U-Isaya 9 - iBhayibhili Elingcwele 1978

Inkosi yokuthula

¹ Esikhathini esidlulileyo waliyangisa ilizwe lakoZebuluni lelizwe lakoNafitali; kodwa esikhathini esizayo uzakuyenza ibe lodumo indlela ehamba ngasolwandle, eyilizwe elingaphetsheya kweJordani, iGalili lezizwe.

² Abantu ababehamba emnyameni bakubonile ukukhanya okukhulu; ababehlala elizweni elilomnyama omkhulu ukukhanya kubakhanyisele.

³ Nkosi, ubanikile ukujabula, wakhulisa ukuthokoza kwabo; bayathokoza phambi kwakho njengokuthokoza kwasesikhathini sokuvuna, bathokoza njengabantu lapho besahlukaniselana impango.

⁴ Ngoba ijogwe labo elinzima abaletshata emahlombe, lentonga yomhluphi wabo, ukuqedile njengasosukwini lokuchitheka kukaMidiyani.

⁵ Ngoba wonke amanyathelo afakwa ngesikhathi sokulwa, lezigqoko ezigcwele igazi, kuzakuba ngokokutshiswa.

⁶ Ngoba sizalelwe umntwana, sinikiwe indodana: izanikwa amandla obukhosi, ibizwe ngokuthi: UMluleki omangalisayo, uNkulunkulu olamandla, uBaba ongelakuphela, iNkosi yokuthula.

⁷ Umbuso wayo uzakuba mkhulu, lokuthula kakuyikuphela kuwo, lapho isihlezi esihlalweni sobukhosi sikaDavida. Izakuwumisa, iwuqinise ngokufaneleyo langokulunga, kusukela kulesisikhathi kuze kube nininini. Ukutshisekela kweNkosi yamabandla kuzakukwenza lokhu.

INkosi ithukuthelela uIsrayeli

⁸ INkosi ithume ilizwi lokwahlulela ngoJakobe, lizakwehlela koIsrayeli;

⁹ abantu bonke bazakwazi, uEfrayimi labaseSamariya abathi ngokuzigqaja langokuzikhukhumeza:

¹⁰ Izitina zidilikile, kodwa sizakwakha ngamatshe abaziweyo; amaphane aganyuliwe, sesizakwakha ngomkusu.

¹¹ Ngenxa yalokhu iNkosi ibavusela izitha, ibathumele abafo;

¹² amaSiriya ngasempumalanga lamaFilistiya ngasentshonalanga ayadla uIsrayeli ngomlomo wawo. Kukho konke lokhu ukuthukuthela kwayo kakupheli, isiphakamisile isandla sayo ukutshaya futhi.

¹³ Abantu kababuyelanga kulowo owabatshayayo, futhi kabayidinganga iNkosi yamabandla.

¹⁴ Ngakho iNkosi yaquma koIsrayeli ikhanda lomsila, ugatsha lomhlanga ngasuku lunye.

¹⁵ Ikhanda lingohloniphekayo lesikhulu, lomsila ungumprofethi otshumayela amanga.

¹⁶ Ngoba labo abakhokhela lababantu bayabaduhisa, lalabo abakhokhelwa yibo bayachitheka.

¹⁷ Ngakhoke iNkosi kayiyekeli izinsizwa zabo, kayilasihawu ngezintandane labafelwakazi babo; ngoba bonke kabesabi uNkulunkulu, benza okubi, bonke baqamba amanga. Kukho konke lokhu ukuthukuthela kwayo kakupheli, isiphakamisile isandla sayo ukutshaya futhi.

¹⁸ Ngoba ububi butshisa njengomlilo, buqeda ukhula lameva; buthungela izihlahla zehlathi, zize zithunqe intuthu.

¹⁹ Ngolaka lweNkosi yamabandla ilizwe litshisiwe, abantu banjengezinkuni zomlilo; kakho oyekela umfowabo.

²⁰ Bayahluthuna ngakwesokunene, kodwa babe belokhu belambile, badle ngakwesokhohlo, kodwa kabasuthi; lowo lalowo udla abantwana bakhe,

²¹ uManase udla uEfrayimi, loEfrayimi udla uManase, bobabili basukela uJuda kanyekanye. Kukho konke lokhu ukuthukuthela kwayo kakupheli, isiphakamisile isandla sayo ukutshaya futhi.