AMOS 3 - Bible en langue guiziga

Mizli ngi Buymisemuŋhoy a sa slufaka ɓi ngi gwat taŋ migaka na cummo

¹ Mizli Israyeley, kum i muyoy, i ya Bumbulvuŋ mimo ti kum ti ruwuy Ezipte, cinaka ya maɓukum ani:

² A wuzla mizli ngi si ruwuyoy gar na, yi sin di i kum, vurˀe gwat malambaˀ miwãˀ kum migaka na, i sa cufuɗukum, ɓa kisa slufaka ɓi nah.

Da Bumbulvuŋ ara ɓi na, mijiviɗ a taˀa me ta

³ Da mizli cuw a ɓam ar wal taŋ ta na, a ram zlaɓ zlaɓ a jiviɗe kwa?

⁴ Da mobor a pur gwat ngi ji ta na, a tuwuy a ɓuh kwa? Da zingaˀ ngi mobor a ji gwat ta na, a tuwuy angi hay naŋ kwa?

⁵ Da ɗiyuw a pur gwat asi diɓele ta na, a po sar ɓa a ci ngaseˀe kwa? Diɓele, da gwat a wusa ta na, a mbizli kwa?

⁶ Ada a fam tulum asi ruwuyo manja a muɗa didak da mizli kwa? Da Bumbulvuŋ a ga ta na, gwat ngi mendere a gi avu mizli kwa?

⁷ Naŋ kine, Bumbulvuŋ Buymisemuŋ, naŋ anta gi gwat neˀ manja a njika da mijiviɗ gawla naŋhaya ta.

⁸ Da mobor a tuwuy le na, mbur mazluwun ta i waka? Da Bumbulvuŋ Buymisemuŋ a ɓa mburo le na, mbur manjika ta i waka?

Bumbulvuŋa sa ga kiita da walahay Samari

⁹ Tilam mi a hirngi hay mimezlehey a Asdoto, a hirngi hay mimezlehey misi a ruwuy Ezipte, ɓam: «Cikilam a hirnga muwã Samari, puraka, ara gam lambaˀ lambaˀ, yo ara guzuvuraka mizli a muwã a diga!»

¹⁰ «Mizli Samarihey a sinaka gi gwat ti jiviɗ naŋ ɗalla ta. Gwat taŋ matiɓaka taŋ ti gidaŋ, waɗ taŋ mavaka taŋ avu mizli gar na, ara cikilaka taŋ ar hay taŋhay mimezlehey na. I ya Bumbulvuŋ maɓi.

¹¹ Vurˀe, ya Bumbulvuŋ Buymisemuŋ a ɓi na: «Mesenehey a sa gunoko hirwuy Samari, a sa wahaka mohol mugun hirnga kumo, yo a sa vaka gwat ngir hay mimezleheye.»

Lih ti ndurɓo hiri

¹² Bumbulvuŋ a ɓi ani: «Da mobor a ji tumuŋ le na, mijigin a puwo avu mi naŋ, i sar naŋ paw paw cuw malla slimiɗ naŋ buk tewle. Naŋ kine, Israyeley misi a Samari, muroko ginasl ginasl ar arngawo, malla ar gwat ngi hiney na, a sa gi avu taŋ kanah ya.

Ki mumuyuŋ ngi zay sla a slimiɗe

¹³ «Cinam, yo kaka mumuyuŋ ngi zay sla a slimiɗ da ziri ngi Zakopoyo: I ya Bumbulvuŋ Buymisemuŋ, Buy miwa si gazlavay kurzluˀ gar maɓi.

¹⁴ Tapas ya masa ru nga mbiɗa hirnga da Israyeley vur malambaˀ taŋ na, i sa mbiɗi hirnga avu li gi mikulihey misi a Betele, a sa ngilaka durumoy misi avu li gi mikuli, a sa ndilam a ruwuy.

¹⁵ I sa waha hay ngi hinpas waɗ hay ngi kiya himiɗe. I sa waha hay migaka taŋ wuya ti sliŋ ngi begeneheye, yo hay madiɗahay a sa mbizlam.» I ya Bumbulvuŋ maɓi.