ƁI NGI HIN GAR MUDUMBUŊ NAŊ 15 - Bible en langue guiziga

Davit miɗiya ɓi ngi jijira akoti ngi Buymisemuŋ nga Zeruzalem

¹ Davit a ɓi ɓa a ndirakaŋ hayay ar walahay nga naŋ Davit. A ɗiyi li da akoti ngi Buymisemuŋ, a ɗiyaŋ guɗuk a hirnga naŋ.

² Dar a ɓi: «Ma jijiraka akoti ngi Buymisemuŋ sey i Levihey pal taŋ, asi Bumbulvuŋ a wunaˀ taŋ le, ɓa a jijirakaŋ di, yo ɓa a kam slimiɗ ara ngi sete»

³ Davit a zila Israyeley cek nga Zeruzalem, ɓa a zuɓoko akoti ngi Buymisemuŋ ng'ar li miɗiyakaŋ di hĩˀĩ na.

⁴ A cikila masayay, dideˀ ngi Aroŋhoyo cek waɗ leviheye ma.

⁵ Angi sukwi ngi Kehata: I buy Uriyel waɗ levihey skat ti kukur cuw.

⁶ Angi sukwi ngi Merari: I buy Asaya waɗ levihey skat skat cuw ti kukur cuw.

⁷ Ar sukwi ngi Gersoŋ: I buy Zowel waɗ levihey skat ti kukur makir.

⁸ Angi sukwi ngi Elisafaŋ: I buy Semaya waɗ levihey skat cuw.

⁹ Angi sukwi ngi Hebroŋ: I buy Eliyel waɗ levihey kukur dangafaɗ.

¹⁰ Angi sukwi ngi Uziyel: I buy Aminadap waɗ levihey skat ti kuruˀ nga cuw.

¹¹ Davit a zila ti Sadok ati Abiyatar masayaya. A zila Uriyel, Asaya, Zowel, Semaya, Eliyel waɗ Aminadap mizli leviheye le ma.

¹² A ɓa taŋ: «Kum i buyoy a wuzla muy kum leviheye. Kum ati sukum kumoyo, zuɓaka dili kumoyo, yo a ram ti akoti ngi Bumbulvuŋ Buymisemuŋ ngi Israyele ng'ar li ya miɗiyaŋ di hĩˀĩ na.

¹³ Naŋ kine, dumbuŋ zleˀe na, kum anta, Bumbulvuŋ Buymisemuŋ ndra mikiɗa ndra na vurˀe. Asi i kam slimiɗ ar akoti ti jiviɗ naŋ ta»

¹⁴ Akẽh na, masayay ati levihey a zuɓaka dili taŋ a avra so, ɓa a jijiraka akoti ngi Bumbulvuŋ Buymisemuŋ ngi Israyel.

¹⁵ Dar levihey a jijiraka akoti ngi Buymisemuŋ ar pepesl ti ɓeɓelehey, kaɓa Bumbulvuŋ miɓa taŋ di ti balam Moyis na.

¹⁶ Davit a ɓa buy ngi leviheye, ɓa a cifaka muy taŋhay ar slra taŋhaya. Mizli dimis ti gujuvuroy, garayahay, jãwjãway. A kiɗaka taŋ ti gidaŋ, ɓa a bigaka ara mumulom gisiŋ.

¹⁷ Dar buyoy tuwa, a cifaka mizli ar slra taŋhaya. I ti Heman mangal ngi Zowel, Asaf mangal ngi Berekiya, Etaŋ mangal ngi Kusaya, muy ngi Merari.

¹⁸ Levi mekelemey ada dedeŋ a ciki taŋ ngi ga taŋ gwat taŋ mawuɗama, i ti: Zakari mijigana mizlingreŋ ngi hay ngi Buymisemuŋ a Zeruzalem, Ben, Yaziyel, Semiramot, Yehiyel, Uni, Eliyap, Benaya, Maˀaseya, Matitiya, Eliflehu, Mikineya, Obet-Edom waɗ Yehiyel.

¹⁹ Heman, Asaf waɗ Etaŋ, a kiɗam nga taŋ i jãwjãw ngi ɓiri gaza.

²⁰ Zakari, Aziyel, Semiramot, Yehiyel, Uni, Eliyap, Maˀaseya waɗ Benaya, a kiɗam nga taŋ i gujuvur ti ˀay miɓel ɓel.

²¹ Matitiya, Eliflehu, Mikineya, Obet-Edom, Yehiyel waɗ Azaziya, a kiɗam nga taŋ i garaya ti ˀay mubok, ti zli dimis aseˀe.

²² Yo Kenaniya i buy ngi Levihey majijiraka akoti, ɓi ngi akoti naŋ ava, asi a si na wala naŋ le.

²³ Berekiya ati Elkana, i taŋ majijiraka akoti,

²⁴ waɗ Obet-Edom ati Yehiya, i mijigana mizlingrehey. Sebaniya, Yosafat, Natanayel, Amasay, Zakari, Beneya waɗ Eliyezere, i masayay, a fam nga taŋ i zara a mbuŋ akoti ngi Buymisemuŋ.

Israyeley mindilam ti akoti ngi Buymisemuŋ a Zeruzalem

²⁵ Akẽh na, Davit ati mizli micawwa ngi Israyeley waɗ buy ngi sojeheye, a ram ti mumul nga zuɓo akoti ngi jumoˀay ngi Bumbulvuŋ a hay Obet-Edomo.

²⁶ A gam mikuli ti gusoŋ tarnaˀ waɗ izimey tarnaˀ, ɓa Buymisemuŋ a jigina Levihey majijiraka akoti ngi jumoˀay ngi Bumbulvuŋ.

²⁷ Davite, a ki zana ngi gugumay mislirkeɗ. Levihey gar majijiraka akoti, mizli dimisey waɗ buyɓi taŋ Kenaniya, a kam zana misi purla ati ngi Davite. Yo ma na, Davit a juw zana ngi is ngi gugumay mislirkeɗ le ma, zana ngi masayay.

²⁸ Israyeley gar ara ki saka akoti ngi jumoˀay ngi Bumbulvuŋ nga Zeruzaleme ti ji salalay, ti fi tulum, zara, ti kiɗa jãwjãw, gujuvur waɗ garaya.

²⁹ Rak ti mandilam ti akoti ng'ar walahay ngi Davit na, Mikal, zuŋ ngi Sawulo, a puro hiri tir fenetir. A pura na, buy Davit ara jiɗ ngbik ngbik, ara ɓuruk. Zuŋ tuwa, a zla a hirsaŋ a mevele.