Hibulu 8 - Ka Lamana'a Monoꞌi Lu Mu Tifiꞌehina Ka Yabe

Yesu sipi mamufa gilata bo yabe

¹ Ka noluna yamofihi legeya'a ma luto ni'ibe. Lali'i mamufa gilata bo sipi bo ai ifoga kokulumagu Hu'mamofihi koli'a hiti kefa hisalo maha'aluga yahi lamaga'aga mino moloto nohibe.

² Ai sipi hetofa mono nohi ni'inaya ya'mamofihi nonugu mono yahusabe lamana'a lali kumu yabe luto Hu'mamofitoga kaga lulata nohina nasanauba mamufa gilata foya lolo nohibe. Mono yahusabemofihi lamana'a bona'magita gi'ohuta ni'igopa Sipi Bouba ai'a li huto hu'ehina ni'ibe.

³ Le'mo mamufa gi emilata bo asaga'naloga enali gomolu nose'na to fato nose'na laita hilata nehabe lite keheli eto hi'ahana. Yana'mu lali mamufa gi emilata bo Yesu ai hiti Hu'mamofihi lokiya fi emi'ehinalo mino'ehina ya nohibe.

⁴ To metoga Moseu keya ka lu'ehina ka'amofihi mamufa gilata bona'i enali fa'mene nehanamo ni'inaya yata'isi melugu mino'ehina ni'itita mamufa gilata bo meminatine.

⁵ Enali foya'ani tafa nopofihi babeyafana ya suhi hite anagu lolo hilata nehabe to legeya'a ya'ma kokulumagu ni'ibe. Ana suhi huto Moseu ai mono kamofihi go nohi gilube luto nohigo Hu'mau ma luto lu emi'ehina: Keheli'ohubo. Kosagu babeyafa'a kelepi'ohunamo ana suhi huto ana'ina silaga'i lolo hubo, luto lu eto'ehina yabe.

⁶ To lu mu tifise'namofihi kaga tito ya'ma ai'a lu'ehina kaga sipi'a huto ti'ehina yanauba lukesa yafa'a lolo hu etago li huto hu'ehinamo ni'inaya go nohi gilina'mu ya luto lu eto'ehina ni'inaya yamofihi Yesu ai'a Hu'ma hiti bona'i hiti enele'mo hepilube luto lu mu tifi'ehina kaga kosaba'i yauba tito ya'ma ni'ibe. Ana suhi huto lokiya fi emilata foya ai'a lilata nohinamo yamofihi tito enali'ani foya'ani be ligi'ehinagi li hetofa huto hilina'mu yamofihi kaga lu molo'ehina kosaba'i huto yamofihi hetofana huto hilinagihe.

⁷ Koyapa'a lu mu tifise kaga mino'ehina yamofihi hetofa legeya'a ho'ehinalo ni'itita alihi mone huto hilibe luto kaga'a huto mehitine.

⁸ Ya hu'ehinaya Hu'mau ai ya'ma Yuta bona'magi kumu kehelina bebe mesago ka'a ma luto lu'ehina ya'ma mono bukugu ma lite fayahi keye'ahanamo ni'ibe: Minoto kana monelugu ya'ma Isilaeli bona'i to Yuta naga'i enali hiti lu mu tifise ka kosaba'i mone li huto hu epilube, yamofihi Sipi Bouba luto lu'ehina ni'ibe.

⁹ Kosaba ka lu molo'ohunamofihi koyapa'i afo'anigihi Iyipi metogati enele'mo alube luto enayato li'ohuna kana'a enali hiti lu mu tifise'namofihi ka'a lu molo epolo'ohunamo meni'ibe. Enali lu mu tifise ka'amofihi komopa'agu le'mo fotogo hite meminago nani'ni bu goloto ahe'mi epolo'ohunamo ni'ibe, Sipi Bouba ai'a ya'ma luto nolibe.

¹⁰ Koyapa kana'a bulago alihi Isilaeli bona'i enali hiti ma luto ka'a lu mu tifilube'mu nohube luto Sipi Bouba lu'ehibe. To nani lu laga huse kaga'ni enegekesagu melenogo'ni minalina'mu yabe. Ya huloto komopa'anigu fayahi koyo melenogo minalibe. To nani Hu'ma'anifita lolo huto minalugi enali yagapana'ni lolo hite minalanagihe.

¹¹ To limite neminana'a lagaso'a to tite neminana'a sipi bona'magi enali nani kumu keheli su hete kehelilanamo ni'inaya, yamofihi bo moneuba bo lalu'afihi to bo moneuba falu'afihi: Kai mele'isi Sipi Bomofihi hapa'a keheli fe lubo, luto ya lu emito iyo iyo huto lu emilina'mu yabe.

¹² Ya hu'ohuna'mu kehelilune'mu nehabe. Nani keke'i nolu epoloto enali li sibi sibi hi'ahana'ani li he'mi epalaluna'mu yabe. To foipana'animu aku negekesa mone mekeheliluna'mu yabe, luto Sipi Bouba ya lu'ehina yabe.

¹³ To Hu'mau ai lu mu tifise kaga kosaba'namofi kumu noluto koyapa'i mino'ehina kagamofihi tafa lo'ehibe luto lu'ehina. To ana'ina tafa loloto fulupa ito yamofihi nesi'a minoto su hoto fenene hilina'mu yabe.