U-Isaya 8 - iBhayibhili Elingcwele 1978

Ibizo lendodana yomprofethi

¹ INkosi yasisithi kimi: Thatha ilitshe eliyisibhebhedu, ulobe kilo ngamabala alula ukuthi: Maherishalali‐Hashibazi,

² ubusudinga ofakazi abathembekileyo, uUriya umpristi loZekariya indodana kaJeberekiya, bakufakazele.

³ Ngalala lomkami, wathatha isisu, wazala indodana. INkosi yasisithi kimi: Umuthe ibizo lokuthi uMaherishalaliHashibazi.

⁴ Ngoba umntwana engakakwazi ukuthi Baba, lokuthi Mama, inotho yaseDamaseko lempahla yaseSamariya izathunjwa yinkosi yaseAsiriya.

⁵ INkosi yabuya yathi kimi:

⁶ Ngenxa yokuba lababantu bawalile amanzi aseShilowa ageleza kancinyane, bathuthumela ngenxa yokwesaba uRezini lendodana kaRemaliya,

⁷ ngakho mina Nkosi ngizabalethela amanzi eYufrathi amanengi lalamandla, okuyinkosi yaseAsiriya labo bonke ubukhosi bayo; azahamba phezu kwemigelo yonke lenkumbi zonke zalo,

⁸ aze afohlele koJuda, akhukhule, adlule, afinyelele lasentanyeni, agcwale endaweni zonke zelizwe; ngoba uNkulunkulu ulathi, impiko zakhe zelulekele ilizwe.

⁹ Yazini, lina bantu, ukuthi lizakuchitheka; lalelani, lina zizwe ezikhatshana; lihlome, kodwa lizachitheka.

¹⁰ Yenzani icebo, kodwa lizakwahluleka; khulumani ilizwi, kodwa kaliyikuma, ngoba uNkulunkulu ulathi.

YiNkosi efanele ukwesatshwa

¹¹ INkosi yangibamba ngesandla sayo, yangixwayisa ukuba ngingahambi endleleni yalababantu, yathi:

¹² Ungatsho ukuthi kungamacebo amabi konke abakutshoyo lababantu ukuthi kungamacebo amabi; ungesabi lokho abakwesabayo, utshaywe luvalo.

¹³ Kodwa iNkosi yamabandla yiyo engcwele, yiyo ofanele ukuyesaba, utshaywe luvalo ngayo.

¹⁴ Yona izakuba yisifu lelitshe elikhubekisayo, ibe lidwala eliwisa zombili izindlu zakoIsrayeli, ibe ngumjibila lesifu kwabakhileyo eJerusalema.

¹⁵ Abanengi bazakhubeka kulo, bawe bephuke, bathiywe, babanjwe.

¹⁶ Abafundi bami kabagoqe umqulu wobufakazi, banameke imfundiso yami.

¹⁷ Ngizalindela iNkosi efihlela indlu kaJakobe ubuso bayo, ngithembe kiyo.

¹⁸ Mina labantwana iNkosi enginike bona siyizibonakaliso lezimangaliso koIsrayeli, ezivela eNkosini yamabandla ehlala entabeni yaseZiyone.

¹⁹ Abantu bazakuthi kuwe: Buza emadlozini, lakubathakathi abatshaya imilozwi, banyenyeze; angithi abantu bangabuza kubonkulunkulu babo, babuze kwabafileyo ngabaphilayo na?

²⁰ Yebo, abantu bazakutsho njalo; kodwa amazwi abo ayize.

²¹ Bazazula lelizwe behlupheka kakhulu belambile; ukulamba kubavuse ulaka, bathuke inkosi yabo loNkulunkulu wabo, kuthi lapho bekhangela phezulu,

²² loba phansi emhlabeni babone ukuhlupheka lomnyama, umnyama owesabekayo, baxotshelwe kuwo. Kabayikuphepha kukho konke lokho.