Filemoni 1 - Ka Lamana'a Monoꞌi Lu Mu Tifiꞌehina Ka Yabe

¹ Poluita nani Yesu Kilisitohi ai kumu yabe luto naga nonugu nohuna bomofita to lalalutifu Timotiu hiti nani hiti nohutoti'a ya'ma fayaha nasana koyoto nokumube, Oho, Filemonio, komopati'a kimi'ohu'ina bose. Lali hiti moneko foyalo bo nohane.

² To letalitifu Afia yagi to mono foyalo amuya moloto lilata nohina panati, Akipasi to kai nohakagu mono kalo li gehesa hilata nehanamo boana'i yagi ya'ma moneko fayahi koyoto nolepu'ibe.

³ Afotifu Hu'ma to Sipi Boti Yesu Kilisito aitogati lehe'mose'na'a to fuluna'a lenalitoga mineno.

Filemoniu keheli amuya moloto minoto komopa'a epilata nohinamofihi hapa'a

⁴ Filemonio, nalalu'nigase, Hu'mamofitoga loka hona'amu loka hona'amu yamofihi kigi'a hoto kai kumu Hu'mamofihi fokehi holata nohube.

⁵ Kai Sipi Boti Yesu kumu kemehi emilata huto Hu'mamofihi bona'a enalitoga amuya moloto kehelito komopaka epilata nohane. Yamofihi ka'a ya'ma bona'magi lago kehelube.

⁶ Ya hulotoka kai ya'ma keheli amuya mololatanagu afetoga lali hiti komopati le'mo hepiloto ana'ina lamana'a asaga'i Kilisitotogati lalitoga huto hu'ehinamo ya'ma keheli fotogo huloto kehelilane luto Hu'mamofitoga lulata nohube.

⁷ Nalalu'niga, kai Hu'mamofihi bona'a asaga'i enele'mo bati hulata nohatamo ya'mu komopaka epi'ahatanamofihi komopa'nigu bati huto keheliloto negelo gofa bilata nohube.

Polu Onesimasihi nanito ho lifibo luto komopa'a molo'ehina

⁸ Ya'mu bati hilina nasana lilane luto Kilisitohi kaga'alo lu moloto lu ketaluna ni'itita keta mehuse huto lu kumutine.

⁹ Lali Hu'mamofihi kagu nohuta bona'i ai komopa'a emigo ai komopa'a emigo nohuta'mu yabe luto nani'ni Polu ka'a leli'ali bomofita to ai kumu yabe luto naga nonugu nohuna bomofita komopa'niguti nolube.

¹⁰ Nani naga nonugu nohuto'ni bo mone le'mo mono kapogu le'mo molo'ohuna bo Onesimasi ai kumu nolube.

¹¹ Kohe toto le'mo bati mehigo laga mehibe. To yatai ya'ma kai hiti nani hiti lele'mo lamana hulata nohina bo lolo hulago bati hibe.

¹² Ya hu'ehinaya komopa'ni emugo ai ya'ma lili'naka aku'i lilina ho lufugo i behe huto kaitoga foiya nobibe.

¹³ Nani ya'ma ka lamana'amu yabe luto naga nonugu nohugo ai kailotiu minoto nehe'malibe luto nipagu nohinaya aku'i kaitoga ho nolufube.

¹⁴ Kai nanitoga minalibe lilapi kaitoga bilibe lilapi kai foyaka yabe. Nani ya'ma lubo luto lu kimiluna meni'ibe.

¹⁵ Onesimasiu ai kele kele pana'i kaga lu laga hu'ahata'mu mekehelise he'mi keto'ehinamo yamofihi hapa'a ya huto ni'ibe. He'mi ketolagomo ya'ma kana nesi'a bu kebe liginogo i gelehe huto yamofihi kaitoga amuya moloto mino buto minalibe.

¹⁶ Yamofihi kele kele panakago anasi yatai menominabe. Yatai mone nesi'a mino lito buto hetofana hiti lolo nohibe. Kilisitohi nagalugu lebesise bo kalalukafu lolo huto alube'mu li bati nohibe. Nanitogati komopa'ni emugo mino'ehinamo kaitoga hiti anamofihi huto le'mo bati huto minalinamo ni'ibe. Aitoga komopaka emitogo Sipi Bomofihi lalameha'agu kogonakamo huto hu ketalina hiti hetofa kele kele panakamo hiti huto hilinagi yamofihi ai kumu lagaka kebesise'na mone hiti huto hilibe.

¹⁷ Ya nohuto nani kumu keheli'ahata kafalukafita nohutita ya'ma Onesimasihi be tigito le'mo kamanuga malalata keheligo nani Poluhi le'mo kamanuga molo'ahatamo kehelilibe.

¹⁸ Koyapa'i ana'ina mone li sibina hu keto'ehilina ya'ma to kai'naka mone gumina li'ehilina kai nanitoga li malalane.

¹⁹ Nani Poluita ya huto nani nayaha'niloti fayahi ya'ma koyoto nokumube. Nani'ni pa soto kimilube'mu nohube. To nanitogati amuya kemehi li'ahatamo anamofihi nona'a kaitoga ni'ibe. Yamofi kumu mone melube.

²⁰ Ya'mu nalalu'niga, kai ya'ma Sipi Bomofi kumu yabe luto ana'ina mone nimilane luto nolube. Kai Kilisitohi bona'a suhi huto ya'ma pana'i be tigito le'mo bati bati hu etobo luto ya hitogomo nani komopa'nigu bati huto minalibe.

²¹ Kai ya nohuto nani kaga'ni ya'ma keheliya ilane luto keheli'ohuto ya'ma koyoto lu nokumube. To kai komopakatu kehelito mone koto molo emilane luto keheli'ohube.

²² To mone kaga hiti lu nokumube. Lenali ya'ma nani kumu Hu'mamofitoga lilata nehana'mu yabe luto Hu'mau nele'mo gelehe hulenogo lenalitoga bilube luto fifa noube. Ya nehago kai hasa mone noha'ni li bati hu netalane.

Bona'i mone'amagihi keke'i li epele'ahana

²³ Yesu Kilisito kumu yabe luto naga nonugu mino'ohu'ina bo, nalalu'nifu Epafalasi lenali kumu keke'i nolu lepalabe.

²⁴ Ya huloto moneko foyalo bo Maki, Alisitaka, Temasi to Luku enali ana suhi hite nehafihe lite keke'i neli lepalabe.

²⁵ Sipi Bo Yesu Kilisitohi lehe'mose'na'a lenalitoga mino moloto mineno.