Seanraite 17 - An Bíobla Naoṁṫa 1817 (Bedell)

Caibidil XVII. Is mór beagan le súaiṁneas, 6 agus is onoír don tsean, an ċlann, &c.

¹ Is fearr greim tur, agus suáiṁnios maille ris, ná tiġ lán dféusta lé ceannairg.

² Bíaiḋ ríaġuil ag an tseirḃíseaċ ċrionna ós cionn an ṁic ṫuillios náire, agus biáiḋ cuid do noiġreaċt aige a measg na ndearḃráiṫreaċ.

³ Pota a naṫġlanta ċum a nairgid, agus a nfoirnís ċum a nóir: aċt isé an TIĠEARNA spíanus na croiḋṫe.

⁴ Do ḃeir fear déanta a nuilc aire do na béuluiḃ bréagaċa; agus do ḃeir an bréagaċ aire do ḋroiċṫeangaiḋ.

⁵ Giḋ bé ḟoċṁuiġios an boċt tarcuisniġiḋ sé a Ċruṫaiġṫeóir: agus an té lúaṫġáiriġios fá aṁgar ní ḃiaiḋ sé gan ṗionus.

⁶ Clann na ċloinne coróin na seanndáoine; agus glóir na cloinne na haiṫre.

⁷ Ní hiomċuḃaiḋ damadán glór dearsgnuiġ: is luġa ná sin puisiniġ bréagaċa do ṗrionnsa.

⁸ Is aṁluiḋ cloċ uásal tioḋlacaḋ a raḋarc an tí agá mbí sé: giḋ bé taoḃ a niompoiġionn, tarḃuiġiḋ sé.

⁹ Giḋ bé ċeilios sáruġaḋ íarruiḋ sé gráḋ; aċt giḋ bé aṫnúaiġios cúis dealniġ sé cáirde.

¹⁰ Is mó ṫéid aċṁusán a steaċ a nduine ċríonna na céad buille ann amadán.

¹¹ Cogaḋ aṁáin íarrus an droċ ḋuine: uimesin cuirfiġṫear teaċtaire fíoċṁar na ċuinne.

¹² Teagṁaḋ maṫġaṁuin ar ccaill a cuiléan ré duine, ní is luáiṫe ná amadán iona leiṁe.

¹³ Giḋ bé ċúitiġios maíṫ lé holc, ní ḋeileoċuiḋ olc re na ṫiġ.

¹⁴ Bí tosaċ na ceannairge aṁail do léigfeaḋ duine uisge amaċ: uime sin léig ḋíot ceannairge, suil beansuiġṫear innte.

¹⁵ An té ġlanas an ciontaċ, agus an té ḋamnuiġios an díreaċ, is aḋḟúaṫṁaireaċt don TIĠEARNA íad aráon.

¹⁶ Cred as a ḃfuil lúaċ a láiṁ amadáin dfaġáil gliocuis, ó ṫárla gan ċroiḋe ḋo é?

¹⁷ Graḋuiġ an ċara gaċ uile uáir, agus rugaḋ an dearḃráṫair a naġaiḋ buaiḋearṫa.

¹⁸ Ceangluiḋ duine gan tuigsi cunnraḋ, agus téid a nurruḋas a ḃfíaġnuise a ċarad.

¹⁹ An té ġráḋuiġios an ċeannairg gráḋuiġ sé sáruġaḋ: agus an té árduiġios a ġeata, túaraiḋ sé aiḋṁilleaḋ.

²⁰ Ann té agá mbí croiḋe crosta ní ḟaġan sé maiṫ air biṫ: agus an té agá mbí teanga ṁillte tuitiḋ sé a nurċóid.

²¹ An té ġineas amadán do ní sé sin ċum a ḋoilġis féin: agus ní ḃí solás aig aṫair amadáin.

²² Foġnuiḋ croiḋe súgaċ aṁuil leiġios: aċt tiormuiġiḋ spiorad briste na cnáṁa.

²³ Glacaiḋ an droċḋuine tioḋlacaḋ as a nuċt do ċláonaḋ sliġṫe an ḃreiṫeaṁnuis.

²⁴ Bí a neagna as coinne an té agá mbí tuigsi; aċt bíd súile a namadáin a nímliḃ na talṁan.

²⁵ Is dóḃrón do naṫair mac oinṁideaċ, agus searḃus é don ṁnaói rug é.

²⁶ Fós ní maiṫ pionús do ṫaḃairt do nfíréun, nó prionnsuiġe ḃúalaḋ ar son ceirt.

²⁷ Caigliḋ an té agá mbí éolus a ḃríaṫra: agus bí fear na tuigsiona do spiorad ḋearscnuiġṫe.

²⁸ An tamadán féin, a nuáir ḃíos sé na ṫoċd, meastar críonna é: agus an té ḋruidios a ḃéul bí sé measta na ḋuine ṫuigsionaċ.