U-Isaya 61 - iBhayibhili Elingcwele 1978

Indaba ezinhle zokukhululwa

¹ Umoya weNkosi uNkulunkulu uphezu kwami, ngoba iNkosi ingigcobile ukuba ngitshumayele indaba ezinhle kubayanga, ingithumile ukusilisa abalenhliziyo ezidabukileyo, ngimemezele ukukhululwa kwabathunjiweyo, lokuvulelwa kwezibotshwa entolongweni;

² ngimemezele umnyaka womusa weNkosi, losuku lokuphindisela kukaNkulunkulu wethu; ngiduduze bonke abalilayo,

³ nginike labo abalilayo eZiyone imiqhele endaweni yomlotha, lamafutha enjabulo endaweni yengubo yokulila, indumiso endaweni yomoya odanileyo; ukuze babizwe ngokuthi yizihlahla zobuqotho, ezihlanyelwe yiNkosi, ukuba izuze udumo.

⁴ Bazakwakha amanxiwa amadala, bavuse izindawo zakudala ezichithekileyo, balungise imizi edilikileyo, lazo zonke indawo ezindala ezichithekileyo.

⁵ Abezizwe bazakwelusa imihlambi yenu, babe ngabalimi benu lezisebenzi ezivinini zenu.

⁶ Kodwa lina lizakuthiwa lingabapristi beNkosi, libizwe ngokuthi yizikhonzi zikaNkulunkulu wethu; lizakudla imfuyo yezizwe, lithokoze ngenotho yazo.

⁷ Endaweni yehlazo lenu lizakwabelwa ngokuphindiwe kabili endaweni yokudunyazwa kwenu lizajabula ngesabelo senu; ngakhoke elizweni lenu lesabelo esiphindiwe kabili, libe lokuthokoza okungapheliyo.

⁸ Ngoba mina Nkosi ngithanda ukulunga, ngizonda ukuphanga lobubi; ngizakubanika umvuzo wabo ngeqiniso, ngenze labo isivumelwano esingapheliyo.

⁹ Inzalo yabo izakwaziwa phakathi kwezizwe, labantwana babo phakathi kwabantu; bonke abababonayo bazakuvuma ukuthi bangabantu iNkosi ebabusisileyo.

¹⁰ Ngizathokoza kakhulu ngeNkosi, umphefumulo wami uzajabula ngoNkulunkulu wami; ngoba ingambathise ingubo yokukhululwa, inyangembesa ngengubo yokulunga, njengomyeni ezicecise ngezigqoko zomthimba, lanjengomlobokazi ezicecisa ngamatshe amahle.

¹¹ Ngoba njengomhlaba uveza ihlumela lawo, lanjengensimu ikhulisa okuhlanyelweyo kiyo, ngokunjaloke iNkosi uNkulunkulu izaveza ukulunga lodumo phambi kwezizwe zonke.