1 Chum na gCoirinnteach 3 - An Bíobla Naoṁṫa 1817 (Bedell)

Caibidil III Is coṁluċd oibre do Ḋía, na mínisdriḋ; 11 aċd Criosd fein bunair an ċreidiṁ.

¹ Agus a ḋearḃraiṫreaċa, níor ḃféidir leamsa laḃairt riḃse mar ḋáoiniḃ sbioradálta, aċd mar ḋáoiniḃ colluiḋe, aṁuil náoiḋeanuiḃ a Gcríosd.

² Do ḃeaṫaiḋ mé siḃ re bainne, agus ní ré bíaḋ: óir níor ḃféidir liḃ fós a ġaḃáil ċugaiḃ, agus a nois féin ní féidir liḃ.

³ Oír atá siḃ fós colluiḋe: oír ó atá tnúṫ, agus imreasuin, agus aiṁreiteaċ eadruiḃ, a né naċ ḃfuilti colluiḋe, agus naċ sioḃlann siḃ do réir ḋáoine?

⁴ Oír an tan a deir neaċ, As lé Pól misi; agus neaċ eile, As le Apollos misi; a né naċ ḃfuiltí colluiḋe?

⁵ Oír cía hé Pól? Agus cía hé Apollos, aċd na mínisdrí tré ar ċreideaḃair, agus do réir mar tug an Tiġearna do ġaċ áoinneaċ?

⁶ Do ṗlanndaiġ misi, do ċraiṫ Apollos an tuisge; aċd a sé Día tug an fás.

⁷ Ar a naḋḃarsin ní ḃfuil éifeaċd sa tí ṗlanndaiġeas, na fós sa tí ċroiṫeas an tuisge; aċd a Ndía do ḃeir an fás.

⁸ Agus is ionnan an tí ṗlanndaiġeas, agus an tí ċroiṫeas an tuisge: agus do ġéuḃaiḋ gaċ áon a ṫúarasdal do réir a ṡáoṫair.

⁹ Oír is cóṁluċd oibre do Ḋía sinne: is siḃse treaḃaire Dé, agus áitreaḃ Dé.

¹⁰ Do reir ġrás Dé tugaḋ ḋaṁsa, do ċuir mé an ḟonndameint, mar ṁaiġisdir íulṁar oibre, agus tógḃuiḋ neaċ eile obair air. Giḋeaḋ taḃraḋ gaċ áon dá aire cionnus ṫógḃus sé a nobair.

¹¹ Oír ní héidir ré háoinneaċ fonndameint ar biṫ eile do ċur, táoḃ amuiġ don ḟonndameint atá ar na ċur ċeana, eaḋon Iósa Críosd.

¹² Agus dá dtógḃuiḋ áoinneaċ ar an ḃfonndameintsi ór, airgead, cloċa uáisle, aḋmad, féur, no connlaċ;

¹³ Do ḋéuntar obair gaċ áonduine follus: óir foillseoċaiḋ an lá é, do ḃríġ go maḋ léir é ris an dteine; agus foillseóċáiḋ an teine cionnus ḃías obair gaċ éunduine.

¹⁴ Da nanaiḋ obair áonduine noċ do ṫóg sé ar an ḃfonndameint, do ġéuḃaiḋ se túarasdal.

¹⁵ Má loisgear obair éunduine, raċaiḋ a ṡáoṫar amúġa: giḋeaḋ sáorfuiġṫear é féin; aċd sin fós aṁúil tré ṫeine.

¹⁶ A né naċ ḃfuil a ḟios aguiḃ gur siḃ teampoll Dé, agus go gcóṁnuiġeann Ṡiorad Dé ionnaiḃ?

¹⁷ Má ṫruáilliġeann einneaċ teampoll Dé, sgriosfuiḋ Día an tí sin; óir atá teampoll Dé náoṁṫa, noċ as siḃse.

¹⁸ Na meallaḋ éinneaċ é féin. Má ċiṫear déunduine aguiḃ é féin do ḃeiṫ glic sa tsáoġalsa, bíoḋ sé na amadán, ionnus go mbíaḋ se glic.

¹⁹ Oír is aiṁġliocas ré Día gliocas an tsáoġalsa. Oír atá sgríoḃṫa, Greamuiḋe sé na dáoine glioca ann a sliġṫiḃ féin.

²⁰ Agus a rís, Atá a ḟios ag an Dtiġearna, gur díoṁáoineaċ smuáintiġe na ndáoineaḋ glioc.

²¹ Uime sin na déunaḋ áoinneaċ máoiṫfeaċas ar ḋáoiniḃ. Oír is liḃse na huile neiṫe;

²² Da maḋ é Pól é, nó Apollos, nó Céṗas, nó an sáoġal, nó beaṫa, nó bás, nó na neiṫe atá do laṫair, nó na neiṫe atá ċum teaċda; is liḃse íad uile.

²³ Agus as lé Críosd siḃse; agus as le Dia Críosd.