Ɗerewol OZE 2 - Bible en langue guiziga

Bumbulvuŋ misina Zuda ati Israyel i mizli naŋhay

¹ Israyeley a sa sikam kaɓa muyuŋ a mi mubuliy, weˀ ti hiri, taŋ kini na, a wi ta, a slufam ta ma. Hin a sa ndilawa, ɓa Buymisemuŋ a sa ɓa taŋ: «Kum i mizli ɗuwoy ta» jak ma na, a sa zila taŋ: «Ziri ngi Buymisemuŋ misi ti siifahay» jaka.

² Mizli Zudahay ati Israyeley, a sa kusom, a sa zuɓam buyo purla, a sa waka hirwuyo asi a sa gi i hin madiɗa ngi Zizreyel.

³ Ɓaka sukum kum mizileheye na: «Mizli ɗuwoy», yo sukum kum mongosohoyo ɓaka taŋ: «mawuɗam taŋ haɗa».

Israyel a puyuk ti buy naŋ le kaɓa ngwas miteŋteŋ ta

⁴ Israyeley, gaka kiita da mumuŋ kum na, gakaŋ kiita, asi naŋ i ngwas ɗu ta, yo ya kwana, yi zil naŋ ta. Gwat mabiga naŋ i ngwas sulome na, anja a hiziga ti mihiri naŋ kileŋ avra, yo gwat misi ar wala ngi ɗuwa naŋhay, mabiga naŋ i ngwas migi madama na, anja a hiziga kileŋ avra.

⁵ Da kanah ta na, i sa cukoŋ zanahaya, i pulaŋ gulndiŋ kine, i sa pulaŋ gulndiŋ kaɓa tapas hin ngi yi naŋ, i sa tiri di kaɓa ɓuh mikirɗak kirɗaka, i sa tiri di li mumuˀulo, i sa pulaŋ ɓa a muc ti madalyam.

⁶ Y'anta sa wuɗ ziri naŋhaya ta, asi i ziri ngi ngwas sulome.

⁷ Gisiŋ, mumuŋ taŋ a gi sulome le, ngwas miyi taŋ a gi gwat ngi mesem le, asi a ɓi zleˀe na: «Yi wuɗ kil gizirihhe asi mangasl ɗuwoy, mavulikiy ɗaf ati yam ngi si, ngwic ngi tumuŋ ati gugumay mislirkeɗ waɗ mal ati gwat ngi si, i taŋ.»

⁸ Vurˀe, i sa disla jiviɗ ɗike ti hadaw, i sa tika ti gwat kilak, ko naŋ anta sa luuma li ngi cuh naŋ na mata.

⁹ A sa kil asi mangasl naŋhaya, amma ko naŋ anta sa ndila taŋ ta. A sa sipa taŋ bal bal, ko a luuma taŋ ta. Joˀ a sa ɓi: «I sa mi ngi hay zil ɗu mudumbuŋ a muŋ, asi i ra mumul zleˀe fineˀ misi wurenna.»

¹⁰ Alkamari ati mbaazla si, waɗ mal muɗuco wureˀe, mavulaŋ taŋ i ya na, a sla wala naŋ ta. I vulaŋ ɓiri bara ati ɓiri tapasl tapasla le haɗa, a gam taŋ slra da kuli Baˀal.

¹¹ Vurˀe, yi sa ra tiɓa alkamari ɗu ar hin naŋ, mbaazla si ɗu, ar sifi naŋ. Ngwic ɗu ngi tumuŋ ati gugumay ɗu mislirkeɗ maɗumokoŋ mesem na, i sa ra tiɓa taŋ.

¹² Wurenna, gwat ngi mesem naŋhaya, i ra njika taŋ a mihiri ngi mangasl naŋhay, yo ko mbur loŋ masa lahaŋ tisi haŋ ɗu gu anta.

¹³ Cira hiri naŋ gar, muguzlum naŋhay, ngi kiyakaˀ ati sabat naŋhay, waɗ kus naŋhay ngi wuzla mizli, yi sa ga ɓa a kiɗam mi.

¹⁴ Guva ngi gudubun ati ngi uruf naŋhay, naŋ maɓi: «Puraka migir ɗu, mangasl ɗuwoy mivilikiy di tuwa.» Na yi sa tiri di kalaf tikiɗif, joˀ gwat misãmi ngi ɓuhoy a sa tiram di gwat ngi zum taŋ.

¹⁵ Hin ngi naŋ mawur taŋ gwat ngi mikulihey da Baˀal na, i sa ɓaŋ ɓa a slufa ɓi nah: Ti di nah, a ɗiyi vu ti dangwa ati gwat ngi wuyahay, aru ti kil asi mangasl naŋhay, na ya so na, a puyuk ti ya hirnga ɓula. I Buymisemuŋ miɓa.

¹⁶ Naŋ kine, i ya masaka mi naŋ, i sa ru di nga wuzlaɓuh mikirɗak kirɗak, i sa ɓaŋ ɓi ar mevele.

¹⁷ Ar nah so na, i sa maŋ ti guva ngi gudubun naŋ a muŋ, sozo ngi hiryi a Akor, i sa tiri di miviŋ ngi njaha hiri, a sa mahiri ngi gwat ngi gi naŋhay kaɓa ar hin ngi diili naŋ, kaɓa ar hin ngi naŋ mubo ti Ezipte.

Hin ngi ɗiya ɓi

¹⁸ Bumbulvuŋ a ɓi na: «Tapas nah, Israyel a sa ziliy ‹zil ɗu›, naŋ anta sa ziliy ‹Baˀal, Buy ɗu› kini mata.

¹⁹ Slimiɗ ngi Baˀal vuna, i sa ɓula kileŋ ar mingiɓi naŋ avra, kuli misi kaɓa tayna, anta sa zilaka slimiɗ taŋ neˀ mata.

²⁰ Ti hin nah, i sa ɗiyi ɓi ngi jumoˀay ati mizli ɗuwoyo ati gwat misahmi ngi ɓuhoy ati ɗiyuwoy maslikiɗam a muŋ, waɗ gwat makurmuɗom ti kwacayay. lek, maslalam ati gwat ngi vurumoy na, i sa ngila taŋ, a sa gi anta asi ruwuyo mata, i sa ga ɓa mizli ngi si ruwuyoy a hinjam zuy zuy.

²¹ Israyel, i sa gi ti ka mangasl ɗu ngi wãˀa. I sa gi ti ka mangasl da ya, ti gi jeŋ, ti gi gwat mikasl kasl, ti wuɗa vu waɗ ti mevel mezleŋ.

²² I sa gi ti ka mangasl da ya ti gi teŋteŋ, joˀ kisa si na Bumbulvuŋ.

²³ Tapasa, i sa mbiɗi mi. I ya Bumbulvuŋ miɓa. I sa mbiɗa mi da muŋ makutuk gwata, yo muŋ kwana a sa mbiɗi mi da ruwuy makutuk gwata.

²⁴ Hirwuyo a sa ga ɓa alkamari, mbaazla si, ati mal muɗuco wureˀ a gam, Zizreyel kwana, a sa gi taŋ gwat naŋ makutuko.

²⁵ I sa cifa Zizreyel asi ruwuyo yo i sa wuɗa Lo-ruhama, yi sa ɓa Lo-Ami: «Ki mbur ɗu» naŋ a sa ɓiy: «Buymisemuŋ ɗu.»