.

¹⁶ A kiɗaka Efrayime le, dambasl naŋhay a muˀulom le, anta sa yi zingaˀ ko pal mata. Ko da ara yi tekeɗe kwana, ziri kwacay, taŋhaya taŋ mawuɗam taŋ haɗa na, yi sa kiɗa taŋ vagay vagay.»

¹⁷ Buymisemuŋ ɗu, a sa ɓula taŋ avra, asi a cinakaŋ mi ta, a sa laˀam lambaˀ a wuzla sukwi ngi mizli.