U-Isaya 7 - iBhayibhili Elingcwele 1978

Ilizwi likaIsaya kuAhazi

¹ Kwathi ensukwini zokubusa kukaAhazi indodana kaJothamu, indodana kaUziya inkosi yakoJuda, uRezini inkosi yaseSiriya loPeka indodana kaRemaliya inkosi yakoIsrayeli bafika eJerusalema ukulihlasela, kodwa kabalinqobanga.

² Lapho kubikwa endlini kaDavida ukuthi iSiriya ihlangene loEfrayimi, uAhazi labantu bakhe bathuthumela njengezihlahla zinyikinywa ngumoya.

³ INkosi yathi kulsaya: Suka uyehlangabeza uAhazi, wena lendodana yakho uSheyari‐Yashubi, ngasekucineni komfolo wechibi elingaphezulu, elisendleleni yeNsimu yoMgezisi,

⁴ uthi kuye: Qina, ume isibindi, ungesabi, inhliziyo yakho ingathuthunyeliswa yilezizikhuni ezimbili ezithunqayo nje, ungathuthunyeliswa lulaka oluvuthayo lukaRezini leSiriya lendodana kaRemaliya.

⁵ Ngoba iSiriya loEfrayimi lendodana kaRemaliya bacebile okubi ngawe,

⁶ besithi: Asiye koJuda, simhlasele, simnqobe, sibeke indodana kaTabeyeli ibe yinkosi khona.

⁷ INkosi uNkulunkulu ithi: Icebo labo lizakwahluleka, kaliyikuphumelela,

⁸ lanxa umuzi omkhulu waseSiriya uliDamaseko, lenkosi yaseDamaseko inguRezini; eminyakeni engamatshumi ayisithupha lanhlanu uEfrayimi uzakuchitheka, kungasali muntu,

⁹ lanxa umuzi omkhulu wakoEfrayimi uyiSamariya, lendodana kaRemaliya iyinkosi yaseSamariya. Uba lingakholwa, isibili kaliyikuma.

Ilizwi likaIsaya ngoEmanuweli

¹⁰ INkosi yathi kuAhazi:

¹¹ Cela isibonakaliso eNkosini uNkulunkulu wakho, esivela phansi endaweni yabafileyo loba engqongeni phezulu.

¹² Kodwa uAhazi wathi: Kangiyikucela, kangiyikulinga iNkosi.

¹³ UIsaya wathi: Zwana, wena ndlu kaDavida; kuyinto encinyane kuwe yini ukuba udinise abantu; uzabuya udinise loNkulunkulu wami futhi na?

¹⁴ Ngakhoke iNkosi uqobo izakukunika isibonakaliso. Khangela, intombi izakuthatha isisu, ibelethe indodana ezakubizwa ngokuthi nguEmanuweli.

¹⁵ Lapho esekhulile esekwazi ukukhetha okuhle lokubi uzakudla amasi lenyosi;

¹⁶ kodwa esesengumntwana engakakwazi ukwala okubi, akhethe okuhle, ilizwe lamakhosi amabili owesabayo lizabe selachitheka.

¹⁷ INkosi izakukulethela wena labantu bakho, lendlu kayihlo insuku ezingazanga zibe khona, selokhu kwasukela osukwini lokwahlukana kukaEfrayimi loJuda; ngitsho inkosi yaseAsiriya.

¹⁸ Ngalolosuku iNkosi izabiza ngomlozwi imiyane ehlala ekudabukeni kwemifula yaseGibithe, lenyosi eselizweni laseAsiriya.

¹⁹ Kuzakuza konke, kuhlale ezigodini ezilamawa, lasembalwini zamadwala, lasezihlahleni zonke zameva, lasemadlelweni wonke.

²⁰ Ngalolosuku iNkosi izakugela ilizwe lakini ngensingo eyebolekwe phetsheya kweYufrathi, ngitsho inkosi yaseAsiriya, igele zonke inwele zalo kanye lendevu.

²¹ Kuzakuthi ngalolosuku umuntu afuye ithokazi libe linye, lezimvu ezimbili,

²² kuthi ngokwehlisa kwazo adle amasi; ngoba bonke abaseleyo elizweni bazakudla amasi lenyosi.

²³ Kuthi ngalolosuku, lapho okwakukhona amavini ayinkulungwane alingana lenhlamvu zesiliva eziyinkulungwane, kube khona ameva lokhula.

²⁴ Abantu bazakuyazingela khona ngemikhonto, ngoba ilizwe lonke lizabe seligcwele ameva lokhula.

²⁵ Emaqaqeni wonke ayelinywa kakuyikuyiwa khona ngokwesaba ameva lokhula; kodwa kuzakuba yindawo yokwelusela inkomo lezimvu.