U-Isaya 6 - iBhayibhili Elingcwele 1978

Umbono lokubizwa kukaIsaya

¹ Ngomnyaka wokufa kwenkosi uUziya ngayibona iNkosi uNkulunkulu ihlezi esihlalweni sobukhosi esiphezulu lesiphakemeyo; umsila wengubo yayo wagcwalisa ithempeli.

² Ngaphezu kwayo kwakumi amaserafi; kuyilelo lalelo lilempiko eziyisithupha; ngezimbili lagubuzela ubuso balo, langezimbili lagubuzela inyawo zalo, laphapha ngezimbili.

³ Elinye lamemeza kwelinye lisithi: Ingcwele, ingcwele, ingcwele iNkosi yamabandla; umhlaba wonke ugcwele inkazimulo yayo.

⁴ Insika zomnyango zanyinkinyeka ngenxa yelizwi lomemezayo, lendlu yagcwala intuthu.

⁵ Ngasengisithi: Maye mina, ngafa! Ngoba ngingumuntu olendebe ezingcolileyo, futhi ngihlala phakathi kwabantu abalendebe ezingcolileyo; amehlo ami abonile iNkosi, iNkosi yamabandla.

⁶ Kwasekuphaphela kimi elinye lamaserafi liphethe ilahle elivuthayo elalilithethe ngodlawu ealtareni.

⁷ Lathinta umlomo wami ngalo lisithi: Khangela, lokhu kuzithintile indebe zakho; ububi bakho bususiwe, lesono sakho sithethelelwe.

⁸ Ngasengisizwa ilizwi leNkosi lisithi: Ngizathuma bani? Ngubani ozasiyela na? Ngasengisithi: Ngilapha, thuma mina!

⁹ Yasisithi: Hamba, utshele lababantu uthi: Ukuzwa lizakuzwa, kodwa kaliyikuqedisisa; ukubona lizakubona, kodwa kaliyikubonisisa.

¹⁰ Yenza inhliziyo yalababantu ibe lukhuni, lendlebe zabo zibe buthundu, ufiphaze amehlo abo, funa babone ngamehlo abo, bezwe ngendlebe zabo, baqedisise ngenhliziyo zabo, baphenduke basiliswe.

¹¹ Ngasengisithi: Kuze kube nini, Nkosi, na? Yona yathi: Kuze kuchitheke imizi, kusale kungaselamuntu kiyo, lezindlu zisale zingaselabantu, lelizwe lichitheke lithi nya,

¹² leNkosi ibaxotshele khatshana abantu, lendawo ezinengi zisale zingaselabantu elizweni.

¹³ Lanxa kusele kulo ingxenye yetshumi yabantu, izatshiswa, njengesihlahla esikhulu, okusasele isidindi saso emhlabathini, lapho isihlahla sesiganyuliwe. — Esidindini kuzavela okutsha —